ភ្នំពេញ ៖ មន្ត្រីអគ្គនាយកដ្ឋានកាំកុងត្រូល សហការជាមួយមន្ត្រីនគបាលប្រឆាំងបទល្មើសសេដ្ឋកិច្ចក្រសួងមហាផ្ទៃ បានចុះអនុវត្តដីការសំរេច របស់តុលាការសាលាដំបូងរាជធានីភ្នំពេញ ធ្វើពិធីដុតបំផ្លាញចោល ទំនិញល្មើសច្បាប់មួយចំនួន មានដូចជា: នំក្លែងបន្លំម៉ាកសញ្ញា ស្ករត្នោតកែច្នៃពីស្ករស បារី៥៥៥ក្លែងក្លាយ ទឹកដោះគោយ៉ាអួររំលោភសិទ្ធចែកចាយ ទឹកស៊ីអ៊ីវ មានស្លាកសញ្ញាពុំសមស្រប និងគ្រឿងសម្អាងក្លែងក្លាយ ដែលមាន ទម្ងន់សរុបប្រមាណ ៤០ តោន នៅរសៀលថ្ងៃ សុក្រ ទី ១២ ខែតុលា ឆ្នាំ២០១៨ នៅទីលានចាក់សំរាម។
សូមជម្រាបផងដែរថា ទំនិញក្លែងក្លាយទាំងនេះ ត្រូវបានសមត្ថកិច្ចចម្រុះ ឆែករកឃើញ និងរឹបអូសបានពីតាម បណ្តាឃ្លាំងស្តុកទំនិញនានា នៅរាជធានីភ្នំពេញក្នុងរយ:ពេលកន្លងមក ។
ឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើស សេដ្ឋកិច្ច នៃអគ្គស្នងការនគរបាលជាតិ បានឲ្យដឹងថា ផលិតផលដែលក្រុមការងារបានដុតនេះ គឺបានចាប់ពីឈ្មួញទុច្ចរិតនាពេលកន្លងមក ហើយឈ្មួញ និងម្ចាស់សិប្បកម្មទាំងនោះ ត្រូវបានបញ្ជូនទៅតុលាការចាត់ការ តាមនីតិវិធីច្បាប់ផងដែរ។
ថ្លែងក្នុងឱកាសនោះដែរ លោក ស៊ីន ស៊ីដេត ប្រធាននាយកដ្ឋានមន្ទីរពិសោធន៍នៃអគ្គនាយកដ្ឋានកាំកុងត្រូល បានឲ្យដឹងថា ផលិតផលទាំងនេះ គឺក្លែងក្លាយទាំងអស់ ហើយអ្នកប្រើប្រាស់ និងបរិភោគនឹងមានផលប៉ះពាល់ខ្លាំងដល់សុខភាពរបស់ពួកគេ។
ឧត្តមសេនីយ៍ឯក ចាន់ វ៉ាន់ធឿន បានអំពាវនាវដល់បងប្អូនប្រជាពលរដ្ឋទាំងអស់ មុននឹងទិញរបស់ប្រើប្រាស់ និងបរិភោគត្រូវពិនិត្យ ឲ្យបានច្បាស់លាស់ពីព្រោះមានឈ្មួញទុច្ចរិត និងអគតិជាច្រើន បានលួចផលិត និងលក់ខណៈអាជ្ញាធរមិនទាន់ស្រាវជ្រាវរកឃើញនោះ។
ឧត្តមសេនីយ៍ឯក ក៏បានអំពាវនាវដល់ក្រុមអាជីវករ ដែលទទួលពីម្ចាស់ទីតាំងដែលលួចផលិតផលក្លែងក្លាយទាំងនោះ ត្រូវសហការជាមួយអាជ្ញាធរ ដើម្បីឲ្យអាជ្ញាធរចាត់វិធានការឈ្មួញទាំងនោះ ទៅតាមនីតិវិធីច្បាប់ផងដែរ៕ ដោយ ៖ បញ្ញាស័ក្តិ
