ខេត្តព្រះសីហនុ ៖ មន្ត្រីរដ្ឋបាលខេត្តព្រះសីហនុ បានឲ្យដឹងថា កាលពីល្ងាចថ្ងៃទី១២ ខែតុលាឆ្នាំ២០១៨ ឯកឧត្តម ជា សុផារ៉ា រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់ អមដំណើរដោយ ឯកឧត្តម សាយ សំអាល់ រដ្ឋមន្ដ្រីក្រសួងបរិស្ថាន- ឯកឧត្តម ថោង ខុនរដ្ឋមន្ត្រីក្រសួងទេសចរណ៍- តំណាងក្រសួងសាធារណៈការ និងដឹកជញ្ជូន និងឯកឧត្តម យន្ត មីន អភិបាល នៃគណៈអភិបាលខេត្តព្រះសីហនុ រួមជាមួយក្រុមការងារស្ថាប័នពាក់ព័ន្ធជាច្រេីនរូបទៀត បានចុះទៅពិនិត្យផ្ទាល់ ទៅលើសកម្មភាពបង្ហូរកាកសំណល់ និងទឹកកខ្វក់ ពីតាមបណ្តាការដ្ឋានសំណង់ និងលូបង្ហូរទឹក ចាក់ចូលទៅក្នុងសមុទ្រ ដើម្បីរកដំណោះស្រាយភ្លាមៗ នូវបញ្ហាមិនប្រក្រតីខាងលើ។
ជាមួយគ្នានេះដែរ ក៏បានចុះទៅពិនិត្យទីតាំងស្ថានីយ៍បូមទឹកកខ្វក់ និងអាងប្រព្រឹត្តកម្មទឹកកខ្វក់មួយចំនួន នៅតាមបណ្ដោយឆ្នេរសុខា- ឆ្នេរអូឈើទាល និងពិនិត្យ ស្ថានីយ៍ចម្រោះសំអាតទឹក កាកសំណល់ ទំហំ១៦ហិកតា នៅក្រុងព្រះសីហនុ។
នាឱកាសនោះដែរ ថ្នាក់ដឹកនាំក្រសួងពាក់ព័ន្ធខាងលើ ក៏បានពិភាក្សាគ្នា ដើម្បីរិះរកវិធានការដោះស្រាយបញ្ហានេះ ប្រយោជន៍ដើម្បីជម្រុញ លើកកម្ពស់សោភ័ណភាព ទីក្រុងទេសចរណ៍ជាប់មាត់ឆ្នេរសមុទ្រមួយនេះ ឲ្យមានបរិស្ថានអនាម័យល្អថែមទៀត៕ ដោយ ៖ ដែន សីមា
