ខេត្តព្រះសីហនុ៖ មន្ត្រីរដ្ឋបាលក្រុងព្រះសីហនុ បានឲ្យដឹងថា រហូតមកដល់ម៉ោង ១២ថ្ងៃត្រង់ថ្ងៃទី១២ ខែតុលា ឆ្នាំ២០១៨នេះ បញ្ហាកំប្លោកដែលរសាត់អណ្តែតមកលើឆ្នេរអូរឈើទាលក្នុងក្រុងព្រះសីហនុ ត្រូវបានអជ្ញាធរក្រុង-ខេត្តព្រះសីហនុ បានដោះស្រាយយកចេញពីឆ្នេរ រៀបរយវិញជាបណ្តើរៗរួចហើយ។
ទាក់ទិនបញ្ហានេះ លោក ឈិន សេងងួន អភិបាលរងខេត្តព្រះសីហនុ ដែលដឹកនាំកម្លាំងចុះសំអាតក្នុងនាមរដ្ឋបាលខេត្ត មានប្រសាសន៍ថា កំប្លោកដែលរសាត់មកទើរលើឆ្នេរអូរឈើទាល ពិសេសរសាត់មកច្រើនកាលពីថ្ងៃទី១១ ខែតុលា ត្រូវបានប្រមូលកើបយកចេញអស់ ពីក្នុងទឹកសមុទ្ររួចហើយៗ ក៏កំពុងឲ្យគ្រឿងចក្រកើបដាក់រថយន្ត ដឹកសំរាម និងរថយន្តអង្គភាពកងទ័ព ដើម្បីដឹកយកទៅចោល នៅទីលានចាក់សំរាម។
លោក ឈិន សេងងួន បន្តថា ប្រតិបត្តិការប្រមូលស្តារ សំរាមកំប្លោកមានចំនួនរាប់តោន នៅឆ្នេរអូរឈើទាល គឺមានការចូលរួមពីមន្ត្រីរាជការ កងកម្លាំងប្រដាប់អាវុធ អាជីវករ ប្រជាពលរដ្ឋ និងក្រុមអ្នកស្ម័គ្រ។ ក្នុងនោះក្រៅពីឆ្នេរអូរឈើទាល សំរសមកប្លោក ដែលមាននៅតាមឆ្នេរផ្សេងទៀត មានឆ្នេរអូរត្រេះជាដើម អាជ្ញាធរ នឹងពន្លឿនការដោះស្រាយឲ្យល្អប្រសើរឡើងវិញដូចគ្នា។
ទោះជាយ៉ាងនេះក្តី មន្ត្រីថ្លែងថា កាកសំណល់កំប្លោកចាស់ បានយកចេញពីក្នុងទឹកអស់ហើយគិតត្រឹមមុនថ្ងៃត្រង់ថ្ងៃទី១២ ខែតុលា ឆ្នាំ២០១៨ ប៉ុន្តែតាមការសង្កេត គេឃើញមានសំរសមកំប្លោកថ្មីៗជាច្រើនទៀត កំពុងរសាត់នៅក្នុងសមុទ្រ មានទិសដៅមករកឆ្នេរខ្សាច់ ដែលគេមិនទាន់អាចសន្និដ្ឋានបានទេថា កំណកដុំកំប្លោកថ្មីនេះនឹងរសាត់មកដល់ឆ្នេរជាថ្មីម្តងទៀតឬយ៉ាងណានោះទេ។
ទាក់ទិនបញ្ហានេះ អភិបាលក្រុងព្រះសីហនុ លោក អុី សុខឡេង បានប្រាប់បណ្តាញផ្សព្វផ្សាយថា កំផ្លោកដែលរសាត់ចូលសមុទ្រ រួចបានមកទើរ នៅលើឆ្នេរនានាក្នុងក្រុងព្រះសីហនុ គឺបានមកដល់កាលពីថ្ងៃទី៩ ខែតុលាមក និងមានប្រភពមកពីប្រទេសវៀតណាម៕ ដោយ ៖ ដែន សីមា
