ភ្នំពេញ ៖ ក្រុមកីឡាករ-កីឡាការិនីពិការទាំង៤៥នាក់របស់កម្ពុជា ដែលបានចូលរួមប្រកួតអាស៊ីប៉ារ៉ាហ្គេមលើកទី៣ នៅប្រទេសឥណ្ឌូណេស៊ី ចាប់តាំងពីថ្ងៃទី១-១៤ ខែតុលានោះ បានត្រឡប់មកដល់មាតុភូមិវិញហើយ នាល្ងាចថ្ងៃទី១៤ ខែតុលា ឆ្នាំ២០១៨នេះ ដោយមិនទទួលបានមេដាយឡើយ។
លោកស សុខា រដ្ឋលេខាធិការក្រសួងអប់រំយុវជន និង កីឡា លោកអ៊ុក សិទ្ធិជាតិ អគ្គនាយកកីឡាបាន ទៅទទួលស្វាគមន៍ការវិលត្រឡប់នេះ ដល់ចំណតអាកាសយានដ្ឋានអន្តរជាតិភ្នំពេញ កាលពីយប់ថ្ងៃទី១៤តុលា។
កម្ពុជាបានបញ្ជូនកីឡាចំនួន៦ប្រភេទ ទៅចូលរួមក្នុងព្រឹត្តិការណ៍នេះ ដែលក្នុងនោះ មានប្រភេទកីឡាអត្តពលកម្មដែលអត្តពលកម្មមានវិញ្ញាសារត់៣រូប គឺពិការក្រោមជង្គង់១រូប និងពិការដៃទាំង២ចំនួន២រូប ។ កីឡាករប្រណាំងរទេះ ចំនួន២រូបគឺកីឡាករវ៉ាន់ វ៉ុន លេង៣វិញ្ញាសាគឺចម្ងាយ១០០ម៉ែត្រ២០០ម៉ែត្រ និង ៤០០ម៉ែត្រ ។ កីឡាករហេង សាវឿន លេង៣វិញ្ញាសាគឺ២០០ម៉ែត្រ ៤០០ម៉ែត្រ និង៨០០ម៉ែត្រ ។ ក្រៅពីនោះមានប្រភេទកីឡា ហែលទឹកមាន៤រូប បាញ់ធ្នូមាន៤រូប ក្នុងនោះមួយរូបជាកីឡាការិនី ប៊ូលលីង ចំនួន២រូប បាល់បោះរទេះ១២រូប និង វាយកូនឃ្លីលើតុចំនួន២រូប ។
នេះជាការប្រកួតមួយដែលកម្ពុជា ទទួលបានលទ្ធផលអាក្រក់ខុសពីពេលមុនៗ ។ កីឡាករអត្តពលកម្មរត់ប្រណាំងជឹម ផានកីឡាកររទេះ ដែលខ្លាំងវ៉ាន វ៉ុនកីឡាកររទេះហេង សាវឿនដែលធ្លាប់ដណ្ដើមបានមេដាយនោះ បែរជាត្រឡប់មកវិញដោយដៃទទេ ។
បើតាមលោកយី វាសនា ដែលជាអគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា បានទទួលស្គាល់ថា អ្វីៗពិតជាមានការប្រែប្រួលមែន ។ ការវាយតម្លៃពីប្រភេទពិការ ក៏បង្កឲ្យមានបញ្ហាដែរ តែទោះជាយ៉ាងណា ក៏ការប្រកួតបានបញ្ចប់ទៅហើយ ឯ លទ្ធផល គឺកម្ពុជាមិនបានទទួលមេដាយ ៕ ដោយ ៖ បញ្ញាស័ក្តិ
