លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានសុំទោសជាសារធារណៈ ជំនួសមន្ត្រីក្រោមឱវាទដែលស្ថិតនៅក្នុងអធិដ្ឋាននគរបាលស្រុកស្វាយចេក ដែលបានចាប់ដាក់ខ្នោះ និងវាយធ្វើបាបឡើងទ្រមខ្លួន។
លោកស្នងការ នៅថ្ងៃទី១៥តុលា បានបញ្ជាក់ថា ៖ ” ខ្ញុំបាទ សុំទោសជាសាធារណចំពោះប្រជាពលរដ្ឋនៅទង្វើររបស់ប៉ូលិសបុគ្គគលមួយចំនួនតូច នៅអធិការដ្ឋានស្រុកស្វាយចេក ដែលបានធ្វើទៅលើប្រជាពលរដ្ឋក្នុងភូមិចំការគ ឲ្យប្រជាពលរដ្ឋ មានការឈឺចាប់កន្លងមក ។ ប៉ូលិស ប្រព្រឹត្តខុស់និងទទួលវិន័យទៅតាមទង្វើដែលប្រព្រឹត្ត” ។
សូមបញ្ជាក់ថា លោកស្នងការបានសុំទោសជាសារធារណៈនេះគឺបានធ្វើឡើងក្រោយពីមានប្រជាពលរដ្ឋម្នាក់ ឈ្មោះ ទឿង សុផល ដែលរស់នៅក្នុងភូមិចំការគ បានកើតទុកមិនសុខចិត្តរឿងនគរបាលស្រុកស្វាយចេក បានធ្វើទារុណកម្មយ៉ាងធ្ងន់ធ្ងរ ដោយមិនបានសួរនាំមុន។ ក្រោយពីជនរងគ្រោះ បានដាក់ពាក្យបណ្តឹងទៅអធិការដ្ឋានស្រុកស្វាយ និងស្នងការដ្ឋានខេត្តបន្ទាយមានជ័យតែមិនមានអ្នកណាអើពើ ជនរងគ្រោះក៏បានដាក់ពាក្យបណ្តឹងចូលទៅសម្តេច ស ខេង ដើម្បីជួយរកយុត្តិធម៌។
សូមបញ្ជាក់ថា មេភូមិចំការគ ប្តឹងមួលបង្កាច់ឲ្យនគរបាលចាប់ពលរដ្ឋស្លូតត្រង់ វាយដាក់ខ្នោះដៃនឹងជើងប្រភពពី បណ្តាញសង្គមហ្វេសប៊ុក បងប្រុសជនរងគ្រោះជាអ្នកបង្ហោះ ព័ត៌មាន កាលពីយប់នាថ្ងៃទី៨ តុលា ២០១៨ នៅក្នុងភូមិចំការគ ឃុំនឹងស្រុកស្វាយចេក ខេត្តបន្ទាយមានជ័យ ករណីរថយន្តជនជាតិថៃបុកផ្ទះប្រជាពលរដ្ឋ គ្រានោះម្ចាស់ផ្ទះពឹងពាក់ឲ្យឈ្មោះ ទឿង សុផលជួយប្តឹងទៅមេភូមិចំការគ ផង គ្រានោះឈ្មោះទឿង សុផល បានប្តឹងទៅមេភូមិចំការគ ឈ្មោះហែម សុផាន់ បែជាមេភូមិរូបនោះ ប្តឹងទៅនគរបាលស្រុកស្វាយចេក ឲ្យចាប់ឈ្មោះ ទឿង សុផលទៅវិញ ក្នុងន័យមួលបង្កាច់នឹងលាបពណ៌សុទ្ធសាធ។ បន្ទាប់ពីមេភូមិប្តឹងរួចមក នគរបាលស្រុកស្វាយចេក បើករថយន្តមកមានគ្នីគ្នាចំនួន៧នាក់ មានអាវុធនិងខ្នោះ មកដល់កន្លែងកើតហេតុ មិនសួរនាំអីច្រើនទេ ស្រាប់តែចាប់ឈ្មោះ ទឿង សុផល វាយខ្នោះដៃនិងជើងបោះចូលរថយន្តតែម្តង ទោះបីជនរងគ្រោះ សុំអង្វរថាខ្លួនមិនបានប្រព្រឹត្តក៏ដោយ ក៏មិនព្រមដោះលែង។ ក្នុងនោះ បានវាយធ្វើបាបជនរងគ្រោះ ក្នុងរថយន្តបណ្តាលឲ្យមានការឈឺចាប់ និង សន្លប់មិនដឹងខ្លួន ហើយបានបញ្ជូនដល់ អធិការដ្ឋាននគរបាលស្រុកស្វាយចេក ឃុំខ្លួនមួយយប់ ។ នេះហើយដែលមេភូមិ រាយការណ៍បង្កាច់មួល ជនជាតិថៃដែលយករថយន្ត បុកផ្ទះពលរដ្ឋនោះជាក្លើម្រាក់របស់លោកមេភូមិចំការគ។ លុះដល់ថ្ងៃទី៩ខែឆ្នាំដដែល ជនរងគ្រោះបានដាក់ពាក្យបណ្តឹង ទៅអធិការនគរបាលស្រុកស្វាយចេក រង់ចាំរហូតដល់ថ្ងៃរសៀល គេមិនទទួលពាក្យបណ្តឹងជនរងគ្រោះឡើយ ដោយគេដឹងថា ធ្វើខុសទៅលើពលរដ្ឋស្លូតត្រង់។ ដោយដឹងឮថាជនរងគ្រោះ បានដាក់ពាក្យបណ្តឹងទៅស្នងការនគរបាលខេត្ត ស្រាប់តែទូរសព្ទ័មកជនរងគ្រោះ ឲ្យដកពាក្យបណ្តឹងទៅវិញ ក្នុងនោះ បាននិយាយគំរាមថែមទៀត បន្ទាប់មកជនរងគ្រោះបានបង្ខំចិត្តទៅដាក់ពាក្យបណ្តឹងនៅ ការិយាល័យព្រហ្មទណ្ឌកំរិតធ្ងន់នៃស្នងការដ្ឋាននគរបាលខេត្តបន្ទាយមានជ័យ សូមឲ្យជួយរកយុត្តិធម៌ ឲ្យជនរងគ្រោះបានសរសេរទៀតថា បើនៅស្នងការខេត្ត មិនរកយុត្តិធម៌ជូនប្អូនគាត់ទេ ប្អូនគាត់នឹងដាក់ពាក្យបណ្តឹងទៅអគ្គស្នងការនគរបាលជាតិ ជាមិនខាន ។
សូមបញ្ជាក់ថាជនរងគ្រោះបានទៅពិនិត្យនៅមន្ទីរពេទ្យ ដោយមានការថតឆ្លុះផងនះ គ្រូពេទ្យបញ្ជាក់ថា ត្រចៀកជនរងគ្រោះ មានអការ ខូចស្តាប់មិនសូវឮ នឹងរបួសស្នាមត្រង់កញ្ចឹងក នឹងមុខ មានភាពជាំរលាត់៕ ដោយ៖បញ្ញាស័ក្តិ
