ខេត្តស្វាយរៀង ៖ លោកនាយឧត្ដមសេនីយ៍ គន់ គីម ទេសរដ្ឋមន្ត្រីទទួលបន្ទុកបេសកកម្មពិសេសនិងជា អនុប្រធានអគ្គលេខាធិការសមាគមអតីតយុទ្ធជនកម្ពុជា និងលោក ម៉ែន វិបុល អភិបាល នៃគណៈអភិបាលខេត្តស្វាយរៀងនិងជាប្រធានកិត្តិយសសមាគមអតីតយុទ្ធជនកម្ពុជាខេត្ត នារសៀលថ្ងៃចន្ទ ៦កើត ខែអស្សុជ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៥ ខែតុលា ឆ្នាំ២០១៨នេះ បានអញ្ជើញចុះជួបសំណេះសំណាល និងសួរសុខទុក្ខ បងប្អូនអតីតយុទ្ធជនដែល កំពុងរស់នៅក្នុងតំបន់ផ្ទះ ២០០ខ្នង ស្ថិតនៅភូមិជីកដី ឃុំអណ្ដូងត្របែក ស្រុករមាសហែក ខេត្តស្វាយរៀង ដែលជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា ។
ក្នុងឱកាសនោះលោកទេសរដ្ឋមន្ត្រី គន់ គីម បាននាំមកនូវការផ្តាំផ្ញើសួរសុខទុក្ខពីសម្តេចតេជោហ៊ុនសែនដែលតែងតែនឹករលិកដល់បងប្អូនទាំងអស់គ្នាផងដែរ។បងប្អូនអតីតយុទ្ធជនដែលបានទទួលផ្ទះមួយខ្នងពីសម្តេចអគ្គមហាសេនាតេជោ ហ៊ុន សែន ហើយសូមចេះថែរក្សាឲ្យបានគង់វង្សយូរអង្វែងនិងដាំបន្លែបង្ការនិងចិញ្ចឹមសត្វរួមផ្សំដើម្បីជួយសម្រាលដល់ជីវភាពរស់នៅព្រមទាំងខិតខំថែរក្សាសុខភាពឲ្យបានល្អប្រសើរថែមទៀត។
លោកបានថ្លែងបន្តទៀតថា ៖ អំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានកិត្តិយសសមាគមអតីតយុទ្ធជនកម្ពុជា ដែលបានសង់ផ្ទះចំនួន២០០ខ្នង ហើយបានចែកជូនដល់អតីតយុទ្ធជនរស់នៅក្នងខេត្តស្វាយរៀង
នាពេលនេះគឺជាចំណងដៃសំរាប់បងប្អូនជាអតីតយុទ្ធជនដែលមានស្នាដៃចូលរួមបំរើជាតិមាតុភូមិហេតុដូច្នេះហើយសូមឲ្យបងប្អូនត្រូវចេះស្រលាញ់ថែរក្សាការពារនិងចេះដាំដុះនូវរុក្ខជាតិតាមតំរូវការក្នុងភូមិសាស្ត្ររបស់ខ្លួន៕ ដោយ ៖ វ៉ៃកូ