ភ្នំពេញ ៖ អគ្គស្នងការរងនគរបាលជាតិ បានលើកឡើងថា ការប្រយុទ្ធប្រឆាំងនឹងបទល្មើសបច្ចេកវិទ្យាវាមានកក្តាជាច្រើនដែលគួបផ្សំទើបអាចធ្វើការតស៊ូបាន ហើយកត្តាសំខាន់ចម្បងបំផុតគឺធនធានមនុស្ស។
លោកបន្តថា បើទោះបីជាយើងមានឧបករណ៍បច្ចេកវិទ្យាទំនើបយ៉ាងក៏ដោយ តែបើធនធានមនុស្សរបស់យើងមិនមានសមត្ថភាពគ្រប់គ្រាន់ប្រើប្រាស់ទេ ក៏យើងមិនអាចនឹងធ្វើឲ្យបច្ចេកវិទ្យាទាំងអស់នោះ ឆ្លើយតប និងអាចប្រើប្រាស់សម្រាប់តស៊ូប្រយុទ្ធប្រឆាំងលើបទល្មើសបច្ចេកវិទ្យាបានទេ ផ្ទុយទៅវិញបើយើងមានសមត្ថភាព តែយើងគ្មានឧបករណ៍បច្ចេកទេសក៏វាមិនអាចធ្វើទៅបាននោះដែរ។
លោក នាយឧត្តមសេនីយ៍ ឆៃ ស៊ីណារិទ្ធ អគ្គស្នងការរងនគរបាលជាតិ ដែល ជាអធិបតី ក្នុងពិធីបើកវគ្គបណ្តុះបណ្តាល ស្តីពីការស៊ើបអង្កេតបទល្មើសបច្ចេកវិទ្យា នៅ ថ្ងៃទី១៦ ខែតុលា ឆ្នាំ២០១៨នេះ នៅអគ្គស្នងការដ្ឋាននគរបាលជាតិ ដោយមានការចូលរួមពី លោក ណា ហុងយូ (Na Hongkyu) អគ្គកុងស៊ុលច្បាប់ នៃស្ថានទូតសាធារណរដ្ឋកូរ៉េ ប្រចាំព្រះរាជាណាចក្រកម្ពុជា។ ។
នាយឧត្តមសេនីយ៍ ឆៃ ស៊ីណារិទ្ធ មានប្រសាសន៍ថា ការវិវឌ្ឍប្រព័ន្ធបច្ចេកវិទ្យាទំនើបជឿនលឿន មន្ត្រីនគរបាលត្រូវតែចាំបាច់មានសមត្ថភាពគ្រប់គ្រាន់នូវវិធានច្បាប់ ដើម្បីជាមូលដ្ឋាននៃការអនុវត្តកិច្ចការជំនាញ ហើយមានរឿងជាច្រើនដែលចំណុចខ្លះ យើងឃើញថាការប្រព្រឹត្តវារំលោភបំពានទៅដល់សិទ្ធ និងផលប្រយោជន៍របស់ប្រជាពលរដ្ឋ ប៉ុន្តែដល់វិធានច្បាប់របស់យើងនៅមិនទាន់មានគ្រប់គ្រាន់ ដែលជាហេតុធ្វើឲ្យសមត្ថកិច្ចរបស់យើងលំបាកក្នុងការប្រតិបត្តិការ ។ នេះ ជាកក្តាចាំបាច់ណាស់ ដែលកងកម្លាំងនគរបាលជាតិ កំពុងតែខិតខំប្រឹងប្រែងធ្វើយ៉ាងណាកសាងមូលដ្ឋានច្បាប់ លើការប្រយុទ្ធប្រឆាំងបទល្មើសបច្ចេកវិទ្យានេះឲ្យបាន ទុកជាមូលដ្ឋានក្នុងការអនុវត្ត និងបង្ក្រាបនូវបទល្មើសនានា ។
លោក អគ្គស្នងការរងនគរបាលជាតិ បញ្ជាក់ថា “ ពួកឧក្រិដ្ឋជនបច្ចេកវិទ្យា គឺកាន់តែមានការវិវឌ្ឍឥតឈប់ឈរ ដើម្បីរកគ្រប់វិធីធ្វើយ៉ាងណាសំដៅប្រព្រឹត្តបទល្មើសនៅក្នុងពិភពលោករបស់យើងទាំងមូល ក្នុងកត់សម្គាល់គឺ បទល្មើស On Line, ល្បែងស៊ីសង ឆបោក ជួញដូរគ្រឿងញៀន ក៏ដូចជាជួញដូរមនុស្ស ស្ត្រី កុមារ ដែលយើចាំបាច់ត្រូវតែយកចិត្តទុកដាក់ ដោយមិនអាចធ្វេសប្រហែសបានឡើយ ។ ចំពោះប្រទេសកម្ពុជារបស់យើងក៏ជាប្រទេសមួយជាគោលដៅមួយ ដែលពួកឧក្រិដ្ឋជនទាំងនេះធ្លាប់បានប្រព្រឹត្ត ហើយយើងក៏បានបង្ក្រាបជាបន្តបន្ទាប់ ហើយចុងក្រោយនេះកាលពីម្សិលមិញ គឺយើងបានបញ្ជូនឧក្រិដ្ឋជនដែលបានប្រព្រឹត្តល្បែងតាម On Line នេះ ជាជនជាតិចិន ចំនួន ៩១នាក់ទៅប្រទេសចិនវិញ” ។
លោក នាយឧត្តមសេនីយ៍ អគ្គស្នងការរងនគរបាលជាតិ បន្តថា បទល្មើសនេះនៅតែមានការរីករាលដាលឡើង បើយើងគិតពីទំហំនៃការបង្ក្រាបរបស់សមត្ថកិច្ច គឺមានជនជាតិជាច្រើនក្នុងនោះមាន ចិន កូរ៉េ ប៉ុន្តែការរាងចាលរបស់ពួកនោះ គឺស្ថិតក្នុងស្ថានភាពមួយមិនទាន់ប្រាកដប្រជានៅឡើយទេ គឺថានៅតែប្រើប្រាស់មូលដ្ឋាននៅក្នុងទឹកដីកម្ពុជាដើម្បីប្រព្រឹត្តបទល្មើស ហើយពីមុនសកម្មជ្រកខាងក្រៅបរិវេន នៃទីតាំងល្បែងស៊ីសងស្របច្បាប់ ដូចនៅតាមតំបន់ជនបទ ទីក្រុង លួចលាក់ ប៉ុន្តែក៏វាមានមួយចំនួនវានៅតែមានធ្វើសកម្មភាពនៅតំបន់លួចលាក់ មួយចំនួនក៏វានៅជ្រកក្រោមគ្រឹះស្ថានកាស៊ីណូ ដែលមានអាជ្ញាប័ណ្ណស្របច្បាប់ ។ ទោះបីស្ថិតនៅទីតាំងលួចលាក់ ក៏ដូចជាទីតាំងស្របច្បាប់ក៏ដោយឲ្យតែមានបទល្មើស គឺកងកម្លាំងនគរបាលជាតិកម្ពុជា មិនអនុញ្ញាតឲ្យប្រព្រឹត្ត បានជាដាច់ខាត គឺយើងនៅតែរួមកិច្ចសហការគ្នារកឲ្យឃើញ និងធ្វើការផ្តន្ទាទោសតាមច្បាប់ ៕ ដោយ ៖ បញ្ញស័ក្តិ