មានការផ្ទុះការខឹងសម្បារយ៉ាងខ្លាំងនៅក្នុងប្រទេសឥណ្ឌា នៅពេលដែលវេជ្ជបណ្ឌិតនៅមន្ទីរពេទ្យមួយបានប្រកាសថា ទារកដែលទើបកើតម្នាក់បានស្លាប់ ប៉ុន្តែម្តាយទារកនោះ បានឃើញកូនរបស់គាត់កំរើកនៅក្នុងថង់ប្លាស្ទិច។ នេះបើតាមការចេញផ្សាយរបស់ BBC នៅព្រឹកថ្ងៃសៅរិ៍នេះ។
វេជ្ជបណ្ឌិត នៅមន្ទីរពេទ្យឯកជនមួយឈ្មោះ Max Hospital ក្នុងទីក្រុងដេលី បានប្រព្រឹត្តកំហុសមួយយ៉ាងធំ បន្ទាប់ពីប្រកាសថាទារកទើបនឹងកើតម្នាក់បានស្លាប់ ខណៈដែលបងប្អូនភ្លោះទារកនោះម្នាក់ទៀតបានស្លាប់ក្នុងពោះម្តាយ។
ឪពុកម្តាយរបស់ទាករបាននិយាយថា ពួកគេបានសំគាល់ឃើញថា កូនរបស់គាត់ម្នាក់បានកំរើកនៅក្នុងថង់ប្លាស្ទិច ដែលវេជ្ជបណ្ឌិតដាក់ចូលក្នុងនោះ។
កំហុសដ៏ធ្ងន់ធ្ងរនោះបានធ្វើឲ្យមានផ្ទុះការខឹងសម្បារយ៉ាងខ្លាំង និងមានការចោទសួរពីគុណភាពនៃសេវាកម្មថែរក្សាសុខភាពឯកជន ដែលជាទូទៅតែងមានតម្លៃថ្លៃ។
ប្រមុខរដ្ឋាភិបាលនៃទីក្រុងដេលី ឈ្មោះ Arvind Kejriwal បាននិយាយថា លោកបានបញ្ជាឲ្យមានការស៊ើបអង្កេតលើបញ្ហានោះ។ រដ្ឋមន្ត្រីក្រសួងសុខាភិបាល ក៏បានព៌ណនាហេតុការណ៏នោះថា ជាការធ្វេសប្រហែសដ៍គួរឲ្យខ្លាច និងជាបទឧក្រិដ្ឋ។
នៅក្នុងសេចក្តីប្រកាសទៅកាន់សារព៌តមាន មន្ទីរពេទ្យនោះបាននិយាយថា ពួកគេមានអារម្មណ៏រន្ធត់ និងព្រួយចំពោះការធ្វេសប្រហែសនោះ ហើយខាងមន្ទីរពេទ្យបានឲ្យវេជ្ជបណ្ឌិតម្នាក់នោះឈប់ធ្វើការមួយរយៈពេល ហើយខាងមន្ទីរពេទ្យក៏បានស្នើឲ្យមានការព្យួរការស៊ើបអង្កេតផងដែរ៕ សុភ័ក្ត្រ
