រាជធានីភ្នំពេញ ៖ ក្រុមជនស្លៀកស៊ីវិលជាច្រើននាក់បាន ផ្ទុះអាវុធជាច្រើនគ្រាប់ ក្នុងការបង្ក្រាបមុខសញ្ញាគ្រឿងញៀន ដោយចាប់វាយខ្នោះជនជាតិវៀតណាម២នាក់ ដែលបង្កឲ្យមានការភ្ញាក់ផ្អើលដល់ប្រជាពលរដ្ឋ និងធ្វើស្ត្រី ខ្មែរអ៊ិស្លាម មានការភិតភ័យ រហូតដល់មានអ្នកសន្លប់ចំនួន២នាក់ នៅម៉ោង ជា៩យប់ ថ្ងៃអង្គារ ទី១៦ ខែតុលា ឆ្នាំ២០១៨នេះ នៅត្រង់ចំណុចភូមិព្រែកតាពៅ (ទល់មុខវិហារអ៊ិស្លាម) សង្កាត់ព្រែកប្រា ខណ្ឌច្បាអំពៅ រាជធានីភ្នំពេញ ។
នៅមុនពេលកើតហេតុ គេឃើញនារីជនជាតិវៀតណាមម្នាក់ បានដើរចូលមកក្នុងភូមិកើតហេតុខាងលើ មួយសន្ទុះក្រោយមកស្រាប់តែមានកងកម្លាំងសមត្ថកិច្ចចម្រុះមួយក្រុម ស្លៀកពាក់ស៊ីវិល ពាក់មួកសុវត្ថិភាពបាំងមុខជិត មានទាំងរថយន្ត ម៉ូតូ មិនដឹងថា តាមនារីជនជាតិវៀតណាមនះ មកពីណាទេ ក៏ឆ្មក់ចូលមកតាមក្រោយហើយនារីជនជាតិវៀតណាមរូបនោះ បានរត់ឡើងផ្ទះប្រជាពលរដ្ឋ។ ទើបកម្លាំងសមត្ថកិច្ចចម្រុះទាំងនោះ រត់ដេញតាមចាប់ទាំង មនុស្សស្រីម្នាក់និងយុវជនម្នាក់ទៀត ដាក់ខ្នោះជាប់គ្នា រួចបម្រុងនាំខ្លួន ចេញក្រៅ ស្រាប់តែប្រជាពលរដ្ឋដែលនៅក្បែរនោះមកឃើញទាន់ ក៏ស្រែកឆោឡោឡើងបង្កការភ្ញាក់ផ្អើល នាំគ្នាមករារាំងសមត្ថកិច្ច មិនឲ្យនាំខ្លួនមនុស្សទាំងនោះចេញទៅទេ ដោយសារតែប្រជាពលរដ្ឋច្រើន ព្យាយាម រារាំងមិនអោយនាំជនប្រុសស្រីទាំង២នាក់នោះចេញ ទើបសមត្ថកិច្ចផ្ទុះអាវុធបាញ់ឡើងលើ៣គ្រាប់ ដើម្បីបំបែកហ្វូងប្រជាពលរដ្ឋ តែនៅមិនអាចបំបែកបាន ទើបសមត្ថកិច្ចបន្តបាញ់ឡើងលើ៣គ្រាប់ ទៀត ទើបបង្កឲ្យ ដល់ប្រជាពលរដ្ឋមានការភិនភ័យ នាំគ្នាស្រែកឆោឡោឡើង ទើបសមត្ថកិច្ចចម្រុះទាំងនោះ នាំគ្នាដកខ្លួនចេញបាត់អស់ពីកន្លែងកើតហេតុ ដោយបន្សល់ទុកក្មេងស្រីម្នាក់ និងមនុស្សចាស់ម្នាក់ ដែលជាប្រជាពលរដ្ឋខ្មែរឥស្លាម ភិតភ័យញ័រខ្លួន សន្លប់បាត់ស្មារតី នៅកន្លែងកើតហេតុ ។
ក្រោយពីសមត្ថកិច្ចស្លៀកពាក់ស៊ីវិលទាំងនោះ ចេញបាត់អស់ទៅ គេឃើញមាន កងកម្លាំងសមត្ថកិច្ចខណ្ឌច្បារអំពៅ និងសមត្ថកិច្ចប៉ុស្តិ៍ព្រែកប្រា ចុះមកធ្វើការសាកសួរ ដំណើររឿងហេតុ និងជួយទាក់ទងហៅរថយន្តសង្គ្រោះ យកអ្នកដែលសន្លប់យកទៅសង្គ្រោះនៅឯមន្ទីរពេទ្យ។
លោកនាយប៉ុស្តិ៍នគរបាលព្រែកប្រា បានឲ្យដឹងថា កម្លាំងសមត្ថកិច្ចនៃអធិការដ្ឋាននគរបាលខណ្ឌច្បារអំពៅ និងកម្លាំងអាវុធហត្ថខណ្ឌច្បារអំពៅ កំពុងធ្វើការសាកសួរជនប្រុសស្រី២នាក់ដែលសមត្ថកិច្ចស្លៀកពាក់ស៊ីវិលចាប់ដាក់ខ្នោះ៕ ដោយ ៖ បញ្ញាស័ក្តិ
