ខេត្តព្រះសីហនុ ៖ កម្លាំងនគរបាលសករុកព្រៃនប់ បានឲ្យដឹងថា កាលពីយប់ថ្ងៃទី១៦ ខែតុលា ឆ្នាំ២០១៨ វេលាម៉ោង ២០ និង៣០នាទី លោកវរសេនីយ៍ត្រី ហួរ យ៉ៃ អធិការរងនៃអធិការដ្ឋាននគរបាលស្រុកព្រៃនប់ បានដឹកនាំកម្លាំងចុះអនុវត្តដីកាបង្គាប់ឲ្យចាប់ខ្លួន-ឃុំខ្លួន ១ ច្បាប់លេខ២០៥ តព/១៧ ចុះថ្ងៃទី ០៥-១២-២០១៧ ដែលចុះហត្ថលេខាដោយ លោក គួន ចន្ថា ចៅក្រមស៊ើបសួរ នៃសាលាដំបូងខេត្តព្រះសីហនុ។
តុលាការ បានបង្គាប់ឲ្យចាប់ខ្លួន-ឃុំខ្លួន ឈ្មោះ ទុយ សំអាត ហៅ សេង សំអាត ភេទប្រុស អាយុ ២២ឆ្នាំ មុខរបរមិនពិតប្រាកដ មានទីលំនៅ ភូមិអូរឧកញ៉ាហេង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។ ហើយថា ការចាប់ខ្លួននេះ ពីបទអំពើលួចដោយមានស្ថានទម្ងន់ទោសដែលប្រព្រឹត្តនៅចំណុច ក្រុម២ ភូមិ ៦ សង្កាត់លេខ២ ក្រុង-ខេត្តព្រះសីហនុ កាលពីថ្ងៃទី ២០-១០-២០១៧។
សមត្ថកិច្ចឲ្យដឹងថា ជនសង្ស័យខាងលើនេះ ត្រូវនគរបាលចាប់ខ្លួននៅចំណុច ភូមិអូរឧកញ៉ាហេង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ក្រោយពីស្វែងរកអស់រយៈពេល១០ខែមកហើយ ព្រោះជនសង្ស័យរូបនេះ បានគេចទៅលាក់ខ្លួននៅក្រុងប៉ោយប៉ែត ខេត្តបន្ទាយមានជយ័៕ ដោយ ៖ ដែនសីមា
