ខេត្តព្រះសីហនុ ៖ កាលពីព្រឹកថ្ងៃទី១៦ ខែតុលា ឆ្នាំ២០១៨ម្សិលមិញ មានការភ្ញាក់ផ្អើលមួយកើតឡើង ដោយទាំងអ្នកគ្រប់គ្រង លោកគ្រូអ្នកគ្រូ និងសិស្សានុសិស្សជាច្រើននាក់ រៀននៅសាលាឡាយហ្វ៍ មានទីតាំងស្ថិតនៅក្នុងសង្កាត់លេខ៣ ក្រុងព្រះសីហនុ បានចេញមកតវ៉ាជំទាស់ ទៅចំពោះចំណាត់ការ របស់សាលាដំបូងខេត្តព្រះសីហនុ ដឹកនាំដោយ លោក រស់ សារាំ ព្រះរាជាអាជ្ញារងអមសាលាតំបូងខេត្តព្រះសីហនុ ដែលចុះបំពេញនីតិវិធីអនុវត្តន៍សាលក្រម វាស់វែងរកទីតាំងដីទំនាស់ នៅក្នុងបរិវេណសាលាឡាយហ្វ៍ រវាងឈ្មោះ ឈន វិច្ឆិកា និងឈ្មោះ ឃៀន ចន្ថា។ ការតវ៉ា របស់លោកគ្រូ អ្នកគ្រូ និងសិស្សានុសិស្ស នៅក្នុងបរិវេណសាលាឡាយហ្វ៍ ធ្វើឡើងតាមរយៈការបង្ហាញ នូវរបាយការណ៍ថា ទីតាំងដីសាលាខាងលើនេះ បានដំណើរការមានរយៈពេលជិត ២០ឆ្នាំមកហើយៗ ថែមទាំងមាន ប័ណ្ណកម្មសិទ្ធិស្របច្បាប់ថែមទៀតផង។
ជុំវិញបញ្ហានេះ មន្ត្រីសាលាដំបូងខេត្តព្រះសីហនុ បានពន្យល់ថា តាមបណ្តាញសង្គម Telegram ឲ្យបណ្តាញផ្សព្វផ្សាយដឹង កាលពីល្ងាចថ្ងៃទី១៦ ខែតុលា ឆ្នាំ២០១៨ថា ការពិតករណីខាងលើ គឺលោក រស់ សារាំ ព្រះរាជអាជ្ញារងរស់សាលាដំបូងខេត្តព្រះសីហនុ បានដឹកនាំកម្លាំងចម្រុះ ចុះអនុវត្តន៍សាល ក្រមស្ថាពរ ដែលទើបចូលជាស្ថាពរ ក្នុងឆ្នាំ២០១៨នេះ តាមនីតិវិធី ក្រោយពីភាគី ដែលអះអាងថា ជាម្ចាស់ដី បានតស៊ូក្តីតាមផ្លូវតុលាការជិត ២០ឆ្នាំកន្លងមក គឺបានប្តឹងគ្នាតាំងពីឆ្នាំ២០០៣មកម្ល៉េះ។
មហាជននៅក្រុងព្រះសីហនុ ដែលតាមដានរឿងនេះ បានស្នើសុំឲ្យអជ្ញាធរពាក់ពន្ធ័ទាំងអស់ ដោះស្រាយទំនាស់ជូនគូរភាគីឲ្យបានសមស្របប្រកបដោយគតិយុត្តិធម៌ ដើម្បីការពារផលប្រយោជន៍ របស់ម្ចាស់កម្មសិទ្ធិពិតប្រាកដ ដែលទទួលស្គាល់ដោយផ្លូវច្បាប់៕ ដោយ ៖ ដែនសីមា
