តាកែវ ៖ មន្ទីរពេទ្យភ្នែកខេត្តតាកែវ ទទួលពិនិត្យនិងព្យាបាលជំងឺជម្ងឺភ្នែកដោយមិនគិតថ្លៃរយៈពេល៣ថ្ងៃ ក្នុងឱកាសអបអរសាទរទិវាសុខភាពភ្នែកពិភពលោកនាព្រឹកថ្ងៃទី ១៧ តុលា ២០១៨នេះ នៅបរិវេណមន្ទីរពេទ្យភ្នែកខេត្ត ប្រធានមន្ទីរពេទ្យភ្នែកខេត្តតាកែវបានប្រកាសថាមន្ទីរពេទ្យភ្នែកខេត្តតាកែវ នឹងទទួលពិនិត្យជម្ងឺភ្នែកនិងព្យាបាលជំងឺដោយមិនគិតថ្លៃរយៈពេលបីថ្ងៃ ពោលគឺចាប់ពីថ្ងៃទី១៧ដល់ថ្ងៃទី១៩ ខែតុលាឆ្នាំ២០១៨។
លោក តែសរីបុណ្យ ប្រធានមន្ទីរពេទ្យភ្នែកខេត្តតាកែវបានអំពាវនាវឲ្យប្រជាពលរដ្ឋក្មេងចាស់ប្រុសស្រីនៅមូលដ្ឋាននានាក្នុងខេត្តនិងប្រជាពលរដ្ឋទូទៅ ប្រញាប់រួសរាន់មកពិនិត្យភ្នែកនិងព្យាបាលជំងឺភ្នែកឲ្យបានទាន់ពេល ព្រោះមន្ទីរពេទ្យភ្នែកខេត្តតាកែវ នឹងទទួលពិនិត្យជម្ងឺភ្នែកនិងព្យាបាលជំងឺដោយមិនគិតថ្លៃរយៈពេលបីថ្ងៃ ចាប់ពីថ្ងៃទី១៧ដល់ថ្ងៃទី១៩ខែតុលាឆ្នាំ២០១៧។
លោកបន្តថា យ៉ាងហោចណាស់ប្រជាពលរដ្ឋត្រូវមកទទួលការណែនាំពីក្រុមគ្រូពេទ្យជំនាញ ទាំងសេវារបស់រដ្ឋ និងសេវាផ្នែកឯកជន ឲ្យបានម្តង ក្នុងមួយឆ្នាំ ដើម្បីចៀសវាងពីការងងឹតភ្នែក ដោយសារការធ្វេសប្រហែស ឬ មិនដឹងពីភាពថែទាំសុខភាពភ្នែកឲ្យបានល្អ ខណៈអត្រាក្នុងការព្យាបាលជំងឺភ្នែកឲ្យជាសះស្បើយមានរហូតដល់៨០ភាគរយ និងពិបាកក្នុងការព្យាបាលឲ្យដាច់ស្រឡះមានត្រឹមតែ២០ភាគរយប៉ុណ្ណោះ។
លោកបន្ថែមថា ចាប់តាំងពីមន្ទីរពេទ្យភ្នែកបើកដំណើរការមកនេះ មន្ទីរពេទ្យភ្នែកខេត្តតាកែវបានទទួលពិនិត្យជម្ងឺភ្នែកជូនប្រជាពលរដ្ឋបានចំនួន ជាង៤៦ម៉ឺននាក់ ក្នុងនោះទទួលអ្នកជម្ងឺសម្រាកព្យាបាលបានចំនួន ៨០៩៨១នាក់ និងបានវះកាត់ភ្នែកបានចំនួន ៦៦៤៥៤នាក់ ។
ក្នុងចំណោមអ្នជំងឺទាំងនេះ មានជំងឺភ្នែកឡើងបាយ ជំងឺទឹកដក់ក្នុងភ្នែក ជំងឺភ្នែកមីញ៉ូប ជំងឺភ្នែកបណ្តាលមកពីអ្នកជំងឺកើតទឹកនោមផ្អែម ជាដើម ក៏ប៉ុន្តែសម្រាប់ជម្ងឺភ្នែកឡើងបាយ នោះគឺមានរហូតដល់ទៅ ៦៥ភាគរយហើយ ក្នុងចំណោមមុខជម្ងឺទាំងអស់ ហើយជម្ងឺនេះដែរទៀតសោតគឺភាគច្រើនកើតឡើងលើមនុស្សចាស់ ដែលមានវ័យចាប់ ៥០ឆ្នាំឡើងទៅ ។
លោក ញា ស៊ីថាន អនុប្រធានមន្ទីរសុខភិបាលខេត្តតាកែវ ក៏បានអំពាវនាវដល់បងប្អូនប្រជាពលរដ្ឋទាំងអស់ ត្រូវចេះថែរក្សាសុខភាពភ្នែក អោយបានល្អប្រសើរ ព្រោះកែវភ្នែកមានសារសំខាន់ណាស់ សម្រាប់មនុស្សគ្រប់រូប និងជាមធ្យោបាយ ក្នុងសង្គមប្រចាំថ្ងៃរបស់មនុស្សម្នាក់ៗ ។
លោកបញ្ជាក់ចុងក្រោយថា ៖ មនុស្សគ្រប់រូបត្រូវការចាំបាច់នូវកែវភ្នែកមួយដែលល្អភ្លឺស្វាង មើលឃើញនូវអ្វីៗនៅជុំវិញខ្លួន ពិសេសភ្នែករបស់យើងកើតមកពីធម្មជាតិ មានលក្ខណៈល្អប្រសើរ ។ ដូច្នេះយើងត្រូវតែចេះថែរក្សាសុខភាពភ្នែកអោយមានភាពល្អប្រសើរ តាមរយៈការទៅរកសេវាត្រួតពិនិត្យមើលដោយគ្រូពេទ្យ ជំនាញភ្នែក ការប្រើប្រាស់នូវឧបករណ៍ការពារភ្នែក រួមមានវ៉ែនតា ថ្នាំបណ្តក់ជាដើម ៕ ដោយ ៖ តាកែវ
