តាកែវ៖ ថ្លែងនៅក្នុងឱកាសអញ្ជើញបើកការដ្ឋានជួសជុលផ្លូវលំក្រាលគ្រួសសចំនួន២ខ្សែ ប្រវែងសរុប៥,៧០០ម៉ែត្រ សង្កាត់បារាយណ៍ ក្នុងក្រុងដូនកែវ នាព្រឹកថ្ងៃទី១៧ ខែតុលា ឆ្នាំ២០១៨ ឯកឧត្តម អ៊ូច ភា អភិបាលខេត្តតាកែវ បានមានប្រសាសន៍ដោយណែនាំទៅដល់អាជ្ញាធរមូលដ្ឋាន និងប្រជាពលរដ្ឋត្រូវរួមគ្នាធ្វើការទប់ស្កាត់កុំឲ្យរថយន្តប្រភេទធំៗបើកឆ្លងកាត់ចូលផ្លូវលំនេះ ព្រោះវាអាចបណ្តាលឲ្យផ្លូវឆាប់ខូច។
ឯកឧត្តម អ៊ូច ភា អភិបាលខេត្ត មានប្រសាសន៍បន្តថា ផ្លូវលំទាំង២ខ្សែដែលអាជ្ញាធខេត្តបើកដំណើរការការដ្ឋានជួសជុលនៅថ្ងៃនេះ វាជាកម្មសិទ្ធិរបស់យើងទាំងអស់គ្នា ដែលត្រូវរួមគ្នាថែរក្សា ការពារ និងជួសជុលឲ្យបានមាំ ដើម្បីផ្តល់ជាប្រយោជន៍ និងផ្តល់ភាពងាយស្រួលក្នុងការធ្វើដំណើរទៅមករបស់បងប្អូនប្រជាពលរដ្ឋនៅទីនេះ និងប្រជាពលរដ្ឋដែលឆ្លងកាត់ផ្លូវលំនេះ ជាពិសេសផ្លូវនេះវានិងធ្វើឲ្យដឹកជញ្ជូនកសិកផលរបស់បងប្អូនប្រជាកសិកទៅកាន់ទីផ្សារកាន់តែឆាប់រហ័សនិងមិនមានការយឺតយ៉ាវដូចពេលមុននោះទេ។
ឯកឧត្តមអភិបាលខេត្ត បន្ថែមទៀតថា អាជ្ញាធខេត្តតែងតែគិតគូពីសុខទុក្ខរបស់បងប្អូនប្រជាពលរដ្ឋនៅតាមមូលដ្ឋាន ដូចជាការតបញ្ដាញទឹក ភ្លើង ការជួសជុលផ្លូវនិងការផ្ដល់សេវាសាធារណៈឲ្យបានឆាប់រហ័សដល់ប្រជាពលរដ្ឋ។ ក៏ប៉ុន្តែពាក់ព័ន្ធទៅនិងការប្រើប្រាស់ផ្លូវសាធារណៈ គឺទាល់តែមានការចូលរួមពីបងប្អូនប្រជាពលរដ្ឋទើបការប្រើប្រាស់ផ្លូវនេះបានយូអង្វែង តាមរយៈការចូលរួមជួយទប់ស្កាត់កុំឲ្យរថយន្តធំដឹកលើសទម្ងន់បើកឆ្លងកាត់នាំឲ្យឆាប់ខូចផ្លូវ។
នៅក្នុងឱកាស់នោះឯកឧត្តមអភិបាលខេត្តតាកែវក៏បានធ្វើការណែនាំដល់អាជ្ញាធមូលដ្ឋាន ត្រូវយកចឹត្តទុកដាក់បំរើសេវាសាធារណៈជូនបងប្អូនប្រជាពលរដ្ឋឲ្យបានទាន់ពេលវេលា ម្យ៉ាងវិញទៀតត្រូវជួសជុលផ្លូវជាបន្ទាន់នៅពេលដែលផ្លូវខូចតិចតួច ជៀសវាងទុកឲ្យខូចធ្ងន់ធ្ងរ ដែលនាំអោយមានការរិះគន់ពីបងប្អូនប្រជាពលរដ្ឋនៅក្នុងមូលដ្ឋាន ៕ តាកែវ