ភ្នំពេញ ៖ គណៈប្រតិភូគណៈកម្មការមហាផ្ទៃ ការពារជាតិ និងមុខងារសាធារណៈ នៃរដ្ឋសភា ដឹកនាំដោយលោក ហ៊ុន ណេង ប្រធានគណៈកម្មការ បានអញ្ជើញចុះទៅជួបប្រជុំពិភាក្សាការងារជាមួយ លោកនាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិ នៅទីស្តីការក្រសួង ដើម្បីសិក្សាស្វែងយល់ពីការងាររបស់ក្រសួង នៅព្រឹកថ្ងៃទី១៧ ខែតុលា ឆ្នាំ២០១៨។
លោកនាយឧត្តមសេនីយ៍ នាង ផាត បានមានប្រសាសន៍ ជម្រាបជូនគណៈប្រតិភូ គណៈកម្មការមហាផ្ទៃ ការពារជាតិ និងមុខងារសាធារណៈ នៃរដ្ឋសភាថា បច្ចុប្បន្ននេះ ក្រសួងការពារជាតិ កំពុងតែមមាញឹកខ្លាំង ក្នុងការត្រៀមរៀបចំពិធីសម្ពោធវិមានអនុស្សាវរីយ៍នយោបាយឈ្នះ-ឈ្នះ និងអបអរសាទរខួបលើកទី២០ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកបដោយជោគជ័យនយោបាយឈ្នះ-ឈ្នះរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
លោកនាយឧត្តមសេនីយ៍ បានបន្តថា ក្រៅពីការងារត្រៀមរៀបចំពិធីសម្ពោធវិមានអនុស្សាវរីយ៍នយោបាយឈ្នះ-ឈ្នះ និងអបអរ សាទរខួបលើកទី២០ នៃការបញ្ចប់សង្គ្រាមស៊ីវិលនៅកម្ពុជា ក្រសួងការពារជាតិ បានយកចិត្តទុកដាក់ ក្នុងការបំពេញបេសកកម្ម ការងារជូនប្រទេសជាតិ មាតុភូមិ និងប្រជាពលរដ្ឋ ព្រមទាំងបានខិតខំពង្រឹងសមត្ថភាព កងយោធពលខេមរភូមិន្ទ ឲ្យមានសមត្ថភាពជំនាញខ្ពស់ ក្នុងការការពារប្រទេសជាតិ ឲ្យកាន់តែមានប្រសិទ្ធភាព គុណភាពខ្ពស់ស្របតាមការរីកចម្រើនរបស់ប្រទេសជាតិ។
ជាមួយគ្នានេះផងដែរ ក្រសួងការពារជាតិបានធ្វើការបណ្តុះបណ្តាល នាយទាហានសកម្ម ព្រមទាំងបញ្ជូននាយទាហានមួយចំនួនទៀត ទៅសិក្សានៅក្រៅប្រទេស មានដូចជា នៅសាធារណរដ្ឋសង្គមនិយមវៀតណាម សាធារណរដ្ឋប្រជាមានិតចិន និងបណ្តាប្រទេសផ្សេងៗទៀត ដើម្បីធ្វើការពង្រឹងសមត្ថភាព ដល់កងយោធពលខេមរភូមិន្ទ។
ទន្ទឹមនឹងនោះ កងយោធពលខេមរភូមិន្ទ នៅខាងសមរភូមិមុខ បានទទួលការឧបត្ថម្ភទាំងថវិកា សម្ភារៈ និងសេវាសុខភាព ហើយក៏មានការបង្កើតមន្ទីរពេទ្យ សម្រាប់កងយោធពលខេមរភូមិន្ទ ព្រមទាំងផ្តល់ដីសម្បទាន គ្រឿងសំណង់ ដល់ក្រុមគ្រួសារយោធិន និងបើកការប្រាក់បៀវត្សរ៍បានទាន់ពេលវេលា។
ក្នុងឱកាសនោះដែរ លោក ហ៊ុន ណេង បានថ្លែងកោតសរសើរ ដល់លោករដ្ឋលេខាធិការផ្ទាល់ និងថ្នាក់ដឹកនាំក្រសួងការពារជាតិ ទាំងអស់ ព្រមទាំងនាយទាហាន ពលទាហានទាំងអស់ ដែលខំយកចិត្តទុកដាក់ ក្នុងការបំពេញបេសកកម្មការងារ ជូនប្រទេសជាតិមាតុភូមិ និងប្រជាពលរដ្ឋ ព្រមទាំងបានខិតខំពង្រឹង សមត្ថភាពកងយោធពលខេមរភូមិន្ទ ឲ្យមានសមត្ថភាពជំនាញខ្ពស់ ក្នុងការការ ពារប្រទេសជាតិ ឲ្យកាន់តែមានប្រសិទ្ធភាព ស្របតាមការរីកចម្រើនរបស់ប្រទេសជាតិ ។
ជាមួយគ្នានេះដែរ លោក ហ៊ុន ណេង ក៏បានសម្តែងនូវការអរគុណ ថ្នាក់ដឹកនាំក្រសួងទាំងអស់ ដែលបានសហការ ជាមួយគណៈកម្មការជំនាញ នៃរដ្ឋសភាបានល្អរហូតមក ដូចជា ការផ្តល់របាយការណ៍អំពីលទ្ធផល នៃការអនុវត្តការងាររបស់អង្គភាពនីមួយៗ និងការចាត់តាំងថ្នាក់ដឹកនាំចូលរួមប្រជុំទ្វេភាគី ពហុភាគីលើកិច្ចការជំនាញ និងការចូលរួមក្នុងពិធីផ្សេងៗ ដែលពាក់ព័ន្ធកិច្ចការ ទទួលខុសត្រូវរបស់គណៈកម្មការ៕ ដោយ៖បញ្ញាស័ក្តិ
