នោះគឺជាសំណង់ថ្មីសុទ្ធសាធ ថែមទាំងពុំទាន់សម្ភោធនៅឡើយនាប្រទេសចិន តែបែរជាដួល “ថ្មោល” ក្នុងមួយប៉ប្រិចភ្នែក ទើបគេកាន់តែពិបាកយល់ ។
ប្រជាពលរដ្ឋរស់នៅក្បែរនោះ បាននាំគ្នារត់ចេញប្រសាច ខ្លះទៀតឈរធ្មឹងសំឡឹងមើលវា “ទម្លាក់ខ្លួន” ចុះមកដីប្រែកាយជាធូលី ។ វាហាក់ពុំមែនជាអគារ “កប់ពពក” ឡើយ ព្រោះស្រដៀងនឹងល្បែងក្មេងលេងជាង ។
គេនៅពុំទាន់ដឹងពីមូលហេតុធ្វើឲ្យដួលរលំនៅឡើយ ។ តែប៉ុន្មានវិនាទីប៉ុណ្ណោះ ដោយគ្មានរង្គើរជាមុន គឺប្រៀបដូចជាគ្មានគ្រឹះអីចឹង ។ រហូតទល់ពេលនេះ គេនៅពុំទាន់ស្ថិតិបានពីទំហំនៃការខូចខាត រួមទាំងអ្នកស្លាប់ និងរបួស ។
មុននេះនៅចិន ក៏គេធ្លាប់ឃើញហេតុការណ៍ “ស្រស់ៗ”បែបនេះដែរ ។ លេចធ្លោជាងគេគឺអគារខ្ពស់៣ នៅទីក្រុង Wenzhou ខេត្ត Zhejiang ដែលបានដួលរលំបន្តបន្ទាប់គ្នានៅព្រឹកថ្ងៃទី ២ ខែកុម្ភៈ ឆ្នាំ ២០១៧ ។
មុននោះទៀត កាលពីខែតុលា ឆ្នាំ ២០១៦ មានរបាយការណ៍មួយដែលកាសែត Wenzhou បានចុះផ្សាយពេលនោះឲ្យដឹងថា មានអគារដល់ទៅជាង ១.៤០០ខ្នង នៅទីក្រុងនេះ ពុំមានសុវត្ថិភាព គួរតែត្រូវជួសជុលឡើងវិញ ឬកម្ទេចចោលតែម្តង ។
បែបនេះអ្នកណាហ៊ានទិញអគារកប់ពពក រស់នៅទៀត បើសុទ្ធតែរបៀបនេះនោះ ៕ ចន្ទ្រា