បុរសម្នាក់ដែលគេស្គាល់ថាជាម្ចាស់ហាង «ម៉ែក្មេកហេងហេង BBQ សាច់អាំង និងស៊ុប» ត្រូវបានរថយន្តយីឌុប១គ្រឿងបុក និងកិនស្លាប់ នៅមុខហាងរបស់គាត់តែម្តង ស្ថិតក្នុងភូមិចុងអាង ស្រុកស្វាយអន្ទរ ខេត្តព្រៃវែង កាលពីវេលាម៉ោងប្រហែលជាង ៦ ព្រឹកថ្ងៃទី១៦ ខែតុលា ឆ្នាំ២០១៨ ។
ជុំវិញករណីដ៏ឲ្យរន្ធត់នេះ បើតាមប្រភពជាច្រើនបានអះអាងថា ជនរងគ្រោះមានឈ្មោះ ឆាយ ផានិត អាយុ ៣០ ឆ្នាំ រស់នៅភូមិកណ្តាច់ ឃុំចុងអំពិល ស្រុកកញ្ច្រៀច បានសម្រេចចិត្តធ្វើអត្តឃាតរត់ឆ្លងផ្លូវឲ្យឡានបុកស្លាប់ ព្រោះតែខូចចិត្តនឹងប្រពន្ធដ៏ស្រស់ស្អាតរបស់គាត់ចុះចោល ។
យ៉ាងណាមិញ ក្រោយពេលសារព័ត៌មានជាច្រើនបានចុះផ្សាយអំពីករណីខាងលើនេះ ស្រាប់តែពេលនេះ គណនីហ្វេសប៊ុកឈ្មោះ «កូន ខ្លាតូច» បានសរសេរបង្ហោះអះអាងយ៉ាងដូច្នេះថា៖ «អាណិតណាស់ ការពិតគាត់ដើរឆ្លងថ្នល់ទៅទិញអីញ៉ាំ គាប់ជួនឡាននុះវាបើកឡើនមកដល់ចំនុចហ្នឹងក៏បុកគាត់តែម្តងទៅ គ្មានរឿងប្រពន្វរត់ចោលអីទេ សុំកុំយល់ច្រឡំអី ព្រោះប្រពន្វសពកំពុងសំរាកព្យាបាលភ្នែកនៅឯប្រទេសថៃ ទុក្ខជាន់លើទុក្ខអាណិតណាស់ សុំអោយឆាប់ជាសះស្បើយផង??» ។
ទន្ទឹមនោះផងដែរ អ្នកលេងអ៊ីនធើរណែតជាច្រើនបានផ្ទុះកំហឹងនឹងសារព័ត៌មាន ចេះតែសរសេរតាមតៗគ្នាគ្មានមូលដ្ឋានច្បាស់ និងធ្វើឲ្យខូចកិត្តិយសប្រពន្ធរបស់សពដែលកំពុងសម្រាកព្យាបាលជំងឺក្នុងមន្ទីរពេទ្យរាប់មកហើយ ។ អ្នកលេងហ្វេសប៊ុកម្នាក់និយាយថា៖ «ចង្គៀងផ្ទះអ្នកណាភ្លឺផ្ទះអ្នកនឹងហើយបងប្អូន ហើយមួយទៀតទះដៃតែម្ខាងក៍មិនលឺដែរចឹងអ្នកសសេរនឹងដូចគ្នាបើគ្រាន់តែលឺតពីគេទេកុំធ្វើចេះរឿងគេ ខាងស្រីគេទុក្ខជាន់ទុកហើយភ្នែកគ្នាព្យាបាលអស់លុយបុិនណាក៍មិនដឹងថាជារឺអត់បានត្រឹមទប់ស្តាត់មេរោគ ខ្លួនឯងចេញពីពេទ្យមិនទាន់បាមប៉ុន្មានផងកូនស្រីជាទីស្រលាញ់ឈឺ បន្ទាប់ពីនឹងមកប្តីចឹងទៀត សួរថាអ្នកណាយល់អារម្មណ៍នឹង ???» ៕
ដោយ៖ ឧត្តម