ប្រធានាធិបតីរុស្ស៊ី Putin បានចេញបទបញ្ជា បញ្ជូនកងទ័ពទៅកាន់ព្រំដែនជាប់កូរ៉េខាងជើងភ្លាមៗ បន្ទាប់ពីមេដឹកនាំកូរ៉េខាងជើង Kim Jong-Un បានបញ្ជាឲ្យសាកល្បង កាំជ្រួចថ្មីបំផុតអាចរត់ទៅដល់ប្រទេសអាមេរិក។
នៅថ្ងៃទី ២៩/១១ កូរ៉េខាងជើងបានបាញ់បង្ហោះកាំជ្រួចអន្តរទ្វីប Hwasong-15 ដែលរយៈចម្ងាយអាចគ្របដណ្តប់លើប្រទេសអាមេរិកទាំងមូល។ ទង្វើញុះញង់នេះ កំពុងនាំឲ្យកើតកង្វល់ពីការផ្ទុះសង្គ្រាមនៅឧបទ្វីបកូរ៉េ ហើយតាមរយៈនោះ វាអាចឈានទៅដល់សង្គ្រាមលើកទី ៣ ផងដែរ។
តាមកាសែតអង់គ្លេស Daily Star ចុះផ្សាយថ្ងៃទី ០១/១២ ថ្វីត្បិតរុស្ស៊ីជាភាគីមានទស្សនៈ “រឹង” តែរុស្ស៊ីក៏បានប្រតិកម្ម តាមរយៈការដាក់ពង្រាយកងទ័ពទៅកាន់តំបន់ព្រំដែនជាប់គ្នានឹងកូរ៉េខាងជើង។
តាម Newsweek វិញ ទាហានថ្មើរជើង ចំណុះទ័ពជើងទឹករុស្ស៊ីកំពុងអនុវត្តមេរៀនសមយុទ្ធចុះចតនៅកូរ៉េខាងជើងក្រោយពេលប្រទេសនេះបាញ់កាំជ្រួចអន្តរទ្វីប។
កងថ្មើរជើង ជើងទឹករបស់រុស្ស៊ីប្រកាសថា នេះជាសមយុទ្ធ “ការពង្រាយទ័ពបង្ការការវាយលុកនៅភាគខាងជើង”។
នេះពុំមែនជាលើកទី១ទេ ដែលរុស្ស៊ីបញ្ជូនទ័ពមកកាន់ព្រំដែននេះ។ កាលពីខែ ៩/២០១៧ ក្រោយពេលកូរ៉េខាងជើងបាញ់បង្ហោះកាំំជ្រួចនោះ កងទ័ពរុស្ស៊ីក៏ត្រូវបានបញ្ជូនមកកាន់ទីនេះដែរ។
ស្របពេលជាមួយគ្នានេះ កាសែតរុស្ស៊ី RIA Novosti បាននាំពាក្យលោក Nicolai Patrushev ប្រធានក្រុមប្រឹក្សាសន្តិសុខជាតិរុស្ស៊ីឲ្យដឹងថា ៖ “រុស្ស៊ីកំពុងគិតគូរ ហើយមានការត្រៀមទុក។ រឿងនេះ ពុំមានអ្វីធ្វើឲ្យខ្ញុំភ្ញាក់ផ្អើលទេ។ ពុំអាចរំលងចោលការផ្ទុះសង្គ្រាមឡើយ ហើយទោះតម្លៃណាក៏ដោយ យើងត្រូវទប់ស្កាត់វា”។
តាមលោក Patrushev គឺ ៖ “ប្រសិនមានប្រតិបត្តិការយោធា ប្រទេសមួយចំនួនណានោះ -ពុំអាចរំលងចោលរឿងនេះ នឹងបង្កហេតុផ្សេងៗ ហើយខ្លះវានឹងជះឥទ្ធិពលដល់យើងខ្ញុំ”។ ប៉ុន្តែតាមមេទ័ពរូបនេះគឺ “ដំណោះស្រាយនយោបាយ គឺជាវិធីតែមួយគត់សម្រាប់ស្រាយវិបត្តិនេះ”៕ សូយន
