កណ្ដាល ៖ ក្រុមជនសង្ស័យ ជាមុខសញ្ញាប្រើប្រាស់គ្រឿងញៀន៣នាក់ ត្រូវបាននគរបាលស្រុកកៀនស្វាយ សហការជាមួយនគរបាលស្រុកបាធាយ ធ្វើការចាប់ខ្លួន និងថ្នាំញៀនចំនួន១៧កញ្ចប់ ត្រូវបានធ្វើការដកហូត បន្ទាប់ពីក្រុមជនសង្ស័យ បែកគំនិតចូលគាស់កុដិព្រះសង្ឃ លួចយកលុយជាង ៣លានរៀល ទៅទិញថ្នាំញៀន ដើម្បីប្រើប្រាស់និងចែកចាយបន្ដ ។ ករណីខាងលើនេះ បានកើតឡើងកាលពីថ្ងៃទី១៥ ខែតុលា ឆ្នាំ ២០១៨ វេលាម៉ោង១១និង០៥នាទី ត្រង់ចំណុចវត្តជ័យឧត្តម ស្ថិតក្នុងភូមិជ័យឧត្តម ឃុំសំរោងធំ ស្រុកកៀនស្វាយ ខេត្តណ្តាល ។
មន្ដ្រីនគរបាលស្រុកកៀនស្វាយ បានឲ្យដឹងថា ក្រុមជនសង្ស័យចាប់ខ្លួនបានមានគ្នា៣នាក់ ទី១-ឈ្មោះ ខេង រ័ត្នពិសី ភេទប្រុស អាយុ១៩ឆ្នាំ មុខរបរ មិនពិតប្រាកដ មានទីលំនៅភូមិចក ឃុំចក ស្រុកបាធាយ ខេត្កំពង់ចាម ទី២-ឈ្មោះ វង ប៊ុនធឿន ភេទប្រុស អាយុ១៧ឆ្នាំ មុខរបរមិនពិតប្រាកដ មានទីលំនៅភូមិត្បូងភ្នំ ឃុំតាំងក្រាំង ស្រុកបាធាយ ខេត្តកំពង់ចាម និងទី៣-ឈ្មោះ ចាន់ ភេទប្រុស អាយុ១៧ឆ្នាំ ជនជាតិខ្មែ មុខរបរមិនពិតប្រាកដ មានទីលំនៅភូមិ ជើងឆ្នុក ឃុំតាំងក្រាំង ស្រុកបាធាយ ខេត្តកំពង់ចាម ។ ចំណែកជនរងគ្រោះឈ្មោះ យុង ស៊ឹម ភេទប្រុស អាយុ៥២ឆ្នាំ ជនជាតិខ្មែរ មុខរបរជា គណៈកម្មាការវត្ដជ័យឧត្ដម មានទីលំនៅភូមិជ័យឧត្ដម ឃុំសំរោងធំ ស្រុកកៀនស្វាយ ខេត្ដកណ្ដាល ។ ដោយឡែកវត្ថុតាងបាត់បង់រួមមាន៖ប្រាក់រៀលចំនួន ៣.៤០០.០០០រៀល និងប្រាក់ដុល្លារចំនួន៧០ដុល្លារសហរដ្ឋអាមេរិក រីឯវត្ថុតាងដកហូតបានមកវិញ មានថ្នាំញៀនចំនួន១៧កញ្ចប់ និងឧបករណ៍សម្រាប់វេចខ្ចប់ និងប្រើប្រាស់គ្រឿងញៀន មួយចំនួនទៀតផងដែរ ។
ប្រភពដដែលបន្ដថា នៅមុនពេលកើតហេតុ ជនរងគ្រោះឈ្មោះ យុង ស៊ឹម ជាគណៈកម្មាការវត្ដជ័យឧត្ដម បានចេញពីកុដិ រួចដើរទៅលើសាលាធម្មសភា ដែលមានចម្ងាយពីកុដិប្រហែល៦០ម៉ែត្រ ក្នុងគោលបំណងទៅហូបបាយ លុះពេលហូបរួច ក៏ជនរងគ្រោះ បានមកអង្គុយជជែកលេង ជាមួយលោកគ្រូចៅអធិការវត្ដ បានមួយសន្ទុះ ក៏ត្រឡប់ទៅកុដិវិញ ខណៈចាក់សោចូលកុដិ ក៏ស្រាប់តែឃើញអីវ៉ាន់ នៅក្នុងកុដិរាយប៉ាយពេញលើពូកដេក ហើយបង្អួចចំហៀងខាងកើត មានស្នាមគាស់ ភ្លាមនោះ ទៅមើលលុយដែលជនរងគ្រោះទុក ក្រោមខ្នើយស្រាប់តែបាត់អស់រលីង ។ បន្ទាប់មករាយការណ៍ជូនសមត្ថកិច្ច ប៉ុស្តិ៍នគរបាលរដ្ឋបាលសំរោងធំ ដើម្បីធ្វើការស្វែងរកជនសង្ស័យ ដើម្បីចាត់ការតាមច្បាប់ ។
ក្រោយពីទទួលបានព័ត៌មានភ្លាម កម្លាំងប៉ុស្តិ៍បានចុះដល់កន្លែងកើតហេតុ រួចកំណត់មុខសញ្ញាច្បាស់ថា ជនសង្ស័យគេចខ្លួន ទៅនៅភូមិជើងឆ្នុក ឃុំតាំងក្រាំង ស្រុកបាធាយ ខេត្តកំពង់ចាម ។ ដោយទទួលបានបទបញ្ជាពីលោក ឧត្ដមសេនីយ៍ទោ អ៊ាវ ចំរើន ស្នងការនគរបាលខេត្ដកណ្ដាល និងលោកឧត្ដមសេនីយ៍ត្រី រឿន ណារ៉ា ស្នងការរងទទួលផែនការងារព្រហ្មទណ្ឌ និងមានការសម្របសម្រួល ពីលោកព្រះរាជអាជ្ញាអមសាលាដំបូងខេត្តកណ្តាល និងខេត្តកំពង់ចាម កម្លាំងជំនាញ និងកម្លាំងប៉ុស្តិ៍នគរបាលរដ្ឋបាលសំរោងធំ សហការជាមួយកម្លាំងនគរបាលស្រុកបាធាយ បានឃាត់ខ្លួនជនសង្ស័យទាំងបីនាក់បញ្ជូន មកអធិការដ្ឋាននគរបាលស្រុកកៀនស្វាយ ដើម្បីកសាងសំណុំរឿងចាត់ការតាមនីតិវិធីច្បាប់ ។
នៅចំពោះមុខសមត្ថកិច្ច ជនសង្ស័យ បានឆ្លើយសារភាពថា៖ ខ្លួនពិតជាបានធ្វើសកម្មភាព គាស់កុដិព្រះសង្ឃ លួចយកប្រាក់ប្រាកដមែន ហើយបានយកប្រាក់ចំនួន១០ម៉ឺនរៀល ទៅទិញថ្នាំញៀនសម្រាប់ទុកប្រើប្រាស់ និងចែកចាយបន្ដ ៕ ដោយ ៖ បញ្ញាស័ក្តិ