ភ្នំពេញ ៖ លោកស្រីTina Redshawឯកអគ្គរាជទូតអង់គ្លេស បានស្វាគមន៍ចំពោះសំណូមពររបស់រដ្ឋមន្ត្រី ត្រាំ អ៊ីវតឹក ក្នុងការផ្តល់ដោយផ្ទាល់ នូវអ្នកជំនាញ ដើម្បីជួយការបណ្តុះបណ្តាលលើវិស័យ ICT និងការអភិវឌ្ឍកម្មវិធីសិក្សា បង្កើនធនធានមនុស្ស ឱ្យចេះជំនាញបច្ចេកវិទ្យាគមនាគមន៍ និងព័ត៌មាន និងជំនាញទូរគមនាគមន៍ ឲ្យកាន់តែច្រើនឡើង។
នៅព្រឹកថ្ងៃពុធទី១៧ ខែតុលា ឆ្នាំ២០១៨ លោក ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានអនុញ្ញាតឱ្យលោកស្រី Tina Redshaw ឯកអគ្គរាជទូតនៃចក្រភពអង់គ្លេស ប្រចាំនៅព្រះរាជាណាចក្រកម្ពុជា ដែលទើបទទួលតំណែងថ្មី ចូលជួបសម្ដែងការគួរសម និងពិភាក្សាកាងារនៅទីស្ដីការក្រសួង។ ក្នុងជំនួបនេះ លោករដ្ឋមន្ត្រី បានបង្ហាញគោលជំហរក្នុងការគាំទ្រ លោក Malcom Johnson ជាបេក្ខភាពសម្រាប់ចូលរួមការបោះឆ្នោតជាអគ្គលេខាធិការរងរបស់ ITU ក្នុងឱកាសសន្និសីទពេញអង្គរបស់ ITU ដែលនឹងប្រព្រឹត្តទៅនៅទីក្រុងឌូបៃ សហភាពអារ៉ាប់អេមីរ៉េត ពីថ្ងៃទី២៩ ខែតុលា ដល់ថ្ងៃទី១៦ ខែវិច្ឆិកា ឆ្នាំ២០១៨ ខាងមុខនេះ។
លោករដ្ឋមន្ត្រីក៏បានមានប្រសាសន៍អំពីការវិវឌ្ឍ នៃវិស័យប្រៃសណីយ៍ ទូរគមនាគមន៍ និង ICT នៅកម្ពុជា ពិសេសការរៀបចំនូវគោលនយោបាយ កំណែទម្រង់ក្នុងការអភិវឌ្ឍវិស័យ ប្រៃសណីយ៍ ទូរគមនាគមន៍ និង ICT នៅកម្ពុជាឱ្យកាន់តែរីកចម្រើនឡើង ស្របតាមស្ថានភាពវិវឌ្ឍន៍ជាក់ស្តែង និងឆាប់រហ័សនៃបច្ចេកវិទ្យា។ លោករដ្ឋមន្ត្រីក៏បានសំណូមពរ ដល់លោកស្រីឯកអគ្គរាជទូតអង់គ្លេស ក្នុងការផ្តល់កិច្ចសហការ ទៅលើផ្នែកបណ្តុះបណ្តាលដល់សិស្សនិស្សិត ដែលកំពុងសិក្សានៅវិទ្យាស្ថានជាតិ NIPTICT ដើម្បីបង្កើនធនធានមនុស្ស ឱ្យចេះជំនាញបច្ចេកវិទ្យាគមនាគមន៍ និងព័ត៌មាន និងជំនាញទូរគមនាគមន៍ អោយកាន់តែច្រើនឡើង ស្របតាមយុទ្ធសាស្ត្រចតុកោណតំណាក់កាលទី៤ របស់រាជរដ្ឋាភិបាលកម្ពុជា ក្នុងការត្រៀមខ្លួនសម្រាប់សេដ្ឋកិច្ចឌីជីថល និងបដិវត្តន៍ឧស្សាហកម្មជំនាន់ទី៤។
លោកស្រីឯកអគ្គរាជទូត បានស្វាគមន៍ចំពោះសំណូមពរនេះ នឹងសិក្សាលើលទ្ធភាព ក្នុងការផ្តល់ដោយផ្ទាល់ នូវអ្នកជំនាញ ដើម្បីជួយការបណ្តុះបណ្តាលលើវិស័យ ICT និងការអភិវឌ្ឍកម្មវិធីសិក្សា ទៅដល់វិទ្យាស្ថានជាតិ NIPTICT ៕ ដោយ ៖ កូឡាប
