កំពង់ស្ពឺ ៖ ថ្ងៃទី១៨ ខែតុលា ឆ្នាំ២០១៨ ក្រោមកិច្ចសហការពីក្រុមហ៊ុន សាប្រ៊ីណា លោក ឧត្តមសេនីយ៍ឯក ថោង សុគន្ធា អគ្គលេខាធិការ ស្តីទីអាជ្ញាធរជាតិប្រយុទ្ធប្រឆាំងគ្រឿងញៀន បានដឹកនាំក្រុមការងារចុះផ្សព្វផ្សាយ ពីបញ្ហានានាដែលកើតពីឥទ្ធិពលនៃគ្រឿងញៀន ដល់បុគ្គលិក កម្មករ និយោជិក ចំនួនជិត២០០នាក់ ។
លោកស្រីតាន់ ដាវី តំណាងក្រុមហ៊ុន បានមានប្រសាសន៍ស្វាគមន៍ និងបញ្ជាក់ពីការសប្បាយរីករាយ ចូលរួមអនុវត្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ជាមួយរាជរដ្ឋាភិបាល ដើម្បីបង្ការទប់ស្កាត់បញ្ហាគ្រឿងញៀន ហើយទីតាំងក្រុមហ៊ុនរបស់លោកស្រី មិនមែនជាទីតាំងរក្សាទុក ដាំដុះ ផលិត ចែកចាយ ជួញដូរ និងប្រើប្រាស់គ្រឿងញៀនឡើយ។
ក្នុងឱកាសនោះលោក ឧត្តមសេនីយ៍ឯក ថោង សុគន្ធា អគ្គលេខាធិការស្តីទី បានមានប្រសាសន៍សាទរ នូវការរីកចម្រើនលើសង្វាក់ផលិតកម្ម របស់ក្រុមហ៊ុន និងអរគុណដល់ក្រុមហ៊ុនដែលបានបង្កើតការងារ ជូនប្រជាពលរដ្ឋ រហូតដល់ទៅជាង៦០០០កន្លែង ហើយបានគិតគូរដល់សុខភាព របស់បងប្អូនយើងជាបុគ្គលិក កម្មករ និយោជិកដើម្បីពួកគេទទួលបានចំណេះដឹងដោយមិនទៅជិត មិនប៉ះពាល់គ្រឿងញៀន និងចូលរួមផ្សព្វផ្សាយបន្ត ដល់ក្រុមគ្រួសារនិងមនុស្សជាទីស្រលាញ់កុំឲ្យធ្លាក់ចូលទៅក្នុងអន្ទាក់ នៃគ្រឿងញៀន។
ក្នុងឱកាសនោះដែរ លោក ឧត្តមសេនីយ៍ឯក ថោង សុគន្ធា បានបន្ថែមថា ការប្រើគ្រឿងញៀនពិតណាស់ គឺបំផ្លាញខ្លួនឯង ក្រុមគ្រួសារ និងសង្គមជាតិ ហើយការមិនទៅប្រើគ្រឿងញៀនគឺស្រឡាញ់ខ្លួនឯង ស្រឡាញ់គ្រួសារ និងស្រលាញ់ជាតិ។
ជាមួយគ្នានេះ លោក ឧត្តមសេនីយ៍ឯក ថោង សុគន្ធា បានលើកយកមកបង្ហាញនូវ អ្វីទៅជាគ្រឿងញៀន ឥទ្ធិពលផលវិបាកនៃការប្រើគ្រឿងញៀន និងវិធីឆ្លើយតបទៅនឹងបញ្ហាគ្រឿងញៀន និងមាត្រាសំខាន់ៗ នៃច្បាប់ស្តីពីការត្រួតពិនិត្យគ្រឿងញៀន៕ ដោយ ៖ បញ្ញាស័ក្តិ
