ក្រឡេកមួយភ្លែត នោះអ្នកប្រាកដជាគិតថាជាកីឡាជាមួយភក់តែម្តង ប៉ុន្តែ ផ្ទុយទៅវិញ វាពិតជាគួរឲ្យអាណិតផង និងគួរឲ្យហួសចិត្តផង ដែលបុរសថៃម្នាក់នេះបានធ្លាក់ចូលក្នុងភក់សមុទ្រ នៅពេលដែលគាត់ទើបតែបង្ហើយស្រាអស់កន្លះដប ខណៈពេលរត់ហាត់ប្រាណនៅពេលព្រឹក ស្ថិតនៅភាគខាងកើតនៃប្រទេសថៃ ។
ហេតុការណ៍ដ៏គួរឲ្យភ្ញាក់ផ្អើលនេះ បានកើតឡើងនៅលើផ្នែកភក់មួយនៃឆ្នេរសមុទ្រមួយក្នុងខេត្ត Chonburi កាលពីវេលាម៉ោង ៥ និង ០០ នាទីព្រឹកថ្ងៃទី១៧ ខែតុលា ឆ្នាំ២០១៨ ។
បុរសរូបនោះមានឈ្មោះ Sompong Singsita អាយុ ៣២ ឆ្នាំ បានធ្លាក់ចូលភក់សមុទ្រ បន្ទាប់ពីបានផឹកស្រាអស់កន្លះដប ជាមួយមិត្តភក្តិរបស់គាត់ឈ្មោះ Songka Kamsang ដែលបន្ទាប់មកប្រញាប់ប្រញាល់ស្វែងរកជំនួយសង្គ្រោះ ។
នៅពេលហេតុការណ៍បានកើតឡើង Singsita មានអារម្មណ៍ចង់ហាត់ប្រាណខ្លះៗ បន្ទាប់ពីផឹកស្រារួច ដូច្នេះ គាត់ក៏បានចាប់ផ្តើមរត់តែម្តង ។
ក្នុងវីដេអូដែលថតដោយសារព័ត៌មានក្នុងស្រុក Channel 9, Singsita ត្រូវបានឃើញគ្របដណ្តប់ជាមួយភក់ពេញខ្លួន និងពុំអាចរើខ្លួនបានទេ ។
បុរសស្រវឹងរូបនេះបាននិយាយនៅមុនពេលទាមទារសុំបារីជក់ដំបូងថា៖ «ខ្ញុំមិនអីទេ ប៉ុន្តែគ្រាន់តែកម្រើកខ្លួនពុំរួចប៉ុណ្ណោះឯង» ។
ទុក្ខលំបាករបស់ Singsita ត្រូវបានដឹងថា បានអូសបន្លាយអស់រយៈពេល១ម៉ោង មុនពេលក្រុមសង្គ្រោះមកដល់ និងទាញគាត់ចេញពីភក់ដោយសុវត្ថិភាព ។
បុរសរូបនេះបានប្រាប់អ្នកសារព័ត៌មានបន្ទាប់ត្រូវបានសង្គ្រោះថា៖ «ខ្ញុំកំពុងជក់បារី និងដើរបោះជំហានខុស បណ្តាលឲ្យធ្លាក់ចូលភក់បែបនេះតែម្តង ស្រវឹង…!!» ៕
ដោយ៖ ឧត្តម
ប្រភព៖ nextshark