ស្ត្រីម្នាក់នៅក្នុងប្រទេសចិន កាលពីពេលថ្មីៗនេះ បានធ្វើឲ្យគេគ្រប់គ្នាភ្ញាក់ផ្អើល និងរន្ធត់ចិត្តយ៉ាងខ្លាំង ដែលពុំនឹកស្មានដល់ថានាងបានសម្រេចិត្តសម្លាប់ខ្លួនឯង និងកូនៗ២នាក់របស់នាងយ៉ាងដូច្នេះសោះ បន្ទាប់ពីបានដឹងថាប្តីជាទីស្រលាញ់របស់នាងបាន «ស្លាប់» ចោល ។ ប៉ុន្តែ រឿងរ៉ាវដ៏គួរឲ្យសោកស្តាយនេះ ក្រោយមកត្រូវបានដឹងថា ប្តីរបស់នាងពិតជាមានសុខភាពល្អ និងនៅមានជីវិតនៅឡើយ ។
យោងតាម Shanghaiist បុរសជាប្តីរូបនោះ ត្រូវបានគេរាយការណ៍ឲ្យដឹងថា គាត់បានបង្កើតរឿង «ស្លាប់» ក្លែងក្លាយ ប៉ុន្តែ ខុសខ្លួនដែលពុំបានផ្តល់ព័ត៌មានអំពីរឿងប្រឌិតនេះដល់គ្រួសាររបស់គាត់បានដឹងច្បាស់ ។
ប្តីរបស់នាងឈ្មោះ He អាយុ ៣៤ ឆ្នាំ បានធ្វើជា «ស្លាប់» ដោយសារតែគាត់ចង់ទទួលបានលុយពីគោលនយោបាយធានារ៉ាប់រងរបស់គាត់ បន្ទាប់ពីខ្លួនឯងគាត់លង់ខ្លួនជំពាក់បំណុលគេដោះពុំរួច ។
នេះនែ៎គឺជាដំណើរឿងដែលនាំឲ្យគាត់គិតធ្វើជា «ស្លាប់» កើតឡើង៖ គាត់បានខ្ចីគេ១គ្រឿង កាលពីថ្ងៃទី១៩ កញ្ញា និងធ្វើជាបើកវាជួបគ្រោះថ្នាក់ចូលទៅក្នុងទន្លេ Zijiang ក្នុងស្រុក Xihua ។ ក្រុមស៊ើបអង្កេតចុងក្រោយ បានរកឃើញរថយន្តនោះ ប៉ុន្តែ ពុំរកឃើញសាកសពរបស់គាត់ សម្រាប់ហេតុផលជាក់ស្តែងនោះទេ ។
៣សប្តាហ៍ បន្ទាប់ពីសារព័ត៌មានអំពីការស្លាប់របស់គាត់ផ្ទុះឡើង ប្រពន្ធរបស់គាត់ឈ្មោះ Dai ដែលត្រូវបានឃើញនៅក្នុងកាមេរ៉ាសន្តិសុខ បានដើរជាមួយកូនស្រីអាយុ ៣ ឆ្នាំ និងកូនប្រុសអាយុ ៤ ឆ្នាំ ទៅកាន់ទឹកត្រពាំងមួយក្បែរភូមិរបស់ពួកគេ ។ នាងបានចងដៃរបស់ពួកគេ និងចាប់ផ្តើមរុញពួកគេចូលក្នុងទឹក បណ្តាលឲ្យលង់ស្លាប់ទាំងពីរគួរឲ្យអាសូរ ហើយនាងបន្ទាប់មក ក៏បានលោតចូលក្នុងទឹកសម្លាប់ខ្លួនតាមក្រោយកូនៗរបស់នាងតែម្តង ។
មុនពេលប៉ុនប៉ងធ្វើអត្តឃាត នាងត្រូវបានគេរកឃើញថា បានចំណាយពេលបង្ហោះលិខិតធ្វើអត្តឃាតមួយ នៅលើគណនី WeChat របស់នាងផងដែរ ។
នាងបានបញ្ជាក់នៅក្នុងលិខិតនោះថា នាងត្រូវបានចោទប្រកាន់ដោយគ្រួសារប្តីរបស់នាង ដែលជាអ្នកនាំឲ្យប្តីរបស់នាងស្លាប់បែបនេះ ដោយពួកគេបានស្តីបន្ទោសឲ្យនាងថាខ្ជិល, ឡប់ៗ និងខ្ជះខ្ជាយលុយកាក់ច្រើនគ្មានចេះគិតទេ ។ ដោយសារតែនាងពុំអាចទ្រាំទ្រនឹងបន្ទុកនេះលែងបាន ហេតុដូច្នេះ នាងតែងបាត់បង់ឆន្ទៈលែងចង់រស់តទៅទៀត ។ នាងបន្ថែមថា នាងស្រលាញ់ និងនឹកប្តីរបស់នាងខ្លាំងណាស់ ហើយចង់ធ្វើនូវអ្វីដែលនាងត្រូវតែធ្វើ ដើម្បីឲ្យពួកគេទាំង៤ អាចតាមរស់នៅជាមួយគ្នាម្តងទៀត នៅក្នុងជាតិក្រោយ ។
មួយថ្ងៃបន្ទាប់ពីហេតុការណ៍ដ៏រន្ធត់នេះបានកើតឡើង ប្តីរបស់នាងក៏បានបង្ហាញខ្លួន និងសារភាពចំពោះមុខប៉ូលីសទាក់ទងនឹងចេតនារបស់គាត់ដែលបានធ្វើជាស្លាប់ក្លែងក្លាយនោះ ។ គាត់បានអះអាងថា គាត់ជំពាក់បំណុលគេ ១០០,០០០ យន់ បន្ទាប់ពីដាក់ពាក្យស្នើសុំប្រាក់កម្ចីតាមអ៊ីនធើរណែត ។ យោងតាមរបាយការណ៍ គាត់បានយកប្រាក់ពីគោលនយោបាយធានារ៉ាប់រងអាយុជីវិត ១លានយន់ សម្រាប់ខ្លួនគាត់ ១សប្តាហ៍មុនពេលធ្វើជាមាន «គ្រោះថ្នាក់រថយន្ត» ។
គាត់បានលុតជង្គង់ និងសុំខមាលទោសនៅកន្លែងសាកសពប្រពន្ធ និងកូនៗរបស់គាត់ មុនពេលពន្យល់ថា គាត់ពុំដែលនឹកស្មានថា រឿរ៉ាវដែលគាត់បានធ្វើនេះ អាចនាំឲ្យប្រពន្ធ និងកូនៗជាទីស្រលាញ់របស់គាត់ បាត់បង់ជីវិតបែបនេះនោះទេ ។ គាត់ក៏បានបន្ថែមថា ប្រាក់កម្ចីអនឡាញនោះ គឺក្នុងគោលបំណងដើម្បីយកមកព្យាបាលជំងឺឆ្កូតជ្រូកកូនស្រីរបស់គាត់ប៉ុណ្ណោះ ។
ទោះយ៉ាងណា He ត្រូវបានចាប់ខ្លួន និងបច្ចុប្បន្ន កំពុងស្ថិតក្នុងមន្ទីរឃុំឃាំងខ្លួន ក្នុងករណីចោទប្រកាន់បំផ្លិចបំផ្លាញព្រទ្យសម្បត្តិដ៏ធំ ។ តែក្រុមអ្នកជំនាញបានអះអាងថា វាជាហាក់ដូចជាមិនទំនងចំពោះការផ្តន្ទាទោសគាត់ ចំពោះការស្លាប់របស់ប្រពន្ធ និងកូនៗរបស់គាត់ បើទោះបីជាគ្រួសារខាងប្រពន្ធរបស់គាត់ បានចោទប្រកាន់ពីបទឧក្រិដ្ឋក៏ដោយ ៕
ដោយ៖ ចន្ទី
ប្រភព៖ Worldofbuzz