ភ្នំពេញ ៖ លោកឃួង ស្រេង បានជំរុញឲ្យអាជ្ញាធរមានសមត្ថកិច្ចទាំងអស់ ពិសេស អាជ្ញាធរខណ្ឌឫស្សីកែវ ត្រូវបង្ការ ទប់ស្កាត់បទល្មើសគ្រប់ប្រភេទ ការរៀបចំសណ្តាប់ធ្នាប់ និងការទប់ស្កាត់ជនអន្តោប្រវេសន៍វៀតណាម ដែលរស់នៅតាមដងទន្លេសាប និងចិញ្ចឹមត្រីតាមបែក្នុងទន្លេសាប ទន្លេមេគង្គ រួមនិងការថែរក្សាបរិស្ថានទន្លេ ឲ្យបានល្អប្រសើរ។
នៅថ្ងៃទី១៨ ខែតុលា ឆ្នាំ២០១៨ លោក ឃួង ស្រេង អភិបាលនៃគណៈអភិបាលរាជធានីភ្នំពេញ បានចូលរួមពិធីសំណេះសំណាលជាមួយមន្ត្រីរាជការចំណុះរដ្ឋបាលខណ្ឌឫស្សីកែវ ព្រមទាំងចែកប័ណ្ណសរសើរ និងថវិកាផ្តល់ដោយក្រុមប្រឹក្សាប្រឡងប្រណាំង អនុវត្តគោលនយោបាយភូមិសង្កាត់មានសុវត្ថិភាព ជូនដល់សង្កាត់ និងប៉ុស្តិ៍នគរបាលរដ្ឋបាលសង្កាត់ ដែលមានស្នាដៃក្នុងការបំពេញការងារ។
លោកឃួង ស្រេង ក្នុងឱកាសនោះបានអនុញ្ញាតឲ្យមន្ត្រីរដ្ឋបាលខណ្ឌឫស្សីកែវ លើកឡើងពីកង្វល់ និងបញ្ហាប្រឈមខ្វះ ចន្លោះដើម្បីរិះរកវិធីបម្រើប្រជាពលរដ្ឋ ឲ្យកាន់តែល្អប្រសើរជាងមុន ហើយក្នុងឱកាសនោះ លោក លោកស្រីជាចៅសង្កាត់ ចៅសង្លាត់រង ក៏បានលើឡើងពីបញ្ហាកង្វល់មួយចំនួនផងដែរ ដើម្បីឲ្យអាជ្ញាធររាជធានីភ្នំពេញ ជួយសម្រួល ដោយមានទាំងបញ្ហា ការផ្តល់សេវាជូនប្រជាពលរដ្ឋ លូ សំរាម ការកសាងស្នាក់ការប៉ុស្តិ៍ សង្កាត់ទើបបង្កើតថ្មីជាដើម។
លោកឃួង ស្រេង បានមានប្រសាសន៍ថា គោលបំណងដែលលោក មកជួបបងប្អូនមន្ត្រីរបស់ខណ្ឌឫស្សីកែវនៅពេលនេះ គឺដើម្បីសួរសុខទុក្ខមន្ត្រី ធ្វើការងារបានអ្វីខ្លះ ហើយនៅខ្វះចំណុចណាខ្លះ ដើម្បីបំពេញបន្ថែមធ្វើយ៉ាងណាបម្រើ ប្រជាពលរដ្ឋឲ្យរឹងរិតតែល្អប្រសើរឡើងថែមទៀត។
លោកឃួង ស្រេង ក៏បានសម្តែងការកោតសរសើរ ចំពោះរដ្ឋបាលខណ្ឌឫស្សីកែវ រួមទាំងកម្លាំងមានសមត្ថកិច្ចទាំងអស់ដែល បានយកអស់កម្លាំងកាយចិត្តក្នុងកិច្ចការពារសន្តិសុខ សណ្តាប់ធ្នាប់ រួមនិងការផ្តល់សេវាជូនប្រជាពលរដ្ឋបាលល្អប្រសើរ រហូតទទួលបានស្នាដៃជាច្រើន។ ប៉ុន្តែទន្ទឹមនឹងភាពល្អប្រសើរហើយនោះ ខណ្ឌឫស្សីកែវក៏មានបញ្ហាប្រឈម ដែលត្រូវអនុវត្តបន្តដែរ ក្នុងនោះមានបញ្ហាសណ្តាប់ធា្នប់ មិនទាន់រៀបចំបានល្អប្រសើរនូវឡើយ ប្រជាពលរដ្ឋមិនទាន់គោរពច្បាប់ចរាចរ បញ្ហាគ្រឿងញៀននៅតែកើតមាន ការចុះកិច្ចសន្យាជាមួយក្លឹបកម្សាន្តនានា ក៏នៅមិនទាន់បានគ្រប់ជ្រុងជ្រោយជាដើម។
លោកឃួង ស្រេង បានបញ្ជាក់ថា នៅភ្នំពេញមានកន្លែងសប្បាយភាព២៦៤២ ទីតាំង ក្នុងនោះសម្រាប់ខណ្ឌឫស្សីកែវ ក៏មានក្លឹបកម្សាន្ត កន្លែងសប្បាយភាពច្រើនដែរ ដែលអាជ្ញាធរ ត្រូវណែនាំឲ្យម្ចាស់ក្លឹបកម្សាន្តទាំងអស់នោះ បំពេញបែបបទច្បាប់អោយបានត្រឹមត្រូវ ។ ពាក់ព័ន្ធនឹងបញ្ហាគ្រឿងញៀន បើទីតាំងណាមានបទល្មើសគ្រឿងញៀន ទីតាំងនោះត្រូវតែបិទចោល ហើយម្ចាស់ទីតាំងក៏ត្រូវប្រឈម នឹងការមានទោសទណ្ឌថែមទៀត។ លោកឃួង ស្រេង ក៏បានជម្រុញឲ្យមានការបង្ការទប់ស្កាត់បទល្មើស លួច ឆក់ ប្លន់គ្រប់ប្រភេទ ដើម្បីការពារសន្តិសុខ និងសុវត្ថិភាពជូនប្រជាពលរដ្ឋ ព្រោះសន្តិសុខនេះ ជាតម្រូវការចាំបាច់ និងចង់បានរបស់មនុស្សគ្រប់គ្នាមិនថា អ្នកមាន និងអ្នកក្រនោះទេ។
លោកឃួង ស្រេង បានដាក់ចេញនូវផែនការចំនួន១៣ចំណុចបន្ថែមទៀត ដើម្បីឲ្យអាជ្ញាធរខណ្ឌឫស្សីកែវអនុវត្តបន្ត ក្នុងនោះ មានទាំងមិនអនុញ្ញាតឲ្យផ្លូវជាតិលេខ៥ ចតយានយន្តនៅលើទ្រូវផ្លូវធ្វើឲ្យបាត់បង់សណ្តាប់ធ្នាប់ និងធ្វើឲ្យកកស្ទះចរាចរណ៍។ ការរឹតបណ្តឹងច្បាប់ចរាចរណ៍ ដោយត្រូវកោះហៅអ្នកពាក់ព័ន្ធមកប្រជុំ ដើម្បីមានវិធានការលើបញ្ហានេះ ។ យកចិត្តទុកដាក់លើបញ្ហា លូស្ទះ និងបញ្ហាកកស្ទះសំរាម។
លោកបញ្ជាក់ថា ដាច់ខែនេះ យើងនឹងបើកយុទ្ធនាការជួសជុល ផ្លូវខូចខាតហើយ ដែលដាច់ខាតអាជ្ញាធរខណ្ឌ សង្កាត់ត្រូវចុះមើលហើយ ក្នុងមូលដ្ឋានរបស់យើង មានផ្លូវប៉ុន្មានខូច និងខូចមានទំហំណា។ ក្រៅពីនេះក៏ ត្រូវចុះពិនិត្យមើល ចំពោះការសាងសង់ រោងបុណ្យ រោងការ នៅលើទ្រូងផ្លូវ គឺអាចឲ្យធ្វើតែលើចិញ្ចើមផ្លូវ និងលើទ្រូវផ្លូវតែមួយ ប្រឡោះបានហើយ មិនឲ្យបិទផ្លូវជាដាច់ខាត ដែលការងារនេះ អាជ្ញាធរខណ្ឌសង្កាត់ត្រូវធ្វើការណែនាំ។ បញ្ហានេះវាមានហានិភ័យច្រើន ក្រៅពីធ្វើឲ្យកកស្ទះចរាចរណ៍គេជេរ ហើយនៅ វាក៏នឹងបង្កឲ្យមានគ្រោះថ្នាក់ចរាចរផងដែរ បើអ្នកបើកបរខ្វះការប្រុងប្រយ័ត្នតែបន្តិច។ ការងារពិនិត្យអាវុធជាតិផ្ទុះ និងការអនុវត្តច្បាប់ចរាចរណ៍ ផ្លូវគោក ត្រូវតែធ្វើ ទោះជាក្នុងបុរី ក៏ដោយនិងត្រូវបន្លាសគោលដៅជានិច្ចកុំនៅមួយកន្លែង។
លោកបន្តថា បញ្ហាអន្តោប្រវេសន៍ នៅតាមដងទន្លេសាប ពិសេស ការចិញ្ចឹមត្រីដែលធ្វើឲ្យខូចបរិស្ថាន និងបានធ្វើឲ្យខូចខាត ដល់វិស័យទេសចរណ៍នោះ យើងត្រូវសហការ ជាមួយសមាគមន៍ ជនជាតិវៀតណាម ឥស្លាមជាដើម ដើម្បីរិតបណ្តឹងច្បាប់អន្តោប្រវេសន៍ ថាតើពួកគាត់មានច្បាប់រស់នៅ និងរកស៊ីនៅស្រុកខ្មែរត្រឹមត្រូវឬទេ? យើងត្រូវរួមគ្នាធ្វើការងារនេះ ទាំងអស់គ្នា ដើម្បីបម្រើផលប្រយោជន៍ជាតិ និងប្រជាពលរដ្ឋ៕ ដោយ៖កូឡាប
