ប្រធានាធិបតីTrump ប្រកាសថា ប្រសិនបើ Mexico មិនទប់ស្កាត់ជនអន្តោប្រវេសន៍ប្រមាណ៤០០០នាក់ ដែលកំពុងធ្វើដំណើរមកកាន់ព្រំដែនដើម្បីជ្រៀតចូលអាមេរិកទេនោះ លោកនឹងដាក់ពង្រាយកងទ័ព ហើយបិទទ្វារព្រំដែនភាគខាងត្បូងតែម្តង។
ប្រធានាធិបតីអាមេរិក Donald Trump បានសរសេរលើTwitter កាលពីថ្ងៃទី១៨តុលាម្សិលមិញនេះថា៖ ខ្ញុំកំពុងសម្លឹងមើលគណបក្សប្រជាធិបតេយ្យ ព្រោះពួកគេចង់បើកព្រំដែនជាមួយនឹងប្រព័ន្ធច្បាប់ទន់ខ្សោយដែលបន្សល់ទុក បណ្ដាលឱ្យមានការសម្រុកចូលទឹកដីយើងពី Guatemala, Honduras និងEl Salvador, កន្លែងដែលបណ្តាមេដឹកនាំកន្លងមកបានធ្វើការទប់ស្កាត់យ៉ាងតិតួចចំពោះជនអន្តោប្រវេសន៍យ៉ាងច្រើនកុះករ រួមមានទាំងឧក្រិដ្ឋជនជាច្រើនឆ្លងកាត់ Mexico ចូលមកអាមេរិក។
សេចក្តីប្រកាសខាងលើរបស់លោកTrump ត្រូបានលើកឡើងខណៈពេលដែលចរន្តមនុស្សចំណាកស្រុកចេញពីHonduras ហើយសម្រុកមកកាន់ព្រំដែនអាមេរិក-Mexico បំណងស្វែងរកការចាកផុតអំពីភាពទុរគតនិងអំពើហិង្សាក្នុងប្រទេសពួកគេ។
ក្នុងអត្ថបទមួយទៀត ប្រធានាធិបតីអាមេរិកប្រកាសថា ក្រៅពីការផ្អាកទាំងស្រុងនូវខ្ទង់ជំនួយដល់បណ្តាប្រទេស ដែលពុំអាចត្រួតត្រាបាននូវស្ថានការណ៍ពលរដ្ឋខ្លួនបែបនេះ ខ្ញុំត្រូវសំណូមពរឱ្យ Mexico ទប់ស្កាត់ចរន្តជនអន្តោប្រវេសន៍ទាំងនេះ។ប្រសិនបើMexico មិនអាចធ្វើបែបនេះបានទេ ខ្ញុំនឹងកេណ្ឌប្រមូលកងទ័ពអាមេរិកឱ្យទៅបិទព្រំដែនភាគខាងត្បូងរបស់យើង។
គួររំលឹកថា ក្នុងយុទ្ធនាការដណ្តើមសំឡេងឆ្នោត លោកTrump បានសន្យានឹងរឹតបន្តឹងគោលនយោបាយអន្តោប្រវេសន៍ ដើម្បីជាសារប្រយោជន៍របស់អាមេរិក។ប៉ុន្តែប្រធានាធិបតីអាមេរិកពុំទាន់បញ្ចុះបញ្ចូលរដ្ឋសភាឱ្យផ្តល់ប្រាក់១៨ពាន់លានដុល្លារដើម្បីស្ថាបនាព្រំដែនអាមេរិក-Mexico ប្រវែងប្រមាណ៣២០០គីឡូម៉ែត្រ។លោកTrump នៅតែបន្តរក្សាទស្សនៈបង្ខំឱ្យភាគី Mexicoត្រូវចំណាយប្រាក់ពាក់កណ្តាលក្នុងការសាងសង់ជញ្ជាំងព្រំដែន ប៉ាន់ស្មានប្រមាណ២០.០០០លានដុល្លារ៕លីសា
