ការសន្សំលុយទុក គឺជាទម្លាប់ដ៏ល្អមួយសម្រាប់មនុស្សម្នាក់ៗ ព្រោះវាអាចធ្វើឲ្យលំហូរហិរញ្ញវត្ថុរបស់អ្នកប្រសើរឡើង និងកសាងទ្រព្យសម្បត្តិសម្រាប់ថ្ងៃអនាគត ។ ហើយវាក៏អាចធ្វើឡើងជាផ្នែកមួយសម្រាប់គោលបំណងត្រូវការបន្ទាន់មួយផងដែរ ។ ហើយអ្វីៗទាំងអស់ចាប់ផ្តើមឡើង គឺអាស្រ័យដោយអ្នកបានកត់គោលដៅមួយ និងធ្វើផែនការមួយ ដើម្បីឈានដល់គោលដៅនោះ ។
ជាការពិតណាស់ ការសន្សំលុយអាចជារឿងដ៏លំបាកមួយផងដែរ សម្រាប់មនុស្សភាគច្រើន ប៉ុន្តែ វានឹងផ្តល់ឲ្យអ្នកនូវផលប្រយោជន៍ច្រើននៅថ្ងៃអនាគត ។ មិនថាតិច ឬ ច្រើន ទេ ដរាបណាអ្នកអាចញាត់អ្វីមួយចូលក្នុងកូនជ្រូករបស់អ្នក ។
ថ្មីៗនេះ អ្នកប្រើប្រាស់ Facebook ម្នាក់ឈ្មោះ Joselito Edrosolano បានបង្ហោះវីដេអូដ៏គួរឲ្យភ្ញាក់ផ្អើលមួយ បង្ហាញលុយសន្សំបានយ៉ាងច្រើន នៅក្នុងធុងដ៏ធំ (ពុយ) ពណ៌ខៀវមួយរបស់គាត់ ។
នៅក្នុងវីដេអូ បុរសម្នាក់ត្រូវបានឃើញចាប់ផ្តើមបើកចំហរផ្នែកខាងលើនៃពុយមួយ ដែលផ្ទុកទៅដោយលុយប្រភេទកាក់យ៉ាងច្រើន តាមរយៈប្រើប្រាស់ម៉ាស៊ីនអារ ។
បន្ទាប់មួយសន្ទុះក្រោយមក មនុស្សជាច្រើនក៏បានចូលមកជួយកាយយកកាក់ទាំងនោះចេញពីក្នុងធុង និងចាប់ផ្តើមរាប់ពួកវា ។
កាក់ទាំងអស់ដែលគាត់បានសន្សំញាត់ចូលក្នុងពុយនោះសរុបមានចំនួនរហូតដល់ P424,000.00 ក្នុងរយៈពេលត្រឹមតែ ៩ ខែ ប៉ុណ្ណោះ ហើយបើគិតជាសាច់ប្រាក់វិញគឺច្រើនណាស់ ៕
ដោយ៖ ឧត្តម
ប្រភព៖ nobledrift