អ្នកលេងអ៊ិនធើរណេតជាច្រើន នៅតែមិនទាន់រំសាយបាត់ពីអារម្មណ៍ដ៏សែនតក់ស្លុត ជាមួយទិដ្ឋភាពនៃវីដេអូលេចធ្លាយមួយ ដែលបង្ហាញឲ្យឃើញស្ត្រីម្នាក់ ត្រូវបានបុក និងអូសនាំយកទៅយ៉ាងសាហាវ ដោយរថយន្ត១គ្រឿង ស្ថិតក្នុងបរិវេណនៃតំបន់ដ៏ពេញនិយម Shaftsbury នៃទីក្រុង Cyberjaya ប្រទេសម៉ាឡេស៊ី ។
ទំព័រហ្វេសប៊ុក Cyberjaya Community បានចែករំលែកឃ្លីបខ្លីមួយ និងបានព្រមានដល់អ្នកទាំងអស់គ្នា ដែលបានឃើញទិដ្ឋភាពដ៏រន្ធត់នេះហើយ សូមមេត្តាមានការប្រុងប្រយ័ត្នខ្លួនគ្រប់វេលា ខណៈស្ថិតនៅលើដងផ្លូវ ឬ ទីកន្លែងសាធារណៈដទៃទៀត ។
ដោយបានឲ្យដឹងដឹងថា ហេតុការណ៍ដ៏សាហាវនេះបានកើតឡើងនៅវេលាម៉ោង ៧ និង ៥៣ នាទីយប់ថ្ងៃទី១៨ ខែតុលា ឆ្នាំ២០១៨, ផេកហ្វេសប៊ុកខាងលើនេះក៏បាននិយាយថា ស្ត្រីរងគ្រោះដែលនៅតែពុំទាន់ស្គាល់អត្តសញ្ញាណ ត្រូវបានអូសបីបួនម៉ែត្រ ហើយត្រូវជាប់ក្រោមរថយន្តបង្កនោះផងដែរ ។
នាងត្រូវបានគេនាំយកទៅសង្គ្រោះនៅឯមន្ទីរពេទ្យជាបន្ទាន់ ស្ថិតក្នុងស្ថានភាពសន្លប់ធំ ។ ទោះយ៉ាងណា នាងបានបាត់បង់ជីវិតនៅព្រឹកមិញនេះ ។
តាមរយៈព័ត៌មាន update នៅលើ Twitter ដំបូងបាននិយាយថា អ្នកបើកបររថយន្តបង្កនោះ គឺជាជនបរទេស ប៉ុន្តែ រហូតមកទល់ពេលនេះ ប៉ូលីសនៅពុំទាន់អធិត្ថាប្បាយលម្អិតបន្ថែមអំពីអត្តសញ្ញាណរបស់ជនសង្ស័យនោះទេ ។
ហេតុការណ៍ដ៏រន្ធត់នេះ បានធ្វើឲ្យអ្នកប្រើប្រាស់អ៊ិនធើរណែតជាច្រើន លើកឡើងអំពីភាពខ្វះការគោរពច្បាប់ចរាចរណ៍ របស់អ្នកបើកបរជាច្រើននៅក្នុងទីក្រុង Cyberjaya ទីកន្លែងសម្រាប់ទាំងនិស្សិត និងអ្នកដែលធ្វើការនៅក្នុងវិស័យឧស្សាហកម្មបច្ចេកវិទ្យា ។ ទន្ទឹមនោះផងដែរ អ្នកលេងអ៊ិនធើរណែត ក៏បានជំរុញឲ្យរដ្ឋមន្ត្រីដឹកជញ្ជូនលោក Anthony Loke ប្រញាប់ពិនិត្យមើលចំពោះបញ្ហានេះឲ្យលឿនផង និងហៅថា វាជាស្ថានភាពគំរាមកំហែងបង្កផលវិបាកយ៉ាងធ្ងន់ធ្ងរមួយនៅពេលអនាគត ៕
ដោយ៖ ចន្ទី
ប្រភព៖ Coconuts
