ខេត្តព្រះសីហនុ៖ រដ្ឋបាលខេត្តព្រះសីហនុ បានចាប់ផ្តើមដំណើរការស្ថាបនាកំណាត់ផ្លូវសំខាន់ៗនានា ដេលបានខូច ដោយជំនន់ទឹកភ្លៀង ក្នុងប៉ុន្មានខែមកនេះជាបណ្តើរៗហើយ ជាក់ស្តែង កាលពីព្រឹកថ្ងៃទី១៩ ខែតុលា ឆ្នាំ២០១៨ រដ្ឋបាលខេត្តនេះ បានចាប់ផ្តើមស្ថាបនាផ្លូវអ៊ុតកៅស៊ូ នៅតាមកំណាត់ផ្លូវជាតិលេខ៤ ត្រង់ចំណុច ទីប្រជុំជនផ្សារវាលរេញ ស្ថិតក្នុងស្រុកព្រៃនប់។
ទាក់ទិនបញ្ហានេះ ឯកឧត្តម យន្ត មីន អភិបាលខេត្តព្រះសីហនុ ដែលបានអញ្ជើញចុះពិនិត្យ ដោយផ្ទាល់សកម្មភាពស្ថាបនាចាក់អ៊ុតកៅស៊ូផ្លូវខូច តាមផ្លូវជាតិលេខ៤ កាលពីព្រឹកមិញនេះ មានប្រសាសន៍ថា គម្រោងជួសជុលស្ថាបនាផ្លូវខូចមួយចំនួន នាខេត្តព្រះសីហនុ នឹងផ្តើមធ្វើជាបន្តបន្ទាប់ ក្រោយពេលធាតុអាកាសរាំង ឬអស់ទឹកភ្លៀង។
ឯកឧត្តមបន្តថា ការស្ថាបនាផ្លូវខូចនាឱកាសនេះ គឺក្រៅតែអំពីការចាក់អ៊ុតកៅស៊ូ នៅផ្លូវជាតិលេខ៤ ត្រង់ទីប្រជុំផ្សារវាលរេញ កំណាត់ផ្លូវមួយចំនួនទៀតក្នុងស្រុកព្រៃនប់ ស្រុកស្ទឹងហាវ និងក្រុងព្រះសីហនុ ដែលបានឈូសឆាយកន្លងមក រដ្ឋបាលខេត្តក៏នឹងធ្វើបន្តស្ថាបនាផ្លូវខូចជាច្រើនខ្សែទៀត នៅក្នុងខេត្តព្រះសីហនុជាបន្តបន្ទាប់តាមការជាក់ស្តែង។
ព្រមជាមួយគ្នានេះ លោក ណុប ហេង ប្រធានមន្ទីរសាធារណការ និងដឹកជញ្ជូនខេត្តព្រះសីហនុ ក៏បានឲ្យដឹងដែរថា ចំពោះផ្លូវឯករាជ្យ នាទីប្រជុំជនក្នុងក្រុងព្រះសីហនុឯណោះវិញ ក៏នឹងត្រូវស្ថាបនាចាក់អ៊ុតកៅស៊ូ ក្នុងពេលដ៏ឆាប់ខាងមុខនេះដែរ គឺបន្ទាប់ពីក្រុមមន្ត្រីជំនាញបច្ចេកទេសរៀបសម្រួល ឬសំអាតបាតផ្លូវ និងប្រព័ន្ធលូបង្ហូរទឹករួចរាល់។
ទោះជាបែបនេះក្តី ជាបន្តបន្ទាប់មកនេះ មានប្រជាពលរដ្ឋ និងសាធារណៈជនមួយចំនួន បានរិះគន់រដ្ឋបាលខេត្តព្រះសីហនុ តាមបណ្តាញសង្គមហ្វេសប៊ុក ចំពោះផ្លូវខូចពិបាកធ្វើដំណើរ។ ទន្ទឹមគ្នានេះ ពួកគេក៏បានទទូចដល់រដ្ឋបាលខេត្តព្រះសីហនុ និងថ្នាក់ដឹកនាំក្រសួងមន្ទីរស្ថាប័នពាក់ព័ន្ធ ឲ្យជួយពន្លឿន ស្ថាបនាផ្លូវ ដែលខូច ហើយពិបាកក្នុងការធ្វើដំណើរនាមូលដ្ឋានខេត្តព្រះសីហនុ ឲ្យបានឆាប់។ ជាពិសេសផ្លូវ ចាប់ពីអូរ១ រហូតដល់ផ្លូវអូរ៥ ដែលខូចខាតធ្ងន់ធ្ងរកន្លងមក។
ត្រង់ចំណុចនេះ ឯកត្តម យន្ត មីន អភិបាលខេត្តព្រះសីហនុ មានប្រសាសន៍ថា នឹងខំពន្លឿនការស្ថាបនាផ្លូវ ដែលខូចនៅក្នុងទីប្រជុំជនក្នុងក្រុងទេសចរណ៍មួយនេះ ឲ្យបានឆាប់ ប្រយោជន៍ដើម្បីឆាប់ និងដាក់ជូនប្រពលរដ្ឋប្រើប្រាស់ ឲ្យបានងាយស្រួលឡើងវិញ។
ឆ្លៀតឱកាសនេះដែរ ឯកឧត្តម យន្ត មីន ក្នុងនាមរដ្ឋបាលខេត្ត ក៏សូមការយោគយល់ពីប្រជាពលរដ្ឋ ដែលកន្លងមក ផ្លូវនៅទីប្រជុំជនក្នុងក្រុងព្រះសីហនុ ពិបាកក្នុងធ្វើដំណើរ និងមានសភាពហុយជាដើម ដែលបណ្តាលមកពីជំនន់ទឹកភ្លៀង ហើយបានប៉ះពាល់ដល់ការរស់នៅ និងការប្រកបរបរទទួលទាន របស់ប្រជាពលរដ្ឋជាដើម៕ ដោយ៖ ដែន សីមា