មិនប្រុស ឬស្រី សុទ្ធតែត្រូវមានប្តី មានប្រពន្ធ ហើយអ្នកទាំងអស់ប៉ងប្រាថ្នា អាចរួមរស់ជាមួយគ្នាដល់ចាស់កោងខ្នង ។
ប៉ុន្តែលើលោកអ្វីៗតែងប្រែប្រួលទៅតាមពេលវេលា ។ គ្មានអ្នកណាប្រឆាំងបានឡើយ ។ ហេតុនេះប្រាកដទេថា សម្បថរួមរស់លុះក្ស័យពេលរៀបការ នឹងក្លាយជាការពិតពេលអ្នកមានអាយុ ៥០ឆ្នាំ ៧០ឆ្នាំ ឬ ៩០ឆ្នាំ !? ។
គូស្នេហ៍២នាក់នេះ ពិតជាចង់ដឹងថា ពេលចាស់ទៅខ្លួនមានមុខមាត់យ៉ាងម៉េចដែរ !
ដំបូងពួកគេ អង្គុយបញ្ច្រាស់បែរខ្នងដាកគ្នា រួចឲ្យក្រុមជំនាញតុបតែង “ប្រែក្លាយ” ពួកគេ ទៅជាវ័យ… ៥០ឆ្នាំ ។
ពេលងាកមើលគ្នាក្រោយ “បង្កើនអាយុ រួចពួកគេពិតជាស្រឡាំងកាំង ហើយនៅបន្តុះបង្អាប់គ្នាលេង ។ ពួកគេពោល “Hi” ដូចអ្នកពុំធ្លាប់ស្គាល់ ។ រួចបន្តទៀត ។
បុរសជាស្វាមីនិយាយថា ៖ បងសង្ឃឹមថាអូននឹងក្លាយទៅជាបែបនេះ មើលទៅអូនស្រស់ស្អាតណាស់តើ! ។
ពួកគេសន្ទនាគ្នាពីគ្រានោះនឹងមានកូនតូចៗ ។ អាយុ ៥០ឆ្នាំ កូនក៏ធំៗអស់ ។ ហើយពួកគេក៏ផ្ទុះសំណើច ។
បន្ទាប់មកឈានចូលវ័យ ៧០ឆ្នាំម្តង ។ ក្រុមតុបតែងចាប់ផ្តើមការងារ ។
លើផ្ទៃមុខមានស្នាមជ្រីវជ្រួញ សក់ស្កូវខ្លះ ។ ពួកគេពិតជាស្រឡាំងកាំង ៖ ពុទ្ធោ! អាយុ ៧០ឆ្នាំ គឺដូច្នេះឬ?
ពួកគេចាប់កាន់ដៃគ្នា សំឡឹងគ្នាបណ្តើរសើចបណ្តើរ ៖ “ហាក់ដូចជា ចាស់ជាងអ្វីៗ ដែលយើងធ្លាប់គិតមែនទេ?” ។ និយាយចប់ ភ្នែកពួកគេឡើងក្រហម ។ ផ្ទុះសំណើចរួចតំណក់ទឹកភ្នែករមៀលធ្លាក់ចុះពុំដឹងមកពីហេតុអ្វី ។ “សុខៗគិតថា ប៉ុន្មានសិបឆ្នាំរួមរស់ជាមួយគ្នា រួមគ្នារំលងរឿងរ៉ាវរាប់មិនអស់” ។ វ័យ ៧០ឆ្នាំ ពិតជាមានឥទ្ធិពលដល់ឥរិយាបថរបស់ពួកយើងណាស់ ! ។
ឈានចូលវ័យ ៩០ឆ្នាំ សក់ស បិទភ្នែកក៏ដឹងថា វ័យជរាមកដល់ដែរ! ។
…វេលាបើកភ្នែកសំឡឹងមើលគ្នាភ្លាម ទឹកភ្នែកហូរធ្លាក់ពុំឈប់ឈរ ឃ្លាដំបូងដែលស្វាមីពោលនៅតែ ៖ “មើលអូនទៅនៅតែអស្ចារ្យដដែល!!!” ។
ភរិយាតប “ឆ្លងកាត់មួយជីវិតបែបនេះ ទើបអូនដឹងប្រាកដថា បងគឺជាមនុស្សដែលរួមដំណើរជាមួយអូនពេញ១ជីវិត!!! ។
ជីវិតខ្លីណាស់ គប្បីរស់នៅឲ្យបានរីករាយ នាំសុភមង្គលដល់មនុស្សដែលស្រឡាញ់ទាំងអស់ !!!
នេះហើយជាសុភមង្គលរបស់អ្នក !!!
ស្រឡាញ់មនុស្សងាយទេ តែស្រឡាញ់អ្នកទាំងនោះពេញមួយជីវិតទើបពិបាក ។ ក្នុងឆាកជីវិត ពុំមានវេលាសម្រាប់អ្នកស្តាយក្រោយទេ! ៕
ចន្ទ្រា
