មន្ត្រី Saudi Arabia នៅថ្ងៃទី១៩តុលា បានទទួលស្គាល់ថា អ្នកកាសែតប្រឆាំង Jamal Khashoggi បានស្លាប់ក្នុងការ«វាយប្រវាយប្រតប់គ្នាមួយ» ជាមួយបុគ្គលមួយចំនួននៅក្នុងស្ថានកុងស៊ុលSaudi Arabia នាទីក្រុងIstanbulកាលពីដើមខែនេះ ។ទាក់ទិនដល់ករណីនេះ Saudi Arabia បានចាប់ខ្លួនជនសង្ស័យ១៨នាក់ និងដកហូតតំណែងមន្ត្រីជាន់ខ្ពស់មួយចំនួន
ប្រភពពីRTឱ្យដឹងថា នៅថ្ងៃទី១៩តុលា អយ្យការម្នាក់របស់ Saudi Arabia បានប្រកាសលើទូរទស្សន៍ជាតិអំពី លទ្ធផលស៊ើបអង្កេតពីការបាត់ខ្លួនយ៉ាងអាថ៌កំបាំងរបស់អ្នកកាសែតខាងលើ ហើយដឹងថាលោកបានស្លាប់ហើយ។តាមអយ្យការរូបនេះ ដំបូងឡើយវាគឺជាជម្លោះរវាងបុគ្គលិកមួយចំនួននៅក្នុងស្ថានកុងស៊ុលជាមួយអ្នកកាសែត ក្រោយមកក៏ឈានដល់ការវាយតប់គ្នាជាមួយបុរសមួយក្រុមនោះបណ្តាលឱ្យលោកស្លាប់តែម្តង។
ប្រព័ន្ធផ្សព្វផ្សាយ Saudi Arabiaក៏បានបញ្ជាក់ថា ឧត្តមសេនីយ៍ Ahmad al-Asiri, អនុប្រធានស្នងការចារកម្មប្រទេសនេះបានត្រូវដកហូតពីមុខតំណែង មន្ត្រីជាន់ខ្ពស់ម្នាក់ទៀតគឺលោក al-Qahtani ដែលទទួលបន្ទុកផ្នែកឃោសនានៅបរទេស ក៏ត្រូវបានដកហូតមុខតំណែងដែរ។
នេះជាការទទួលស្គាល់របស់ Saudi Arabia ក្រោយករណីអ្នកកាសែតJamal Khashoggi បានស្លាប់ពីរសប្តាហ៍មក ប៉ុន្តែតួកគីនិយាយថា លោកJamal Khashoggi បានរងទារុណកម្មយ៉ាង ព្រៃផ្សៃប្រព្រឹត្តទៅក្នុងស្ថានកុងស៊ុល ហើយថាពួកគេមានក្នុងដៃនូវខ្សែអាត់ថតសំឡេងនិងខ្សែវីដេអូបង្ហាញថាលោកKhashoggi បានរងទារុណកម្ម រួចត្រូវគេបំបែកសាកសពដោយមនុស្ស១៥នាក់ ក្នុងនោះភាគច្រើនមានទាក់ទងនឹងរដ្ឋការ Saudi Arabia ៕លីសា
