ភ្នំពេញ៖ លោកអ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើង នូវការរំពឹងទុកថា បើទោះបីមានបញ្ហាពាណិជ្ជកម្មពិភពលោក ក៏ពិតមែន ប៉ុន្តែកម្ពុជាសង្ឃឹមថា បញ្ហានេះនឹងមិនប៉ះពាល់ ដល់កិច្ចសហប្រតិបត្តិការពាណិជ្ជកម្ម រវាងកម្ពុជា ជាមួយដៃគូនានានោះឡើយ ហើយដៃគូ អង្គការ សមាគមជាតិ-អន្តរជាតិនានា ក៏មានសុទិដ្ឋិនិយមបែបនេះដែរ។
ការបញ្ជាក់យ៉ាងដូច្នេះ ត្រូវបានធ្វើឡើងក្រោយបញ្ចប់ជំនួប ពិភាក្សាការងារ ជាមួយប្រតិភូសមាគមយុត្តិធម៌ការងារ (FLA) និងក្រុមតំណាងអ្នកបញ្ជាទិញ ផលិតផលសម្លៀកបំពាក់ និងស្បែកជើងពីកម្ពុជា ទៅកាន់សហរដ្ឋអាមេរិក និងសហគមន៍អឺរ៉ុប ដែលដឹកនាំដោយលោក Michael Posner ប្រធានក្រុមប្រឹក្សាភិបាល FLA នៅទីស្ដីការក្រសួងការងារ នាថ្ងៃទី១៩ ខែតុលា ឆ្នាំ២០១៨។
លោករដ្ឋមន្ត្រី បានថ្លែងយ៉ាងដូច្នេះថា “យើងក៏សង្ឃឹមថា បញ្ហាប្រឈមនានា ដែលកើតឡើងនៅក្នុងពេលបច្ចុប្បន្ននេះ ទាក់ទងនឹងបញ្ហាពាណិជ្ជកម្ម របស់ពិភពលោក គឺនឹងមិនប៉ះពាល់ ទៅដល់កិច្ចសហប្រតិបត្តិការរវាងកម្ពុជា និងដៃគូទាំងអស់នោះទេ ហើយដៃគូទាំងអស់ជាមួយយើង គឺសុទ្ធតែមានគំនិតនេះដូចគ្នា”។
លោក អ៊ិត សំហេង ក៏បានបញ្ជាក់ដែរថា ការជួបពិភាក្សាគ្នាជាមួយសមាគម FLA ខាងលើនេះ គឺដើម្បីពិនិត្យឡើងវិញ ទៅលើវឌ្ឍនភាពលក្ខខណ្ឌការងារ ការរៀបចំប្រាក់ឈ្នួល យន្តការដោះស្រាយវិវាទ និងការអនុវត្តច្បាប់ សហជីព ជាដើម ហើយក្នុងកិច្ចពិភាក្សានាពេលនេះ ក៏បានលើកឡើងពីវឌ្ឍនភាព និងបញ្ហាប្រឈមនានាផងដែរ។ តែទោះជាយ៉ាងណា កម្ពុជារួមជាមួយដៃគូនានា របស់ខ្លួន នៅតែបន្តដោះស្រាយរួមគ្នា ដើម្បីបន្តកិច្ចសហប្រតិបត្តិការទៅមុខទៀត។
សូមជម្រាបថា សមាគមយុត្តិធម៌ការងារ (FLA) គឺជាសមាគមធំរបស់សហរដ្ឋអាមេរិក ដែលតំណាងឱ្យអ្នកបញ្ជាទិញ ផលិតផលសម្លៀកបំពាក់ និងស្បែកជើងពីកម្ពុជា ទៅកាន់សហរដ្ឋអាមេរិក និងសហគមន៍អឺរ៉ុប។ សមាគមនេះ ក៏ជាដៃគូចាស់ដ៏ល្អមួយ របស់កម្ពុជាផងដែរ៕ ដោយ៖កូឡាប
