ខេត្តបាត់ដំបង ៖ បុរសម្នាក់ដែលជាប់ពាក់ព័ន្ធក្រុមជនប្រដាប់អាវុធប៉ុនប៉ងផ្ដូលរំលំរដ្ឋាភិបាល ត្រូវចាប់ខ្លួនតាមអំណាចដីកាតុលាការរាជធានីភ្នំពេញ កាលពីវេលាម៉ោង០១ និង៤០នាទីរសៀលថ្ងៃ១៩ តុលា នេះ ស្ថិតនៅចំណុចក្រុម៨ ភូមិឫស្សី១ ឃុំមោង ស្រុកមោងឫស្សី ខេត្តបាត់ដំបង។
កម្លាំងនគរបាលនាយកដ្ឋានបច្ចេកទេសសន្តិសុខផ្ទៃក្នុង រួមសហការជាមួយកម្លាំងនគរបាលនៃស្នងការដ្ឋានខេត្តបាត់ដំបងបានអនុវត្តន៍ដីកា ចាប់ជនត្រូវចោទឈ្មោះ ប៉េង សុខា ហៅម៉ៅ ភេទប្រុស អាយុ៥៣ឆ្នាំ មានទីលំនៅក្រុមទី៦ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ។ ជននេះ ត្រូវបានចាប់ខ្លួនតាមដីកាបង្គាប់ឱ្យចាប់ខ្លួនលេខ៦៧៥ “ខ” ដ.ច.ន. ចុះថ្ងៃទី២ ខែតុលាឆ្នាំ២០១៨ ចេញដោយលោកអ៊ឹម វណ្ណៈ ចៅក្រមស៊ើបសួរសាលាដំបូងរាជធានីភ្នំពេញ ដែលជាប់ចោទពីបទ “រៀបចំចាត់តាំងក្រុមជនប្រដាប់អាវុធ និង
សន្និធិអាវុធ គ្រឿងផ្ទុះ ដោយគ្មានការអនុញ្ញាតពីអាជ្ញាធរមានសមត្ថកិច្ច” ដែលបានប្រព្រឹត្តនៅរាជធានីភ្នំពេញ ខេត្តកំពត ខេត្តពោធិ៍សាត់ និងខេត្តកំពង់ស្ពឺ កាលពីថ្ងៃទី២២ កញ្ញា ២០១៨ រួមជាមួយបក្ខជាង១០នាក់ផ្សេងទៀត ដែលត្រូវចាប់ខ្លួន និងឃុំខ្លួនក្នុងពន្ធនាររួចហើយនាពេលថ្មីៗនេះ។
ក្រោយពីផ្ទុះរឿងនេះ សមត្ថកិច្ចបានចាប់ខ្លួនបានជាបន្តបន្ទាប់ តែជននេះបានរត់គេចមកសម្ងំលាក់ខ្លួននៅស្រុកមោងប្ញស្សី រហូតកម្លាំងជំនាញស្រាវជ្រាវរកឃើញ ទើបត្រូវចាប់ខ្លួនតាមដីការបស់សាលាដំបូងរាជធានីភ្នំពេញតែម្ដង ។ ពេលនេះ សមត្ថកិច្ចបានបញ្ជូនជនត្រូវចោទរូបនេះ ទៅនាយកដ្ឋានបច្ចេកទេស សន្តិសុខផ្ទៃក្នុងនៃក្រសួងមហាផ្ទៃ ៕ ដោយ៖បញ្ញាស័ក្តិ
