នេះជារឿងពិតរបស់បងប្អូនជនជាតិ មឿង រស់នៅប្រទេសវៀតណាម ហើយត្រូវបាន Facebook C.C.O បង្ហោះផ្សាយ ព្រោះវារំភើប និងគួរឲ្យអស់សំណើច ។ មកទល់ពេលនេះមានអ្នកចូលចិត្ត (Likes) ដល់ទៅជាង ២លាននាក់ឯណោះ ។
វាគឺជារឿងរបស់ប្តីប្រពន្ធចំណាស់ ៦០ប្លាយ ជាជនជាតិមឿងរស់នៅតំបន់ខ្ទង់រាបភាគកណ្តាលវៀតណាម ។
ហេតុការណ៍នេះកើតឡើងនៅវេលាម៉ោង ១៧ ថ្ងៃទី ៤ ខែឧសភា ឆ្នាំ ២០១៨ ខណៈពេលដែលម្ចាស់គណនីខាងលើ និងបងប្រុសកំពុងដើរចេញពីឃុំវ៉ាន់ម៉ីវ ក៏ជួបអ៊ំប្រុសម្នាក់អាយុប្រមាណ ៦៥ឆ្នាំ កំពុងមានសភាពស្លន់ស្លោរ បែកញើសជោគ កែវភ្នែករបស់គាត់បង្ហាញពីទុក្ខកង្វល់១យ៉ាងធំធេង ។ គាត់បានទុកម៉ូតូនៅម្ខាងផ្លូវ ហើយរត់មកសួរថា ៖ “ក្មួយៗឲ្យខ្ញុំសុំសួរ… ខ្ញុំនឹងប្រពន្ធបានទៅសួរសុខទុក្ខអ្នកជំងឺនៅមន្ទីរពេទ្យ (ស្រុកមួយផ្សេង) ។ តាមផ្លូវមកដល់ម្តុំឃុំ ឡុងកុក ស្រាប់តែប្រពន្ធខ្ញុំជ្រុះបាត់ពីលើម៉ូតូ មិនដឹងពីពេលណាមក ។ ខ្ញុំស្វែងរកតាមផ្លូវអស់ ២ឃុំហើយ តែពុំឃើញសោះ ។ ក្មួយៗមានឃើញប្រពន្ធខ្ញុំនៅឯណាទេ ជួយចង្អុលប្រាប់ខ្ញុំផង (គាត់និយាយដូចពួកខ្ញុំស្គាល់ប្រពន្ធគាត់អីចឹង) ។
បងប្អូនខ្ញុំទាំង២នាក់ ពេលឮគាត់និយាយថា “ប្រពន្ធជ្រុះបាត់ពីលើម៉ូតូ” ក៏ខ្ញុំខំទប់សំណើច ហើយសួរគាត់វិញថា “អ៊ំទៅណាបានជាធ្វើឲ្យជ្រុះប្រពន្ធបាត់បែបនេះ។ ក្រោយពីគាត់រៀបរាប់ពីរាងរៅសម្បុរ ។ល។ ពួកខ្ញុំក៏សុំលេខទូរស័ព្ទ ថតរូបគាត់ ២-៣ ប៉ុស្តិ៍ ហើយនាំគ្នាជិះម៉ូតូជួយរក ។
ពួកខ្ញុំបានទៅដល់ម្តុំឡុងកុក ក៏ចាប់ផ្តើមចុះសាកសួរគេហែរៗ… ក្រោយមកជួបអ្នកលក់ទំនិញក្បែរផ្លូវមួយ គេក៏ចង្អុលទៅចំអ៊ំស្រីម្នាក់អាយុប្រមាណ ៦៣ឆ្នាំ កំពុងអង្គុយ ហើយក្បែរខ្លួនគាត់ មានកញ្ចប់របស់របរ និងមួកសុវត្ថិភាព ។
ក្រោយពេលសាកសួរបញ្ជាក់ដឹងច្បាស់ថា ជាអ៊ំស្រី ត្រូវបាន “ជ្រុះតាមផ្លូវ” ពួកយើងក៏ទូរស័ព្ទទៅប្រាប់អ៊ំប្រុសឲ្យមកទទួលយក ។
ពុទ្ធោអើយ! ពិតជារំភើបណាស់ ខណៈពេលដែលគាត់ទាំង២ ជួបគ្នា ។ ពួកគាត់មានអកប្បកិរិយាដូចបែកគ្នាយូរណាស់អីចឹង ។ អ៊ំប្រុសស្ទុះមកចាប់ដៃអ៊ំស្រី ហើយនិយាយទាំងដង្ហក់ថា ៖ “បងស្មានថា វង្វេងបាត់អូនហើយណា៎ ។ តាមរកអស់២ឃុំហើយតែមិនឃើញសោះ! ភ័យខ្លាំងណាស់! ។
បងប្អូនទាំង ២ ដែលជួយរកនោះនិយាយថា ៖ ពេលសំឡឹងឃើញប្តីប្រពន្ធវ័យចំណាស់ទាំង២ ទើបរកឃើញគ្នាក្រោយ “ជ្រុះបាត់” វង្វេងគ្នានោះ អ្នកណាៗក៏ជួយអរ ហើយរំភើបពីការយកចិត្តទុកដាក់នឹងគ្នា ពិសេសកែវភ្នែកពួកគាត់ពេលសំឡឹងមើលគ្នា ។ ពួកខ្ញុំក៏ជម្រាបលាពួកគាត់ គាត់ពោលខ្លាំងៗថា “ថ្ងៃណាទៅដល់វិញទៀង (លំនៅដ្ឋានគាត់) កុំភ្លេចចូលផ្ទះអ៊ំពិសារស្រា អរគុណណា៎!” ។
តាមពិតទៅអ៊ំស្រីនិយាយប្រាប់ទើបច្បាស់ គឺគាត់បានឈប់ម៉ូតូចាក់សាំង រួចក៏ឡើងម៉ូតូបើកទៅតែម្តង ពុំមាន “ជ្រុះអ្វីទេ” ។ ប៉ុន្តែប្រហែលគាត់ភ្លេចភ្លាំង ហើយភ័យផង ទើបទៅជាបែបនេះ ។
អ្នកខមិនម្នាក់ បាននិយាយបែបកំប្លែងថា ៖ “រឿងភ្លេចភ្លាំងពុំមែនទាល់តែចាស់ទើបភ្លេចទេ! ។ តាំងពីជំនាន់ពុំទាន់មានទូរស័ព្ទចល័ត ឪពុកខ្ញុំបានឌុបម្តាយខ្ញុំ ហើយក៏ចូលចាក់សាំង រួចឡើងម៉ូតូទៅចោលបាត់ ។ ម្តាយខ្ញុំប្រញាប់ “តោងម៉ូតូឌុប” ១ក្បែរនេះប្រដេញតាម ។ ឪពុកខ្ញុំបើកលឿនណាស់ ទម្រាំតាមទាន់ គឺត្រូវបើកដល់ ២០ Km ឯណោះ ។
ប៉ុន្តែគ្មានរឿងរំភើបអ្វីទេ! ពេលតាមទាន់ម្តាយរបស់ខ្ញុំបានច្រៀង “ចម្រៀង” ២-៣បទ ឲ្យឪពុកខ្ញុំស្តាប់ រហូត… ផ្អើលគេឯង!” ៕ លីសា