បុគ្គលិកម្នាក់ ដែលបំរើការនៅកន្លែងរក្សាសព ស្ថិតក្នុងតំបន់ Jefferson County នៃរដ្ឋតិចសាស សហរដ្ឋអាមេរិច ត្រូវបានបុគ្គលិកដូចគ្នា ច្រឡំដឹកគាត់យកទៅបូជា ខណៈពេលគាត់កំពុងតែដេកលង់លក់។
ប៉ូលីសបញ្ជាក់ថា លោក Henri Paul Johnson អាយុ ៤៨ឆ្នាំ បានដេកលក់នៅលើរទេះរុញ សម្រាប់ឲ្យអ្នកជំងឺដេក ដោយសារតែអស់កម្លាំងពេក បន្ទាប់ពីធ្វើការអស់រយៈពេល ៦ម៉ោងជាប់គ្នា។
ខណៈពេលគាត់កំពុងដេកលក់ មានបុគ្គលិកម្នាក់ទៀត យល់ច្រឡំថា គាត់ជាសាកសពរបស់បុរសវ័យ ៥២ឆ្នាំម្នាក់ដែលស្លាប់ក្នុងគ្រោះថ្នាក់ចរាចរណ៍ រួចក៏បានរុញគាត់ទៅកន្លែងបូជា។
តែជាអកុសល មុនពេលដឹងថា ជារឿងច្រឡំសាកសព គាត់ត្រូវបានគេរុញដាក់ចូលក្នុងឈាបនដ្ឋានទៅហើយ និងបានតម្លើងកម្តៅខ្លាំងរហូតដល់ ១.៨០០អង្សារ ហើយខ្លួនគាត់ក៏បានក្លាយទៅជាផេះទៅហើយ។
ស្ត្រីម្នាក់ឈ្មោះ Jenna Davis ដែលជាបុគ្គលិកធ្វើការជាមួយនឹងលោក Henri Paul Johnson បាននិយាយថា គាត់បានលឺសម្លេងស្រែកយំប្រហែល ១៥វិនាទី បន្ទាប់ពីគេដំណើរការឈាបនដ្ឋាន។
អ្នកស្រីបញ្ជាក់ថា “ដំបូង ពួកយើងមិនដឹងសោះថា សម្លេងចេញមកពីខាងណា ប៉ុន្តែនៅពេលពួកយើងដឹង វាយឺតពេលបាត់ទៅហើយ។ ពួកយើងបានបិទបន្ថយកម្តៅ ប៉ុន្តែគាត់បានស្លាប់បាត់ទៅហើយ”។
អ្នកស្រីបន្ថែមថា បុគ្គលិកដែលធ្វើការច្រឡំនោះ ជាបុគ្គលិកថ្មី ដែលភ្លេចពិនិត្យមើលសាកសពឲ្យបានច្បាស់លាស់។
បន្ទាប់ពីមានហេតុការណ៍កើតឡើង ប៉ូលីសបានធ្វើការស៊ើបអង្កេត ដើម្បីដឹងពីមូលហេតុនៃការច្រឡំដុតលោក Henri Paul Johnson។
បុរសវ័យក្មេង ដែលធ្វើការមិនប្រយ័ត្ននោះ អាចប្រឈមនឹងការចោទប្រកាន់ពីបទឧក្រិដ្ឋកម្ម៕ សុភ័ក្ត្រ
ប្រភព៖ worldnewsdailyreport
