ការឃ្លាតឆ្ងាយពីប្រពន្ធកូន បងប្អូនសាច់ញាតិ និង មិត្តភក្តិ គឺជាវេលាដ៏ជូរចត់មួយ សម្រាប់ពលករចំណាកស្រុកនៅឯប្រទេសគេ ។ ប៉ុន្តែ ឆ្លៀតក្នុងឱកាសនោះ ក៏មានមនុស្សប្រុសស្រីមួយចំនួនបែរជាមានចិត្តផិតក្បត់ លួចមានទំនាក់ទំនងស្នេហាជាមួយដៃគូខាងក្រៅ តាមរយៈបណ្តាញសង្គម ឬ ដោយផ្ទាល់ នៅឯទីកន្លែងធ្វើការរបស់ពួកគេ ។
ជាក់ស្តែង បុរសជាពលករជនជាតិហ្វីលីពីនម្នាក់នេះ បានហ៊ានក្បត់ចិត្តប្រពន្ធកូនដែលខំនឹករលឹកយ៉ាងខ្លាំង ទៅមានស្រីថ្មីនៅឯទឹកដីប្រទេសដែលខ្លួនកំពុងធ្វើការ ហើយថែមទាំងបង្ហោះរូបថតបង្ហាញពីភាពផ្អែមល្ហែមនឹងគ្នាឥតលាក់លៀម បញ្ឈឺចិត្តប្រពន្ធទៀត នៅលើបណ្តាញសង្គម ។ ប៉ុន្តែ បើទោះជាបានឃើញស្តែងនឹងភ្នែកយ៉ាងនេះក្តី ក៏ប្រពន្ធរបស់គាត់ពុំសម្តែងការខឹងសម្បារ យកទោសពៃនោះទេ និងសូម្បីអនុញ្ញាតឲ្យគាត់ធ្វើតាមចិត្តសប្បាយជាមួយស្រីថ្មីជាជនបរទេសនោះចុះទៀតផង ។
យោងតាមប្រភពព័ត៌មាន បានឲ្យដឹងថា ស្ត្រីជាប្រពន្ធម្នាក់ឈ្មោះ Maica Tidoy និងប្តីរបស់នាងដែលពុំត្រូវបញ្ចេញឈ្មោះ ពួកគេមានកូនតូច២នាក់ ហើយម្នាក់ក្នុងចំណោមពួកគេ នៅពុំទាន់ដឹងក្តីនៅឡើយទេ នៅពេលប្តីរបស់នាងចាកចោលទៅធ្វើការនៅឯប្រទេសចិន ។
យោងតាមការបង្ហោះរបស់ Maica នោះនាងពុំបានសម្តែងការអាក់អន់ចិត្តចំពោះប្តីរបស់នាងទេ ។ នាងអាចអភ័យទោសដល់គាត់គ្រប់បែបយ៉ាង និងសូម្បីអនុញ្ញាតធ្វើអ្វីៗសប្បាយចិត្ត ។ នាងក៏បានបញ្ជាក់ថា នេះចាត់ទុកជាផ្នែកដ៏ឈឺចាប់បំផុតមួយ ក្នុងចំណោមរឿងរាប់ភ្លេចផ្សេងៗទៀត ខណៈដែលពួកគេទាំងពីរបានរួមរស់ជាប្តីប្រពន្ធនឹងគ្នាអស់រយៈពេល ៧ ឆ្នាំ មកនេះ មុនពេលរស់នៅដាច់ឆ្ងាយពីគ្នាបែបនេះ ។
ប្តីរបស់នាងបានប្តូររូប profile របស់គាត់ជាមួយមិត្តស្រីបរទេសថ្មី ដោយសរសេរចំណងជើងថា៖ «សូមឲ្យពួកយើងក្លាយជាប្តីប្រពន្ធដ៏ល្អនឹងគ្នា ដែលមនុស្សគ្រប់គ្នាស្អប់ទៅចុះ» ។
តាមរយៈនេះ អ្នកលេងអ៊ិនធើរណែតជាច្រើនបានកោតសរសើរចំពោះភាពក្លាហាន និងភាពឯករាជ្យរបស់ Maica យ៉ាងខ្លាំង ។ ព្រោះថា កម្រមានមនុស្សណាដែលអាចធ្វើចិត្តធ្ងន់ និងបណ្តែតបណ្តោយប្តីឲ្យធ្វើរឿងដ៏ឈឺចាប់នេះដាក់ពួកគេដោយស្រួលៗបែបនេះឡើយ ៕
ដោយ៖ ឧត្តម
ប្រភព៖ nobledrift