កំពង់ស្ពឺ ៖ ក្រុមចោរត្រកូល “ផន” មានបក្ខពួក៥នាក់ ត្រូវជាបងប្អូនបង្កើត ដែលល្បីល្បាញធ្វើសកម្មភាពលួច និងប្លន់ម៉ូតូ ឆ្លងខេត្ដ រាប់សិបករណីមិនអស់ ត្រូវបានកម្លាំងមហាជន សហការជាមួយសមត្ថកិច្ច នគរបាលខេត្តកំពង់ស្ពឺ ខេត្តកំពត ឃាត់ខ្លួនបាន ២នាក់ ដកហូតវត្ថុតាង ម៉ូតូ ៣គ្រឿង។
បច្ចុប្បន្នមុខសញ្ញាសង្ស័យទាំងពីរនាក់ រួមជាមួយវត្ថុតាង ជំនាញស្រុកបសេដ្ឋ បានប្រគល់ឲ្យទៅអធិការដ្ឋាននរគបាលស្រុកជុំគីរី ខេត្តកំពត កសាងសំណុំរឿងបញ្ជូនទៅស្ថាប័នអយ្យការ ដើម្បីចាត់ការតាមនីតិវិធីច្បាប់ កាលពីថ្ងៃទី២១ ខែតុលា។
សូមបញ្ជាក់ថា ស្នងការដ្ឋាននគរបាលខេត្តកំពង់ស្ពឺ បានឲ្យដឹងថា នៅថ្ងៃទី២០ ខែតុលា ឆ្នាំ២០១៨នេះ កម្លាំងសមត្ថកិច្ចនគរបាល អាជ្ញាធរ បានសហការចូលរួមបង្ក្រាបមុខសញ្ញាចោរលួច ប្លន់ដ៏សកម្ម (ត្រកូលផន)ក្នុងកិច្ចប្រតិបត្ដិការពួនស្ទាក់គឺ ចាប់ផ្តើមពីម៉ោង ៩ ព្រឹក អូសបន្លាយរហូតមកទល់ម៉ោង ១៤និង២៥នាទី ស្ថិតនៅចំណុចភូមិព្រៃពាយ ឃុំទួលអំពិល ស្រុកបសេដ្ឋ ទើបឃាត់មុខសញ្ញា ២នាក់បាន ១-ឈ្មោះ ផន សាវ ហៅ ចយ ភេទ ប្រុស អាយុ២៩ឆ្នាំ នៅភូមិស្រែលាវ ឃុំត្រពាំងឃ្លាំង ស្រុកកឈូក ខេត្តកំពត មុខរបរ មិនពិតប្រាកដ និងឈ្មោះ ផន រុន ហៅគ្រាប់ស្ករ ភេទប្រុស អាយុ ២៧ឆ្នាំ មុខរបរ មិនពិតប្រាកដ [ជាប់ពាក់ព័ន្ធនិងបទល្មើសជាច្រើននៅក្នុងឃុំមួយចំនួននៃស្រុកបសេដ្ឋ] មានទីលំនៅឃុំទួលអំពិល ស្រុកបសេដ្ឋ ខេត្តកំពង់ស្ពឺ ។
សូមរំលឹកថា កាលពីថ្ងៃទី១២ ខែមិថុនា ឆ្នាំ២០១៨ កន្លងមកនេះ វេលាម៉ោង១៣ និង១៥នាទី កម្លាំងជំនាញសហការបង្ក្រាបមុខសញ្ញាលួចកាច់សោ ក ម៉ូតូ ២នាក់ គឺ ឈ្មោះ ផន សាវ ហៅ ផន ចយ ត្រូវជាប្អូន និងឈ្មោះ ផន រុន ភេទប្រុស អាយុ ២៨ ឆ្នាំ ប្រតិបត្តិការខាងលើ ដកហូតវត្ថុតាងបានម៉ូតូ ចំនួន ៣គ្រឿង ១-ម៉ាក Honda SL ពណ៌ខ្មៅ ស្លាកលេខ 1CR 2025 ភ្នំពេញ លេខតួ១០ -០១០៩៧ លេខម៉ាស៊ីន១០០១០៩៥ ២- ម៉ូតូម៉ាកsuzuki ពណ៌ស ខ្មៅ ក្រហម ស្លាកលេខ1S-0926 ភ្នំពេញ លេខតួ លេខម៉ាស៊ីន រលប់ ៣- សង់កូរ៉េ ពណ៌ស្លាទុំ គ្មានស្លាកលេខ លេខតួ លេខ ម៉ាស៊ីន រលុបអស់៕ ដោយ៖បញ្ញាស័ក្តិ
