កាលពីរសៀលថ្ងៃទី១៩ ខែតុលា មនុស្ស៣នាក់ត្រូវបានរាយការណ៍ថា បានស្លាប់ ខណៈ ១២ នាក់ផ្សេងទៀត នៅតែបាត់ខ្លួន នៅក្នុងហេតុការណ៍គ្រោះធម្មជាតិបាក់ដី ដែលបានវាយប្រហារទៅលើកុងតឺន័រចំនួន ៤ ដែលត្រូវបានប្រើប្រាស់ជាផ្ទះរបស់កម្មករ នៅកន្លែងការដ្ឋានសំណង់មួយ ។ ហេតុការណ៍នេះបានកើតឡើងនៅតំបន់ Jalan Bukit Kukus, ទីក្រុង Paya Terubong រដ្ឋ Penang ប្រទេសម៉ាឡេស៊ី កាលពីវេលាម៉ោង ១ និង៥៦ នាទី ។
យោងតាម The Star សាកសពដំបូង ក្នុងចំណោម៣ ត្រូវបានរកឃើញនៅវេលាម៉ោង ៣ និង ៤០ នាទី ។ នេះបើតាមសារ WhatsApp ពីនាយកដ្ឋានពន្លត់អគ្គីភ័យ និងសង្គ្រោះរដ្ឋ Penang បញ្ចេញឲ្យដឹង ។
ព័ត៌មានដំបូងបានបង្ហាញថា មនុស្ស ៣០ នាក់ អាចត្រូវបានកប់ទាំងរស់ ។ បាក់ដីគ្រប់លើតំបន់នោះត្រូវបានប៉ានស្មានមានទំហំទទឹង ៦០ ម៉ែត្រ និងបណ្តោយ ១៥០ ម៉ែត្រ ។
កម្មករសំណង់ឥណ្ឌូនេស៊ីម្នាក់ឈ្មោះ Endo អាយុ ៣៦ ឆ្នាំ បាននិយាយថា ៣ នៃសមាជិកគ្រួសាររបស់គាត់ មកពី Sulawesi ត្រូវបានជាប់គាំង ។
គាត់និយាយថា៖ «៣នាក់ក្នុងចំណោមពួកគេ ដែលមានវ័យស្របាលៗគ្នា ៣០ ឆ្នាំ កំពុងស្ថិតនៅក្នុងនោះ ហើយខ្ញុំបានរកឃើញម្នាក់ក្នុងចំណោមពួកគេត្រូវជាប់គាំងនៅក្នុងកុងតឺន័រ ។ ខ្ញុំគ្មានវិធីអ្វីសង្គ្រោះពួកគេ ក្រៅតែពីបន់ស្រន់សូមឲ្យពួកគេសុវត្ថិភាពប៉ុណ្ណោះឯង» ។
សូមបញ្ជាក់ថា មេឃបានធ្លាក់ភ្លៀងយ៉ាងខ្លាំង ចាប់តាំងពីថ្ងៃទី១៨ តុលា ហេតុនេះ បានធ្វើឲ្យតំបន់នេះពោរពេញទៅដីភក់យ៉ាងធ្ងន់ធ្ងរ ។
ទោះយ៉ាងណា រហូតមកទល់ពេលនេះ ប្រតិបត្តិការស្រាវជ្រាវ និងសង្គ្រោះ នៅតែកំពុងបន្តស្វែងរកជនរងគ្រោះដែលកំពុងបាត់ខ្លួន ។ ហើយទន្ទឹមនោះផងដែរ អ្នកនៅមានជីវិតក៏ត្រូវបានបញ្ជូនទៅសង្គ្រោះនៅឯមន្ទីរពេទ្យ ៕
ដោយ៖ ឧត្តម
ប្រភព៖ Worldofbuzz