ភ្នំពេញ ៖ បងប្អូនប្រជាពលរដ្ឋដែលរស់នៅក្នុងសហគមន៍វិមានទ្រង់ ( សហគមន៍នគរថ្មី ) ចំនួន៨៣៧គ្រួសារ ទទួលបានវិញ្ញាបនបត្រសម្គាល់ម្ចាស់អចលនវត្ថុ ដែលជាអំណោយរបស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ដែលពិធីនេះនាព្រឹកថ្ងៃចន្ទទី២២ ខែតុលា ឆ្នាំ២០១៨នេះ ក្រោមអធិបតីភាពលោក ឃួង ស្រេង អភិបាល អភិបាលរាជធានីភ្នំពេញស្ថិតនៅភូមិវិមានទ្រង់ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។
លោកឃួង ស្រេង បានមានប្រសាសន៍លើឡើងថា ទម្រាំបានឈានមកដល់ដំណាក់កាលផ្តល់ ប័ណ្ណកម្មសិទ្ធិស្របច្បាប់នេះ គឺយើងបានខិតខំប្រឹងប្រែងជាច្រើន ដើម្បីភាពសុខដុមនីយកម្មរបស់ប្រជាពលរដ្ឋ ហើយសុំឲ្យបងប្អូនរក្សាប័ណ្ណនេះ ឲ្យបានល្អនិងប្រើប្រាស់ឲ្យមានប្រសិទ្ធភាព។
លោកអភិបាលបានមានប្រសាសន៍បន្តទៀតថា ការចុះបញ្ជីដីធ្លី បានផ្តល់នូវសារប្រយោជន៍២យ៉ាង ដល់រដ្ឋយើងផង និងដល់ប្រជាពលរដ្ឋផង។ ចំពោះប្រជាពលរដ្ឋ គឺធានាបាននូវភាពកក់ក្តៅ សុវត្ថិភាពដីធ្លី និងសិទ្ធិកាន់កាប់ដីធ្លីពេញលេញជូនប្រជាពលរដ្ឋ ហើយវិញ្ញាបនបត្រសម្គាល់អចលនត្ថុ គឺមានសារសំខាន់សម្រាប់ជាភស្តុតាង នូវការកាន់កាប់ដីធ្លីរបស់ខ្លួន និងជៀសវាងការរំលោភបំពានលើដីធ្លី។ ប័ណ្ណនេះ ក៏អាចផ្តល់លទ្ធភាពដល់បងប្អូនប្រជាពលរដ្ឋ ដើម្បីយកទៅដាក់ធនាគារ ក្នុងការខ្ចីលុយ យកមកប្រកបរបរអាជីវកម្មផ្សេងៗ។ ចំពោះរដ្ឋវិញ ការចុះបញ្ជីដីធ្លីនេះ ផ្តល់លទ្ធភាពយ៉ាងធំធេង ក្នុងការគ្រប់គ្រងដីធ្លី និងរៀបចំសណ្តាប់ធ្នាប់ល្អប្រសើរ និងសម្រួលដល់ការធ្វើផែនការ ប្រើប្រាស់ដីធ្លី បានសមស្រប កាត់បន្ថយទំនាស់ដីធ្លី។
ក្នុងឱកាសនោះដែរ លោកឃួង ស្រេង ក៏បានរំលឹកឡើងវិញ នូវប្រសាសន៍របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានលើកឡើង ក្នុងកិច្ចប្រជុំកំពូលមេគង្គ.ជប៉ុនលើកទី១០ ដែលទើបបញ្ចប់ទៅនាពេលថ្មីៗនេះ ពីការមិនដោះដូរ អធិបតេយ្យភាពជាតិ ជាមួយបរទេស ការមិនយកសន្តិភាព របស់ប្រទេស ទៅដោះដូរជាមួយជំនួយ ហើយសម្តេចតេជោ បានបញ្ជាក់ ជំហរយ៉ាងច្បាស់ថា កម្ពុជា ត្រូវប្រឹងរស់ងើបឈរឡើង ដើម្បីការពារឯករាជ្យ អធិបតេយ្យ និងសន្តិភាពរបស់ប្រទេស៕ ដោយ ៖ កូឡាប
