ខេត្តព្រះសីហនុ៖ កោះរ៉ុង ជាកោះធម្មជាតិ ដែលមានទឹកសមុទ្រពណ៌ខៀវស្រងាត់ និងមាន ទេសភាពមានសោភ័ណ្ឌភាពស្រស់ស្អាតប្លែក បើប្រៀបធៀបនឹងកោះមួយចំនួនទៀត នៅលើទឹកដីមូលដ្ឋានខេត្តព្រះសីហនុ។
ឯកសារខ្លះបានបង្ហាញថា កោះរ៉ុង ក៏ត្រូវបានគេចាត់ទុក ជាកោះមានឆ្នេរខ្សាច់ស្រស់ស្អាត បំផុតនៅឥណ្ឌូចិនថែមទៀតផង។
តាមឯកសារមន្ទីរទេសចរណ៍ខេត្តព្រះសីហនុ បង្ហាញថា កោះរ៉ុងជាកោះមួយ មានចម្ងាយប្រមាណ ២៥គីឡូម៉ែត្រ ពីឆ្នេរសមុទ្រក្រុងព្រះសីហនុ មានផ្ទៃដីគ្របដណ្តប់ ៧៨គីឡូម៉ែត្រការ៉េ មានបណ្តោយប្រវែង១៥គីឡូម៉ែត្រ ទទឹងប្រមាណ ៩គីឡូម៉ែត្រ និងមានចំណុចខ្ពស់បំផុត របស់កោះមាន កម្ពស់ ១៣៣ម៉ែត្រពីនីវ៉ូទឹកសមុទ្រ។
ប្រសិនបើធ្វើដំណើរពីកំពង់ផែក្រុងព្រះសីហនុ ឆ្ពោះទៅកាន់កោះរ៉ុងតាមមធ្យោបាយ អូប័រ ឬទូកល្បឿនលឿន អាចត្រូវប្រើពេលប្រមាណពី ២០ ទៅ ៣០នាទី នឹងបានទៅដល់កោះរ៉ុងជាមិនខាន៕ ដោយ ៖ ដែនសីមា