កាលពីថ្ងៃទី២២ តុលា ម្សិលមិញនេះ ទំព័រហ្វេស៊បុកឈ្មោះ Sarawak Viral បានចែករំលែករឿងរ៉ាវដ៏គួរឲ្យហួសចិត្តមួយ ដែលបង្ហាញឲ្យឃើញយុវជន២នាក់ រុំខ្លួនរបស់ពួកគេជាមួយក្រណាត់ស ដើម្បីឲ្យមើលទៅដូចខ្មោច និងដូចក្នុងខ្សែភាពយន្ត Pocong 2… ដើម្បីលេង «បន្លាច» អ្នកដទៃនៅក្នុងភូមិនៅឥណ្ឌូនេស៊ី ខណៈធ្វើដំណើរឆ្លងកាត់នៅពេលយប់ៗ ។
ប៉ុន្តែ ចុងក្រោយ ពួកគេត្រូវបានចាប់ខ្លួនដោយអ្នកភូមិ ។ ហើយដើម្បីជាការដាក់ទណ្ឌកម្មទៅលើពួកគេ ពួកគេត្រូវបាននាំយកទៅកាន់ទីបញ្ចុះសពនៅក្បែរនោះ និងបញ្ជាឲ្យពួកគេដេកនៅទីនោះយប់ ដើម្បីឲ្យដឹងថាតើខ្មោចលងពិតប្រាកដព្រឺក្បាលប៉ុណ្ណា ។
ជាមួយនឹងការដាក់ទណ្ឌកម្មនេះផងដែរ អ្នកលេងអ៊ិនធើរណែតជាច្រើនបានចូលខមិនលើកឡើងយ៉ាងដូច្នេះថា៖ «មិនគួរអនុញ្ញាតឲ្យពួកគេដេកជិតគ្នានោះទេ ពុំនោះសោត ពួកគេប្រាកដជាអាចនិយាយឆ្លើយឆ្លងគ្នាបាន ហើយពុំមានអារម្មណ៍ភ័យខ្លាច ដូចដែលពួកគេដើរ ‘លងបន្លាច’ គេឯង» ៕
ដោយ៖ ចន្ទី
ប្រភព៖ Worldofbuzz