ល្ងាចម្សិលមិញនេះ(ថ្ងៃ២៣តុលា) លោក Nguyễn Phú Trọng អគ្គលេខាធិការមជ្ឈិមបក្សកុម្មុយនិស្សវៀតណាម ត្រូវបានតែងតាំងជាប្រធានរដ្ឋវៀតណាម បន្ទាប់ពីទទួលបានការបោះឆ្នោតគាំទ្ររបស់រដ្ឋសភាប្រទេសនេះ។
មុននេះ ប្រព័ន្ធដឹកនាំវៀតណាមផ្អែកលើបង្គោល៤ ក្នុងការដឹកនាំប្រទេសគឺ៖ អគ្គលេខាធិការបក្ស ប្រធានរដ្ឋ ប្រធានរដ្ឋសភា និងនាយករដ្ឋមន្ត្រី ។ អគ្គលេខាធិការបក្សក៏ជាមេដឹកនាំកំពូលរបស់កងទ័ព ដោយកាន់កាប់តំណែងជាគណៈលេខាយោធាមជ្ឈិម ។
វាដូចគ្នានឹងប្រព័ន្ធដឹកនាំនៅប្រទេសចិន ដែលអំណាចដឹកនាំរបស់បក្សនិងរដ្ឋ ព្រមទាំងកងកម្លាំងប្រដាប់អាវុធស្ថិត នៅក្នុងកណ្ដាប់ដៃមនុស្សម្នាក់ ។
នេះគឺជារបត់នយោបាយមួយថ្មី បន្ទាប់ពីប្រព័ន្ធដឹកនាំមុនដែលមានអាយុជាងកន្លះសតវត្ស។
លោក Nguyễn Phú Trọng បានទទួលការគាំទ្រពីរដ្ឋសភាស្ទើរតែ១០០ភាគរយដើម្បីក្លាយជាប្រធាននៃសាធារណរដ្ឋ សង្គមនិយមវៀតណាម៕សូយន
