ប្រភពព័ត៌មានចំនួន២ របស់ Sky News ឱ្យដឹងថា ផ្នែកមួយចំនួននៃសាកសពរបស់អ្នកកាសែតJamal Khashoggi ត្រូវបានរកឃើញ។
តាមប្រភពព័ត៌មាន ២ខាងលើ Jamal Khashoggi បានត្រូវកាត់ជាច្រើនចំណែក ផ្ទៃមុខរបស់លោកក៏ប្រែប្រួលខុសសណ្ឋានដើម។
ប្រភពមួយបង្ហើបពីកន្លែងរកឃើញនៃបំណែកខ្លះនៃសាកសព គឺស្ថិតនៅក្នុងសួនច្បារនៃកន្លែងស្នាក់នៅរបស់អគ្គកុងស៊ុល Saudi Arabia មានចម្ងាយពីស្ថានកុងស៊ុលនេះប្រមាណ៥០០ម៉ែត្រ។
ព័ត៌មានគួរឱ្យតក់ស្លុតនេះ ត្រូវបានប្រធានាធិបតីតួកគី Recep Tayyip Erdogan ថ្លែងឡើងក្នុងសុន្ទរកថានៅថ្ងៃទី២៣ តុលាម្សិលមិញនេះ ហើយលោកបានពណ៌នាការស្លាប់របស់ Khashoggi គឺជាករណីសម្លាប់មនុស្សយ៉ាងសាហាវព្រៃផ្សៃ ហើយត្រូវបានរៀបចំផែនការយ៉ាងល្អិតល្អន់។មេដឹកនាំរូបនេះបានអះអាងថា អ្នកចេញបញ្ជាឱ្យធ្វើឃាត ចាំបាច់ត្រូវនាំយកមកកាត់ទោស៕លីសា