ហេតុការណ៍ចម្លែកមិនធ្លាប់មាននេះ បានកើតឡើងនាមង្គលការមួយ នាទីក្រុងវ៉េនចូ ខេត្តជឺជាំង ប្រទេសចិន កាលពីថ្ងៃទី១៦ ខែតុលាកន្លងមក។
នៅពេលពិធីមង្គលការប្រព្រឹត្តទៅបានមួយសន្ទុះ ទើបភ្ញៀវចូលរួមមានការងឿង ឆ្ងល់និងស្រឡាំងកាំង ព្រោះឃើញកូនកំលោះឈរទទួលភ្ញៀវជាមួយឳពុកម្តាយទាំងសងខាង។ពួកគេរង់ចាំបន្តិចហើយបន្តិចទៀត តែពុំឃើញស្រមោលកូនក្រមុំសោះឡើយ។
ប្រហែលជាឃើញភ្ញៀវចូលរួមទ្រាំលែងបានទៀត កូនកំលោះក៏យកទូរស័ព្ទមកចុចលេខ ហើយឆ្លើយប្រាប់កូនក្រមុំថា ភ្ញៀវគេកំពុងតែស្វែងរក។ អាថ៌កំបាំងក៏ត្រូវបានបើកកកាយនៅពេលនោះ។
តាមពិតទៅ កូនក្រមុំទើបសម្រាលកូនរួចនៅឯមន្ទីរពេទ្យ។ មុននោះ នាងបានគិតពេលវេលាកើតខុសដល់ទៅមួយខែ ទើបនៅព្រឹកថ្ងៃរៀបចំមង្គលការ នាងត្រូវទៅមន្ទីរពេទ្យព្រោះឈឺពោះសម្រាលកូន។ ហេតុនេះកូនកំលោះគ្មានជម្រើសអ្វីក្រៅពីរៀបចំមង្គលការតែម្នាក់ឯង ខណៈពេលកូនក្រមុំត្រូវសម្រាលកូននៅឯមន្ទីរពេទ្យ។
ទោះយ៉ាងណា ភ្ញៀវកិត្តិយសក៏បានជូនពរដល់ពួកគេដែលពិតជាមានសំណាង ព្រោះគ្រាន់តែរៀបការភ្លាម បានកូនមួយភ្លែត៕លីសា