មណ្ឌលគិរី ៖ រឿងរបស់បុគ្គលឈ្មោះ សៀង ស៊ីណា ជាមន្ត្រីមន្ទីរបរិស្ថាន ខេត្តមណ្ឌលគិរី បានបង្កឲ្យមានការចាប់អារម្មណ៍ ជាខ្លាំង សម្រាប់មន្ត្រីរាជការនៅ ខេត្តមណ្ឌលគិរី ដែលមានការផ្លាស់ប្តូរមុខតំណែងការងារ យើងច្រើនកន្លែងនាពេលកន្លងមក ពីស្ថាប័នមួយទៅស្ថាប័នមួយទៀត មិនចេះចប់មិនចេះហើយ ហើយបុគ្គលឈ្មោះ សៀង ស៊ីណានៅតែឈរយ៉ាងរឹងមាំ ក្នុងមួយដែលសម្បូរព្រៃឈើមួយនេះ ។
ប្រជាពលរដ្ឋ បានបង្ហើបថា បុគ្គលរូបនេះ មានចំណេះដឹងតិចតួច ពិសេសលើអក្សរសាស្ត្រខ្មែរ តែគាត់អាចឈរជើងបានយ៉ាងរឹងមាំ ក្នុងមន្ទីរបរិស្ថានខេត្តមណ្ឌលគិរី ។ ក្រសួងបរិស្ថាន តាំងពីជំនាន់លោកម៉ុក ម៉ារ៉េត ជារដ្ឋមន្ត្រី បានដកតំណែង តួនាទីលោកសៀងស៊ីណា ប៉ុន្តែ លោកសៀង ស៊ីណា នៅតែអាចត្រឡប់វិលមក កាន់តំណែងការងារ ក្នុងមន្ទីរបរិស្ថាន ខេត្តមណ្ឌលគិរីវិញបានដដែលព្រោះតែអំណាចទឹកប្រាក់ ជាមួយថ្នាក់ដឹកនាំខេត្តនេះ ។
កាលពីជំនាន់លោកម៉ុក ម៉ារ៉េត ជារដ្ឋមន្ត្រីក្រសួងបរិស្ថាន នោះ គឺបុគ្គលឈ្មោះ សៀង ស៊ីណា ត្រូវបានដកតំណែងពីមន្ទីរបរិស្ថានខេត្តមណ្ឌលគិរី ដោយសារតែបុគ្គលរូបមិនសូវចេះអក្សរ និងធ្វើការងារចេះតែខុស ឲ្យមកឈរជើងនៅទីស្តីការក្រសួងបរិស្ថាន ។ ប៉ុន្តែដោយសៀង ស៊ីណា មិនសូវចេះអក្សរ ក៏បានរកវិធីត្រឡប់មកខេត្តមណ្ឌលគិរីវិញ ដោយបានតួនាទីជាអនុប្រធានមន្ទីរបរិស្ថានដដែល ។ ក្នុងនាមជាមន្ត្រី ដែលមានការចេះដឹងតិចតួច ប៉ុន្តែមានមហិច្ឆតាចង់ធ្វើធំនាំឲ្យមានកំហុសជាច្រើន ទើបក្រសួងបរិស្ថាន សម្រេចដកលោកសៀង ស៊ីណា ពីអនុប្រធានមន្ទីរឲ្យមកជាមន្ត្រីធម្មតា ។ ក្រោយមក ដោយសារមានបញ្ហាម្តងទៀត លោកសៀង ស៊ីណា បានផ្ទេរចេញពីក្រសួងបរិស្ថាន ទៅនៅក្រសួងមហាផ្ទៃ ។ បានមួយចំអិនកំពិស លោកបានវិលត្រឡប់មកវិញ ក្នុងនាមជាអនុប្រធានការិយាល័យ ដែនជម្រកសត្វព្រៃកែវសីមា ដែលមានការចុះហត្ថលេខាកាលពីថ្ងៃទី៤ ខែតុលា ឆ្នាំ២០១៨ របស់លោកអភិបាលខេត្តស្វាយ សំអ៊ាង ។
សាលាខេត្តមណ្ឌលគិរី មានការចាប់អារម្មណ៍ជាច្រើន ចំពោះការលូកដៃកកូរកកាយបញ្ហាផ្ទៃក្នុង នៅតាមមន្ទីរ ។ ការដកដាក់មន្ត្រីនៅក្នុងមន្ទីរបរិស្ថាន បណ្តាលឲ្យបាត់ឈ្មោះមន្ត្រីម្នាក់ ដែលមានកាំប្រាក់ និងតួនាទីត្រឹមត្រូវ ដែលក្រសួងមុខងារសាធារណៈទទួលស្គាល់ ។ គេមិនដឹងថា តើបែបបទការងាររបស់សាលាខេត្តមណ្ឌលគិរី យ៉ាងណានោះទេ ទើបបានជាលេបឈ្មោះមន្ត្រីម្នាក់ ដែលមានតួនាទីនៅក្នុងដែនជម្រកសត្វព្រៃកែវសីមា ប៉ុន្តែនៅក្នុងដីកាតែងតាំងថ្មី ចុះហត្ថលេខា ដោយលោកអភិបាលខេត្ត មិនឃើញឈ្មោះមន្ត្រីនោះទេ ។ គេមិនដឹងថា តើអំណាចឥទ្ធិពលលុយរបស់បុគ្គល សៀង ស៊ីណា ធ្វើឲ្យបាត់ឈ្មោះមន្ត្រីម្នាក់នោះឬយ៉ាងណា។
មន្ត្រីរាជការខេត្តមណ្ឌលគិរី និយាយថា ចំណាត់ការរបស់ថ្នាក់ដឹកនាំខេត្តនេះ មិនបានគោរពតាមផ្លូវច្បាប់នោះទេ ។ ការលេបឈ្មោះមន្ត្រីម្នាក់ គឺជារឿងដែលថ្នាក់ដឹកនាំខេត្តមានចេតនា ។ គេរំពឹងថា ក្រសួងមហាផ្ទៃពិនិត្យមើលលទ្ធភាពដឹកនាំការងារ របស់លោកស្វាយ សំអ៊ាងនោះផង ។ ពីព្រោះថា ក្រៅពីធ្វើឲ្យមន្ត្រីរាជការ ថ្នាំងថ្នាក់ ការដឹកនាំមិនមានប្រសិទ្ធភាព ទាល់តែសោះ ក្នុងការបង្ក្រាបបទល្មើសព្រៃឈើ និងត្រូវបានសម្តេចក្រឡាហោម ស្តីបន្ទោសផងដែរ។ ពាក់ព័ន្ធករណីនេះ មិនអាចទំនាក់ទំនងលោកស្វាយ សំអ៊ាង ដើម្បីសុំការភ្លឺបានទេ៕ ដោយ ៖ រចនា