លើលោកនេះពុំមែនមានតែមនុស្សទេដែលយល់អស់នូវអត្ថន័យរវាងមនោសញ្ចេតនាម្តាយនិងកូន។សូម្បីតែពពួកសត្វក៏វាយល់ពីមនោសញ្ចេតនាគ្រួសារដ៏ឧត្តុងឧត្តមនេះដែរ។
ឆ្កែមេនេះឈ្មោះAmanda វាពិតជារំលងចោលការភ័យខ្លាច សម្រុកចូលទៅក្នុងភ្នក់ភ្លើងដើម្បីសង្គ្រោះកូន
រូបភាពដ៏កម្រដែលអ្នកបានឃើញខាងក្រោម កើតឡើងពីការបំផ្ទុះគ្រាប់បែកយ៉ាងធ្ងន់ធ្ងរមួយកើតឡើងនៅឈីលី។ប៉ុន្តែអ្វីដែលផុសចេញពីសោកនាដកម្មអាណោចអាធ័មនេះ កឺរូបភាពឆ្កែញីមួយក្បាលបានប្រឹងប្រែងស្ទុះចូលក្នុងភ្នក់ភ្លើងដើម្បីសង្គ្រោះកូនទាំងឡាយរបស់វា។
តាមប្រភពចុះផ្សាយដោយកាសែត Daily Mail នៅឈីលី បានកើតឡើងករណីផ្ទុះគ្រាប់បែកមួយ។ ផ្ទះនិងរថយន្តត្រូវអគ្គិភ័យលេបត្របាក់។មេឆ្កែមួយក្បាលឈ្មោះAmanda ទើបកើតកូនបាន១០ថ្ងៃ ដែលហាក់ដូចជាមិនគិតដល់ជីតវិតខ្លួនបានរត់ចូលទៅក្នុងផ្ទះដែលកំពុងឆេះរួចពាំកូនវាចេញមកម្តងមួយៗ ក្រោមក្រសែភ្នែកមនុស្សម្នាកំពុងសម្លឹងមើល។
ក្តីស្រឡាញ់ចំពោះកូនក្នុងអំបូរសត្វក៏ធំធេងដូចមនុស្សអីចឹង
វាពិតជាឆ្លាតវៃ រហ័សរហួន ហើយក្លាហាន ដោយវារត់ចុះរត់ឡើងពាំកូនវាយកមកដាក់លើជណ្តើរនៃរថយន្តពន្លត់អគ្គិភ័យរហូតទល់ពេលដែលវាជញ្ជួនកូនទាំងអស់មកកាន់កន្លែងសុវត្ថិភាព។
ពេទ្យសត្វឈ្មោះ Felipe Lara បានប្រាប់អ្នកសារព័ត៌មានថា លោកមានបំណងទៅយកកូនរបស់ Amanda ទៅមើលថែ ស្រាប់តែវាបានបង្ហាញអាកប្បកិរិយារារាំង ប្រហែលជាវាគិតថាគេអាចធ្វើបាបកូនវា។
នេះពុំមែនជារឿងងាយស្រួលឡើយ ប៉ុន្តែដើម្បីកូនរបស់វា វាហ៊ានយកជីវិតទៅប្តូរ
មេឆ្កែបន្ទាប់ពីទុកដាក់កូនហើយ វាអង្គុយក្បែរនោះដោយបង្ហាញអាកប្បកិរិយាព្រួយបារម្ភយ៉ាងខ្លាំងចំពោះកូនៗដែលទើបកើត ។
រូបភាពទាំងនេះប្រហែលជានឹងដក់ជាប់អារម្មណ៍ចំពោះអ្នកដែលបានសម្លឹងឃើញសកម្មភាពនេះផ្ទាល់ភ្នែក។ ក្រោយមក Amanda និងកូនរបស់វាត្រូវបានគេបញ្ជូនទៅមន្ទីរពេទ្យសត្វ។គួរឱ្យអាណិតឆ្កែមេនេះណាស់ ព្រោះកូនមួយក្បាលបានរងការរលាកធ្ងន់ធ្ងរពេកក៏ងាប់បាត់ទៅ ចំណែកកូនឆ្កែ៤ទៀតពិតជាសំណាងដែលគ្មានរបួសអ្វីទាំងអស់។
ពេលនេះ Amanda មានសុវត្ថិភាពជាមួយកូនៗវាហើយ៕ សូយន