ភ្នំពេញ៖ ប្រធានអង្គភាពប្រឆាំងអំពើពុករលួយ បានបញ្ជាក់អំពីរបាយការណ៍សកម្មភាពនានាក្នុងខែវិច្ឆិកា លើករណីប្រកាសទ្រព្យសម្បត្តិ បំណុលរបស់មន្ត្រីសាធារណៈ ពាក្យប្តឹង និងការកោះហៅសាមីខ្លួនរងការចោទប្រកាន់មកឆ្លើយបំភ្លឺនៅអង្គភាព។
បើយោងតាមសេចក្តីជូនដំណឹង ស្តីពី កិច្ចប្រជុំលើកទី២៩ អាណត្តិទី២ នៃក្រុមប្រឹក្សាជាតិប្រឆាំងអំពើពុករលួយ ថ្ងៃទី១ ខែធ្នូ ឆ្នាំ២០១៧ ដែលមានលោកតុប សំ ប្រធានក្រុមប្រឹក្សាជាតិប្រឆាំងអំពើពុករលួយ ជាប្រធានអង្គប្រជុំ។ ក្នុងអង្គប្រជុំនោះ លោកទេសរដ្ឋមន្ត្រីឱម យ៉ិនទៀង ប្រធានអង្គភាពប្រឆាំងអំពើពុករលួយ បានថ្លែងអំពីសកម្មភាពការងាររបស់អង្គភាពក្នុងខែវិច្ឆិកាឆ្នាំ២០១៧ ទាក់ទងការប្រកាសទ្រព្យសម្បត្តិ និងបំណុលរបស់សមាជិករដ្ឋសភា និងមន្ត្រីសាធារណៈដែលមានអាណត្តិជ្រើសតាំង ដែលត្រូបបានបញ្ចប់តួនាទី។ អង្គភាពប្រឆាំងអំពើពុករលួយ នឹងជូនព័ត៌មានដល់តំណាងរាស្ត្រ និងក្រុមប្រឹក្សាឃុំសង្កាត់ ដែលត្រូវបានបញ្ចប់ការងារ អាចធ្វើការប្រកាសទ្រព្យសម្បត្តិ និងបំណុលមកអង្គភាពប្រឆាំងអំពើពុករលួយ តាមរយៈជនបង្គោលប្រឆាំងអំពើពុករលួយប្រចាំងនៅក្រសួង ស្ថាប័ន បុគ្គលណាដែលអាចជួយបញ្ជូនឯកសារនេះមកដល់អង្គភាពប្រឆាំងអំពើពុករលួយ ឬតាមរយៈប្រៃសណីយ៍ក៏បាន។
នៅក្នុងខែវិច្ឆិកានេះដែរ លោកទេសរដ្ឋមន្ត្រី បានបញ្ជាក់បន្ថែមថា អង្គភាពប្រឆាំងអំពើពុករលួយ បានទទួលពាក្យប្តឹងចំនួន៥០ពាក្យ ក្នុងនោះមានពាក្យប្តឹងអនាមិកចំនួន២៥ពាក្យ ស្នើនឹង៥០ភាគរយ ។ អង្គភាពបានឲ្យសាមីខ្លួនរងការចោទប្រកាន់ធ្វើការបំភ្លឺចំនួន១១លិខិត បានស្រាវជ្រាវលើបណ្តឹងចំនួន១៤បណ្តឹង និងបានឆ្លើយតបទៅម្ចាស់បណ្តឹងចំនួន៤៣ម្ចាស់បណ្តឹង ក្រោយស្រាវជ្រាវពាក្យប្តឹងរបស់គាត់មិនឃើញមានតម្រុយនៃអំពើពុករលួយទេ។
ទោះយ៉ាងណា លោកតុប សំ ក្រុមប្រឹក្សាជាតិប្រឆាំងអំពើពុករលួយ បានជំរុញនិងលើកទឹកចិត្ត គាំទ្រដល់អង្គភាពប្រឆាំងអំពើពុករលួយ ឲ្យបន្តការអនុវត្តផែនការយុទ្ធសាស្ត្រ ប្រឆាំងអំពើពុករលួយបន្ថែមទៀត៕ ដោយ៖កូឡាប
