កុមារា ស៊ាប ឈៀងហេង បានកំពុងធ្វើឲ្យអ្នកប្រើប្រាស់បណ្តាញសង្គមខ្មែរយើង កោតសរសើរយ៉ាងខ្លាំង និងចាត់ទុកថាជាទំពាំងស្នងប្ញស្សីដ៏កម្រមួយ បន្ទាប់ពីប្អូនប្រុសបានឡើងបញ្ចេញសមត្ថភាពដ៏អង់អាចក្លាហាន និងបញ្ចេញវោហាស័ព្ទជាមួយកំណាព្យ និងសុភាសិតអប់រំហូរដូចទឹកដ៏អស្ចារ្យ នៅក្នុងកម្មវិធី Cambodia’s Got Talent រដូវកាលទី២ វគ្គពាក់កណ្តាលផ្តាច់ព្រាត់ នៃសប្តាហ៍ទី៤ កាលពេលថ្មីៗនេះ ។
បន្ទាប់ពីបង្ហាញសមត្ថភាពដ៏វ័យឆ្លាត សូត្រកំណាព្យ និងសុវភាសិតយ៉ាងរលូន និងលេងសើចជាមួយគណៈកម្មកាប្រកបដោយការគោរព និងសុជីវធម៌ កុមារា ស៊ាប ឈៀងហេង បានបង្ហើបប្រាប់ទៅដល់គណៈកម្មការ និងទស្សនិកជនថា បំណងប្រាថ្នារបស់ខ្លួននាថ្ងៃអនាគត គឺចង់ក្លាយជា «បណ្ឌិតអក្សរសាស្ត្រខ្មែរ»។
ជាការពិតណាស់ នៅពេលលឺដូច្នេះ គណៈកម្មការ អ្នកស្រី អម្ពរ ទេវី បានសម្តែងនូវក្តីរំភើបយ៉ាងខ្លាំង និងព្រមទាំងនិយាយទាំងអួងដើមកតែម្តង ព្រោះតែអ្នកស្រីបានឃើញកុមារកម្ពុជាមួយរូបនេះ មានភាពវ័យឆ្លាតយ៉ាងនេះ ហើយអ្នកស្រីសង្ឃឹមថា កុមារា ស៊ាប ឈៀងហេង នឹងក្លាយជាបណ្ឌិត ឬ គ្រូពោរពេញដោយចំណេះដឹងខ្ពង់ខ្ពស់ម្នាក់ នៅថ្ងៃអនាគត ។ ជាមួយក្តីរំភើបនេះផងដែរ ដោយពុំបង្អង់យូរ អ្នកស្រី ក៏ចុចប៊ូតុងមាសភ្លាមៗ ធ្វើឲ្យទស្សនិកជនរំភើបចិត្តស្ទើរស្រក់ទឹកភ្នែកជំនួសកុមារតូចនេះតែម្តង ៕ ដោយ៖ ចន្ទី
