ប៉ូលិសទីក្រុងNew York បានប្រកាសអាសន្ន ហើយអំពាវនាវដល់ពលរដ្ឋរកកន្លែង«លាក់ខ្លួននៅនឹងកន្លែង» ជិតអគារTime Warner បន្ទាប់ពីគេរកឃើញកញ្ចប់បញ្ញើប្រៃសណីយ៍ក្នុងប្រអប់សំបុត្ររបស់អគារដែលមានស្នាក់ការរបស់CNN នេះ។
តាមCNN កញ្ចប់បញ្ញើប្រៃសណីយ៍ត្រូវបានរកឃើញនៅវេលាម៉ោង១០ព្រឹក ថ្ងៃទី២៤តុលា( ម៉ោង២១នៅកម្ពុជា) ក្នុងប្រអប់សំបុត្ររបស់អគារTime Warner នាបុរីNew York។
បណ្តាបុគ្គលិករបស់ CNN ក៏ដូចជាមនុស្សម្នាក្នុងអគារTime Warner ត្រូវបានជម្លៀសចេញភ្លាមៗដើម្បីបង្ការស្ថានការណ៍អាក្រក់។
ប៉ុន្មានម៉ោងមុននោះប៉ុណ្ណោះ កញ្ចប់បញ្ញើប្រៃសណីយ៍គួរឱ្សសង្ស័យមួយចំនួនក៏ត្រូវបានគេរកឃើញផ្ញើទៅកាន់ គេហដ្ឋានរបស់អតីតប្រធានាធិបតី Bill Clinton និងBarack Obama ផងដែរ។
តាម Channel NBC News កញ្ចប់ប្រៃសណីយ៍ទាំងនោះអាចផ្ទុកនូវគ្រាប់បែកបំពង់មួយនៅគេហដ្ឋានរបស់មហាសេដ្ឋី George Soros នៅNew York កាលពីប៉ុន្មានថ្ងៃមុននេះ។
តាម Reuters ការិយាល័យមួយនៅរដ្ឋ Florida ក៏ត្រូវបានជម្លៀសចេញក្រោយពីគេប្រទះឃើញកញ្ចប់ប្រៃសណីយ៍គួរឱ្សសង្ស័យមួយ។ ក្រៅពីនោះប្រភពព័ត៌មានមួយ ចំនួនឱ្យដឹងថា មានកញ្ចប់ប្រៃសណីយ៍គួរឱ្យសង្ស័យមួយទៀតត្រូវបានផ្ញើទៅកាន់
សេតវិមាន ប៉ុន្តែប្រភពច្បាស់ការណ៍បានបដិសេធព័ត៌មាននេះ។
ប្រតិកម្មថ្មីបំផុតមួយរបស់អនុប្រធានាធិបតីអាមេរិក Mike Pence បានធ្វើការថ្កោលទោសរាល់ឧបាយកលវាយប្រហារខាងលើ ហើយសន្យានឹងនាំជនដៃដល់ទាំងនោះឱ្យចេញមកបង្ហាញមុខនិងទទួលខុសត្រូវ៕សូយន