ភ្នំពេញ ៖ បន្ទាប់ពីមានប្រជាពលរដ្ឋតវ៉ា កាលពីព្រឹកថ្ងៃទី២៤ខែតុលាមកនោះ លោកឧបនាយករដ្ឋមន្ត្រីជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ បានបើកកិច្ចប្រជុំជាមួយតំណាងប្រជាពលរដ្ឋ ដែលមកតវ៉ាករណីវិវាទដីធ្លី ពាក់ព័ន្ធនឹងដីសម្បទានសេដ្ឋកិច្ច ក្រុមហ៊ុនចំការកៅស៊ូមេមត់ ស្ថិតនៅឃុំ២ធ្នូ ស្រុកស្នួល ខេត្តក្រចេះ នៅទីស្ដីការក្រសួង។
ក្រសួងរៀបចំដែនដី នគរូបនីយកម្ម និងសំណង បានចេញសេចក្ដីប្រកាសព័ត៌មានបញ្ជាក់ថា ប្រជាពលរដ្ឋទទួលស្គាល់ថា បានចូលទន្ទ្រានកាន់កាប់ដីរដ្ឋ ដែលបានផ្ដល់សិទ្ធិសម្បទានសេដ្ឋកិច្ច ជូនក្រុមហ៊ុនចំការកៅស៊ូមេមត់ ស្ថិតនៅឃុំ២ធ្នូ ស្រុកស្នួល ខេត្តក្រចេះ ពិតប្រាកដមែន ដោយសារខ្វះដីបង្កបង្កើនផល។
បើតាមក្រសួងរៀបចំដែនដី ប្រជាពលរដ្ឋទាំងអស់នោះ បានយល់ព្រមត្រឡប់ទៅមូលដ្ឋានវិញ ដើម្បីបន្ដសហការជាមួយអាជ្ញាធរខេត្តក្រចេះ សំដៅពន្លឿនការធ្វើអត្ដសញ្ញាណកម្មពីមូលដ្ឋានដើម ដែលពួកគាត់រស់នៅអចិន្ដ្រៃយ៍ឲ្យបានច្បាស់លាស់ ហើយយល់ព្រមទទួលយកដី តាមទំហំ និងទីកន្លែងតាមការរៀបចំរបស់អាជ្ញាធរខេត្ដក្រចេះ។
រាជរដ្ឋាភភិបាលកម្ពុជា យកចិត្តទុកដាក់ដោះស្រាយជូនប្រជាពលរដ្ឋ ដែលមានឈ្មោះក្នុងបញ្ជីអ្នកតវ៉ាដែលខ្វះដីលំនៅឋាន និងដីបង្កបង្កើនផលពិតប្រាកដមែន ដោយត្រូវដាក់សំណើតាមរយៈអាជ្ញាធរដែនដីសាមី ស្របតាមនីតិវិធីសម្បទានដីសង្គមកិច្ច។
ប្រជាពលរដ្ឋសន្យាសហការជាមួយអាជ្ញាធរដែនដី ក្នុងការទប់ស្កាត់ការចូលទន្ទ្រានដីរដ្ឋ ការញុះញង់ និងការក្លែងបន្លំផ្ដល់ព័ត៌មានមិនពិត ដែលបង្កឲ្យយឺតយ៉ាវដល់ដំណើរការដោះស្រាយ។ ក្នុងករណីមានការបន្ដចូលទន្ទ្រានដីរដ្ឋ ញុះញង់ និងក្លែងបន្លំផ្ដល់ព័ត៌មានមិនពិត ត្រូវប្រឈមចំពោះមុខច្បាប់ជាធរមាន៕ ដោយ ៖ កូឡាប