ភ្នំពេញ ៖ ក្រុមស្ត្រីបឹងកក់ ប្រមាណ២០នាក់ដែលមានទាំងកូនក្មេងផងនោះ កាលពីព្រឹកថ្ងៃទី២៥ខែតុលាឆ្នាំ២០១៨នេះ បាននាំគ្នាលើកបដា ស្រែកតវ៉ាទាមទារ ដោយស្នើសុំដល់សម្តេចតេជោ ហ៊ុន សែន ជួយអន្តរាគមន៍ដោះស្រាយជូនពួកគាត់ផង ដោយសុះសំណងបន្ថែម នៅខាងមុខទីស្តីការនាយករដ្ឋមន្ត្រី។
ស្ត្រីម្នាក់ជាតំណាងប្រជាពលរដ្ឋ បាននិយាយប្រាប់អ្នកកាសែតថា ការដែលពួកគាត់មកតវ៉ាទាមទារសុំឲ្យសម្តេចតេជោជួយដោះស្រាយនេះ ដោយសារតែការតវ៉ាជាច្រើនលើកច្រើនសារមកហើយ ដោយមិនទទួលបានផលសោះ ហើយក៏បានដាក់លិខិតស្នើសុំរកដោះស្រាយបញ្ហាដីធ្លីនេះ ទៅសាលារាជធានីភ្នំពេញ ក៏គ្មានចម្លើយដែរ។ តំណាងប្រជាពលរដ្ឋ បានបន្ថែមថា ពួកខ្ញុំស្នើសម្តេចតេជោ ហ៊ុន សែន មេត្តាជួយអន្តរាគមន៍ដោះស្រាយដីធ្លី និងសំណងបន្ថែមឲ្យប្រជាពលរដ្ឋអតីតបឹងកក់ ដែលត្រូវសាលារាជធានីភ្នំពេញ និងក្រុមហ៊ុនស៊ូកាគូអ៊ីនបានផ្តល់សំណងតិចតួច និងបណ្តេញចេញទាំងបង្ខំពីតំបន់បឹងកក់ នៅអំឡុងឆ្នាំ២០០៨ និងឆ្នាំ២០១១។
តំណាងប្រជាពលរដ្ឋរូបនោះ បានលើកឡើងថា ការដែលវិលមកទាមទារសំណងបន្ថែមទៀតនោះ ដោយសារតែនៅពេលនេះពួកយើងខ្ញុំទាំងអស់គ្នា សុទ្ធតែមានជីវភាពខ្វះខាត គ្មានការងារធ្វើនិងគ្មានមុខរបររកស៊ីជាក់លាក់ ជាពិសេសអតីតក្រុមគ្រួសារបឹងកក់ភាពច្រើនជំពាក់បំណុលគេគ្មានលុយសង មិនមានប្រាក់សម្រាប់ទិញថ្នាំព្យាបាល នៅពេលមានជំងឺ និងមិនមានប្រាក់សម្រាប់គាំទ្រការសិក្សារបស់កូនចៅ ។ ដោយជួបប្រទះនិងការលំបាកផ្នែកជីវភាព និងការរស់នៅខ្លាំងពេកបានធ្វើឲ្យក្រុមគ្រួសារមួយចំនួន បានចងក្រង និងរួមគ្នាជាក្រុមៗ តវ៉ាទាមទារសំណងបន្ថែម ជាថវិកា ឬជាលំនៅដ្ឋានពីសាលារាជធានីភ្នំពេញ និងក្រុមហ៊ុនស៊ូកាគូអ៊ីន។ ហេតុដូចនេះ តំណាងនិងសមាជិកបណ្តាញអតីតស្ត្រីបឹងកក់ បានស្វែងរកអន្តរាគមន៍ពីសម្តេចតេជោ សុំសំណងជាលំនៅដ្ឋាន និងថវិកាចំនួន២ម៉ឺនដុល្លារបន្ថែម ដើម្បីស្តារជីវភាពគ្រួសារឡើងវិញ។
មន្ត្រីរដ្ឋបាលរាជធានីភ្នំពេញ បានបញ្ជាក់ថា បញ្ហាដោះស្រាយដីធ្លីនៅក្នុងតំបន់បឹងកក់ ជិតបញ្ចប់ហើយ នៅសល់ប្រមាណ១០គ្រួសារតែប៉ុណ្ណោះ ហើយក្រុមស្ត្រីបឹងកក់ដែលមកតវ៉ាទាមទារទាំងនេះ គឺពួកគាត់ធ្លាប់ទទួលបានសំណងដោះស្រាយរួចរាល់អស់ហើយ។
សូមបញ្ជាក់ថា ប្រជាពលរដ្ឋនៅតំបន់បឹងកក់ ជាង៧០០គ្រួសារ បានទទួលដំណោះស្រាយទាំងផ្ទះ និងទាំងដីធ្លី ១០០ភាគរយក្រោយពីសម្តេចតេជោនាយករដ្ឋមន្ត្រី បានចេញអនុក្រឹត្យ លេខ១៨៣ ចុះថ្ងៃទី១១ ខែសីហា ឆ្នាំ២០១១ ប្រគល់ដីទំហំ ១២,៤៤ហិកតាឲ្យប្រជាពលរដ្ឋបឹងកក់ដែលមិនព្រមចាកចេញ និងមិនទទួលយកសំណងពីក្រុមហ៊ុនស៊ូកាគូអ៊ីន និងសាលារាជធានីភ្នំពេញ៕ ដោយ ៖ បញ្ញាស័ក្តិ