ស្ត្រីមើលក្មេងម្នាក់ ត្រូវបានចាប់ខ្លួនដោយ FBI បន្ទាប់ពីនាងបានដាក់លក់ដេញថ្លៃក្មេងៗ ចំនួន ៣នាក់ ដែលនាងកំពុងមើលថែ។ ការដាក់លក់ដេញថ្លៃនោះ បានធ្វើឡើងនៅលើវេបសាយ eBay ។
បើតាម FBI បានឲ្យដឹងថា ស្ត្រីមើលក្មេងខាងលើមានឈ្មោះថា Janet Miller អាយុ ៣៧ឆ្នាំ ហើយនាងត្រូវបានម្តាយក្មេងជួលឲ្យទៅមើលកូន៣នាក់អាយុ ២ ទៅ ៦ឆ្នាំ ដោយសារតែម្តាយក្មេងទាំងនោះរវល់នឹងការងារខ្លាំង។
ម្តាយក្មេង៣នាក់នោះបានជួលស្ត្រីខាងលើមកមើលកូនគាត់បណ្តោះអាសន្នសិន ដោយសារតែអ្នកមើលកូនរបស់គាត់ត្រូវធ្វើការ វះកាត់។
ប្រហែល ១ម៉ោង ក្រោយពេលម្តាយរបស់ក្មេងបានចេញទៅធ្វើការ FBI បានទទួលសេចក្តីរាយការណ៍ពីក្រសួងសេវាកម្មសង្គម ដោយបានប្រាប់ពីការដាក់ដេញថ្លៃក្មេងៗ នៅលើ eBay។
បន្ទាប់ពីទទួលបានការរាយការណ៍ FBI បានធ្វើការស៊ើបអង្កេត និងបានកំណត់ពីទីតាំងនៃការបង្ហោះដេញថ្លៃនោះ ដោយសារតែមានការសហការពីខាង eBay។
ស្ត្រីញៀនថ្នាំខាងលើត្រូវបានចាប់ខ្លួន ត្រឹមតែ ២ម៉ោងប៉ុណ្ណោះក្រោយពេលបង្ហោះក្មេងៗសម្រាប់ដេញថ្លៃ ហើយនាងបានសារភាពពីទោសកំហុសផងដែរ។
ស្ត្រីទទួលស្គាល់ថា “នាងមានបំណងលក់ក្មេងៗដើម្បីយកលុយទិញថ្នាំ ហើ់យនាងសង្ឃឹមថា នាងអាចទទួលបាន ១០០ដុល្លាក្នុងក្មេងម្នាក់ៗ ដោយនាងដាក់តម្លៃដេញថ្លៃដំបូងត្រឹម ១០ដុល្លា”។
ការដាក់ក្មេងដេញថ្លៃអនឡាញនោះ មានការចាប់អារម្មណ៍គួរសមដែរ ដោយមានអ្នកដេញថ្លៃចំនួន ១៦ដង ក្នុងរយៈពេលត្រឹម ២ម៉ោង ចំនែកតម្លៃដេញវិញបានកើនឡើងដល់ ២៧.២០០ដុល្លា។
ស្ត្រីញៀនថ្នាំ Janet Miller កំពុងប្រឈមនឹងបទចោទចំនួន ៣១ករណី រួមមានទាំងការជួញដូរមនុស្ស និងការចាប់ជំរិតផងដែរ។ ប្រសិនតុលាការរកឃើញថាមានទោស នាងអាចប្រឈមនឹងការជាប់គុករយៈពេល ៨៥៥ឆ្នាំ៕ សុភ័ក្ត្រ
ប្រភព៖ worldnewsdailyreport